«Можна сп***іць?» Скандал вакол новага праекта Мелказёрава
Дзень таму ютуб-блогер Мікіта Мелказёраў запусціў праект «Кайлі Міндоўг», дзе хоча расказваць пра беларускую гісторыю. На яго пасыпаліся кампліменты за арыгінальную назву. А потым высветлілася, што не ўсё так проста.
Рэч у тым, што Мелказёраў — не першы, хто прыдумаў каламбур «Кайлі Міндоўг». Гэтую гульню слоў ён пачуў ад беларускай дызайнеркі Караліны Паляковай — яе твітар з такой назвай цяпер мае 635 падпісчыкаў.
Сам Мікіта ў анонсе новага праекта адзначыў, што «гісторыя з назвай цікавая», і паабяцаў расказаць яе як-небудзь пазней. А вось Караліна была больш шматслоўнай і выклала ў сторыс скрын перапіскі з Мелказёравым, з якім яна сябруе, дзе тройчы адмаўляе яму ў дазволе выкарыстаць спалучэнне «Кайлі Міндоўг» для ютуб-праекта.
Тым не менш Мікіту гэта не спыніла. За цікавую назву канала Мелказёраў атрымаў шмат кампліментаў.
Палякова напісала твіт, дзе спытала ў падпісчыкаў, як бы яны адрэагавалі на сітуацыю на яе месцы. Адказы былі такія:
Пазней Караліна распавяла ў сацсетках больш пра гэтую гісторыю. Паводле яе, яны з Мелказёравым абмеркавалі сітуацыю: Мікіта патлумачыў яе тым, што не пачуў пра адмову ў яе словах пра назву.
«Часам я мару, як пішу рэп, а таксама часам шпацырую з Мікітам і перапісваюся. Я прыдумала панч для свайго рэпа, які б меў сабе імя Кайлі Міндоўг. Падзялілася з Мікітам, якога трымала за сябра. Ён запытаў: «Можна сп***іць?»
Я кажу: «Не, гэта мой творчы псеўданім, толькі за вялікія грошы». У дзень каранацыі Міндоўга я так назвала свой акаўнт у твітары — Кайлі Міндоўг. Мне Мікіта піша: «А мы ўжо для праграмы робім стыль з такой назвай». Я кажу: «Эй, не, ты што, не!»
На трэці раз гэты блогер паказаў мне гэтую застаўку шоу, і я проста ўспыхнула: «Не!»
Як бачна, гэты мужчына «Не!» не чуе, і ён можна красці крэатывы і хаваць такія факты, і пісаць «гісторыя нэймінгу цікавая», а ў твар мне казаць: «Так-так, я скраў, так, будзе скандал на ўвесь твітар, але гэта мой найлепшы крадзеж».
Я выкаціла ўмову, па якой я пагаджаюся аддаць гэты нэймінг, і атрымала ў разы менш і яшчэ размову ў стылі «А я неяк не чуў, што ты казала «не». З майго боку давер да чалавека ўпаў».
Сам Мікіта прызнаў у эфіры «Звычайнай раніцы», што назва «Кайлі Міндоўг» — цалкам ідэя Караліны Паляковай. А таксама пракаментаваў гэтую гісторыю ў шоу і ў сваім інстаграме:
«Мне і камандзе зусім не хацелася распачынаць чарговы канфлікт. Мяркую, нам яны не трэба сёння зусім. Я прызнаю сваю памылку і віну ў тым, што выкарыстаў назву твітара Караліны Паляковай для новага канала. Прашу прабачэння ў Караліны і людзей, якіх гэты кейс абразіў.
Меркаванні наконт сэксізму — тут зусім не. Я і каманда «Маліны» паважаем і жанчын, і мужчын. Крэатыў Караліны цудоўны, я ў яго ўлюбіўся, але своечасова не адрэагаваў на заўвагі і не маю права яго выкарыстоўваць надалей. Назву канала мы зменім».
Мелказёраў просіць прапаноўваць новыя варыянты назвы для канала ў каментарах пад першым выпускам ці ў яго інстаграме. Сама Караліна тым часам перайменавала свой твітар, яго новая назва — «Жыццё Маліна».
«Наша Нiва» — бастыён беларушчыны
ПАДТРЫМАЦЬМікіта Мелказёраў запусціў новы праект — «Кайлі Міндоўг»
Мікіта Мелказёраў набіў сабе тату з Караткевічам і кацянятамі ФОТАФАКТ
-
У Гомелі галоўны трэнер баскетбольнай каманды пяць гадоў забіраў у гульцоў заробак і грошы на харчаванне
-
«Хахлуша канал вядзе». Фанатка Лукашэнкі абразіла ўкраінку і палівае брудам Літву, дзе сама працуе
-
У Гродне будуць завочна судзіць уладальніка офіснага будынка, у якім знаходзіцца польскае консульства
«Хахлуша канал вядзе». Фанатка Лукашэнкі абразіла ўкраінку і палівае брудам Літву, дзе сама працуе26
Каментары