«Таемны кліент» сачыў за гасцямі «вострава педафілаў» Эпштэйна па сігнале іх тэлефонаў
Ладзілася сачэнне праз скандальна вядомую ў ЗША брокерскую фірму, але пад увагай аказаліся не ўсе госці, расказвае ў сваім новым расследаванні выданне Wired.
Выданне Wired атрымала доступ да ўнутранай дакументацыі міжнароднай брокерскай фірмы Near Intelligence, паводле якой тая актыўна сачыла за наведвальнікамі сумна вядомага «вострава педафілаў» мільярдэра Джэфры Эпштэйна, абвінавачанага ў сэкс-гандлі людзьмі і педафіліі (ён скончыў жыццё самагубствам у турме).
Сачэнне ажыццяўлялася пры дапамозе сігналаў тэлефонаў саміх гасцей прыватнага вострава, сярод якіх былі многія сусветныя знакамітасці.
Як адзначае Wired, Near Intelligence збірала даныя геалакацый пераважна амерыканскіх гасцей Эпштэйна, бо законы ЗША аб канфідэнцыйнасці не абараняюць яе грамадзян ад сачэння належным чынам (таму ў фірмы няма даных аб перасоўваннях еўрапейскіх наведвальнікаў вострава Эпштейна, бо ў Еўропе прыватнасць грамадзян абаронена законам мацней).
Акрамя таго, перахопленыя сігналы тэлефонаў таксама паказвалі на гасцей з Аўстраліі, Кайманавых выспаў, Украіны і іншых краін.
Напрыклад, даныя аб сачэнні за тэлефонамі ўказалі на амерыканскіх наведвальнікаў вострава Эпштэйна, якія пражываюць у 80 гарадах і 26 штатах краіны. Некаторыя дамы наведвальнікаў каштуюць мільёны даляраў.
Як пацвердзіла выданню Wired прадстаўніца фірмы Near Intelligence, кампанія збірала даныя аб гасцях «вострава педафілаў» наўмысна, але пры гэтым не стала раскрываць заказчыка сачэння.
Сама фірма Near Intelligence мае індыйскія і сінгапурскія карані. Яна займаецца зборам і продажам інфармацыі, а таксама можа пахваліцца патэнцыйным ахопам сачэння за каля 1,6 мільярда чалавек у 44 краінах свету.
У дадзены момант кампанія памяняла назву на Azira, бо мела праблемы з судовымі іскамі і даўгамі, у тым ліку выкліканымі скандалам з масавым сачэннем за пацыенткамі 600 клінік рэпрадуктыўнага здароўя ЗША, якія рабілі там аборты насуперак законам іх хатніх штатаў, дзе падобная практыка забаронена.
Выданне Wired таксама падкрэслівае, што такія фірмы, як Near Intelligence (Azira) патэнцыйна могуць прадаваць канфідэнцыйныя даныя людзей такім краінам, як Расія, Кітай, Іран і Паўночная Карэя.
Хто павінен быць прэзідэнтам Беларусі ў пераходны перыяд? Разважаюць вядомыя беларусы23
Каментары