Ścipły miljanier Pavieł Tapuzidzis

Jon uvachodzić u dziasiatku samych upłyvovych biznesoŭcaŭ Biełarusi. Jon uładalnik hipiermarkietaŭ «Karona» i ŭłaśnik adzinaj pryvatnaj vytvorčaści cyharet. Usio heta Pavieł Tapuzidzis — čałaviek, jakoha mała chto bačyŭ u tvar. Hruzinski vytvorca cacačnych samalocikaŭ staŭ adnym z samych nabližanych da Łukašenki biznesoŭcaŭ. Vy budziecie śmiajacca, ale «ścipły» miljanier u časie prezidenckaj kampanii-2010 byŭ... staršyniom vybarčaj kamisii na adnym ź minskich učastkaŭ.

Nivodnaha intervju ŭ ŚMI, redkija fota, nivodnaha źjaŭleńnia na publicy… Navat zakrytyja ad biełarusaŭ miljaniery Juryj Čyž i Uładzimir Piefcijeŭ śviacilisia pad prycełam kamier.

Pakul jahonaja kampanija «Tytuń-Inviest» z dazvołu dziaržavy spalvaje lohkija biełarusaŭ, sam Tapuzidzis buduje sabie viertalotny kłub i majontak na bierazie Minskaha mora.

U čałavieka-kasmapalita Paŭła Tapuzidzisa źmiašanyja hruzinskaja i hreckaja kroŭ. Pryčym mienavita Hrecyja źjaŭlajecca jahonym druhim domam. Pieršym stała Biełaruś. Akurat tut małaviadomy zamiežnik, jaki pačynaŭ z vytvorčaści płastmasavych cacačnych samalocikaŭ, atrymaŭ u ruki zvyšprybytkovy tytuniovy biznes.

U kniazi z dazvołu dziaržavy

«Tytuń-Inviest» — minskaja kampanija, jakaja zajmajecca adnačasova i impartam, i ŭłasnaj vytvorčaściu cyharet.

Tytuniovy rynak žorstka kantralujecca ŭładami. Na im usiaho dva hulcy — Hrodzienskaja tytuniovaja fabryka, bolš za 99% akcyj jakoj naležać dziaržavie, i sumiesnaje amierykanska-biełaruskaje pradpryjemstva Tapuzidzisa.

Kvota «Tytuń-Inviest» na 2011 hod składaje 7,6 miljarda cyharet, heta kala 28% ad ahulnaj kolkaści cyharet, jakija vypuskajucca ŭ krainie. Kampanija pa licenzii robić papularnyja siarod biełarusaŭ marki Winston, Camel, Monte Carlo dy inšyja. A voś impart ažyćciaŭlajecca ŭ ciesnaj suviazi z Kiraŭnictvam spravami prezidenta, a dakładniej z adnym ź jaho padraździaleńniaŭ — handlovym domam «Uschodni».

Karol hipiermarkietaŭ

Druhi profil Tapuzidzisa suhučny śpiecyjalizacyi miljaniera Juryja Čyža. Jany abodva zrabili staŭku na hipiermarkiety, u pieršaha «Karona», u druhoha — «Prastor».

Handlovyja centry «Karona» praciahvajuć svajo šeście pa krainie.

U kamplekcie ź vialikimi kramami praduktaŭ iduć vielizarnyja «Karona-techna». Jak vynikaje z nazvy, tam handlujuć technikaj.

Biznes Tapuzidzisa nie varta błytać z adnajmiennym handlovym centram u Hrodnie, jaki naležyć Łazaru Nisajevu.

Prylacić Tapuzidzis na svaim viertalocie…

Na sajcie «Karony» možna zaŭvažyć redkuju dla Biełarusi abjavu — prodaž i arenda viertalotaŭ. Łahičnaja suviaź pamiž hetym zachapleńniem Tapuzidzisa i jaho pieršym cacačnym biznesam navidavoku.

Voś užo treci hod u Ratamcy, što kala Minskaha mora, «Tytuń-Inviest» buduje pieršy ŭ krainie viertalotny kłub. I niahledziačy na kryzis, adździełačnyja pracy voś-voś skončacca. Elitnyja restaran, hatel, a taksama šykoŭny «haściavy domik» za 200 mietraŭ ad ich na samym bierazie vadaschovišča, u jakim budzie žyć ułasna haspadar.

Hłuchi płot śviedčyć pra toje, što Tapuzidzis nie čakaje vypadkovych naviednikaŭ. Pobač pabudavany i anhar dla asabistaha viertalota miljaniera.

Usie ŭmovy jość i dla spakojnaha arystakratyčnaha adpačynku. Ratamka — centr konnaha sportu Biełarusi. Kłub jašče dabudoŭvajecca, a palotać na čatyrochmiascovym viertalocie prapanujecca ŭžo ciapier. Dla cikaŭnych udakładnim kaštarys. Hadzina palotu kaštuje 1 245 000 rubloŭ niezaležna ad kolkaści pasažyraŭ na borcie (ad adnaho da troch), pryčym vylatać možna prosta z terytoryi aeradroma «Minsk-1».

Zamak la rezidencyi

U žniŭni minułaha hoda byŭ hučna anansavany prajekt zabaŭlalnaha kompleksa na Naračy, jaki musiŭ realizavać «Tytuń-Inviest».

Kiraŭnik dziaržavy ŭłasnaručna vydzieliŭ placoŭku pad aerakłub, centr vodnych zabaŭ i centr dajvinhu.

Praŭda, ci dojdzie da budaŭnictva na Naračy — adkrytaje pytańnie. Prajekt doŭha prachodziŭ uzhadnieńnie, ale ŭsio adno vyklikaje pratesty ekołahaŭ i hramadskaści.

Druhi zapłanavany Tapuzidzisam abjekt — najvialikšy ŭ Biełarusi handlova-zabaŭlalny centr «Zamak». Raniej jaho mierkavali nazvać «Lido». Heta budzie «sučasny čatyrochpaviarchovy budynak z etničnymi elemientami biełaruskich zamkaŭ», jak abiacajuć architektary.

Jaho majuć pabudavać na praśpiekcie Pieramožcaŭ u Minsku kala zavoda «Atłant».

Aproč praduktovaj «Karony» tut buduć krytaja koŭzanka, kinateatr-multypleks na try zały, kazino i stryptyz-kłub. I ŭsio heta — pad nosam u Alaksandra Łukašenki.

Sacyjalnaja nahruzka

Jak i mnohija inšyja biełaruskija paśpiachovyja kampanii, «Tytuń-Inviest» atrymaŭ ad dziaržavy stratny kałhas u Lubanskim rajonie. Ale havorka pieradusim nie pra jaho, a pra asabistuju nahruzku Tapuzidzisa. Vy budziecie śmiajacca, ale «ścipły» miljanier nie admaŭlajecca i ad vykanańnia važnych palityčnych zadač.

U časie prezidenckaj kampanii-2010 na adnym z sotniaŭ minskich vybarčych učastkaŭ staršyniom kamisii byŭ abrany… Pavieł Hieorhijevič Tapuzidzis — «ad pracoŭnaha kalektyva buchhałteryi AAT «Tytuń-Inviest».

Brat-2

Jak pakazvaje praktyka, u dziaržavy jość istotnyja arhumienty, kab nie davać rassłablacca miljanieram i trymać ich u tonusie. U vypadku kiraŭnika «Tytuń-Inviesta» najbolš hučnyja historyi źviazanyja nie z samim im, a ź jahonym bratam Vitalom Tapuzidzisam. Jak śćviardžaje «Ježiednievnik», toj nie maje adnosinaŭ da biznesu brata, ale nie raz sprabavaŭ prykryvacca jahonym imiem. Naprykład, u 2006 hodzie pravaachoŭnyja orhany padazravali Vitala Tapuzidzisa ŭ kantrabandnaj pastaŭcy cyharet u Biełaruś. A ŭ studzieni 2011 hoda Tapuzidzis-brat byŭ zatrymany pa padazreńni ŭ padbuchtorvańni da dačy chabaru čynoŭnikam. Uładalnik minskaha restarana Casa Agustin Lopez, jaki najmaŭ pamiaškańnie ŭ Kiraŭnictva spravami prezidenta, pieradavaŭ $5 tysiač za «spryjalnaje rašeńnie pytańnia arendy». Śledstva padazravała Vitala Tapuzidzisa ŭ tym, što jon abiacaŭ vyrašyć usie prablemy praz svaje suviazi, prosiačy za pasłuhi $10 tysiač. MUS Biełarusi nie daje nijakich kamientaroŭ pa hetaj spravie, tamu

dahetul nieviadoma, ci vyjšaŭ na svabodu brat miljaniera.

• 0
• 0
• 0
• 0
• 0
• 0
• 0
• 0