Былога караля хіп-хопу P. Diddy усё больш мужчын абвінавачваюць у сэксуальным гвалце
Сярод новых іскаў супраць амерыканскага рэпера і музычнага прадзюсара — восем ананімных мужчын, якія расказваюць пра выпадкі сэксуальнага гвалту супраць іх у перыяд з 1998 па 2022 год. Самаму малодшаму на момант здзяйснення злачынства было 16 гадоў.
Пра падрабязнасці справы супраць амерыканскага рэпера і музычнага прадзюсара Шона Джона Комбса, вядомага як P. Diddy, паведамляе The Washington Post.
Як вядома, былы кароль хіп-хопу быў затрыманы 16 верасня па абвінавачанні ў гандлі людзьмі з мэтай сэксуальнай эксплуатацыі, распаўсюджванні наркотыкаў і выкраданні людзей. Многія з гэтых меркаваных злачынстваў адбыліся на сэкс-вечарынках.
Як піша выданне, толькі з 14 кастрычніка супраць былога караля хіп-хопу было пададзена 13 новых іскаў. Адзін з іх ад жанчыны, якая сцвярджае, што ў 13 гадоў падверглася нападу на вечарынцы MTV Video Music Awards у 2000-м. Яна сцвярджае, што Комбс разам з неназваным мужчынам і жанчынай-знакамітасцю згвалцілі яе.
Восем пазоваў падалі мужчыны. З іх двое сцвярджаюць, што былі непаўналетнімі на момант здзяйснення нападаў. Многія абвінаваўцы раней працавалі з Комбсам або для яго.
Увогуле за апошні год супраць Комбса было пададзена 25 іскаў аб сэксуальным гвалце. Сярод першых 12 абвінаваўцаў двое былі мужчынамі. Гэта Родні «Lil Rod» Джонс, прадзюсар, які працаваў над апошнім праектам Комбса — The Love Album 2023 года, і Дэрык Лі Кардэла-Сміт, зняволены турмы Мічыгана.
Сярод новых іскаў — абвінавачанне ад мужчыны, які сцвярджае, што ў 1998 годзе быў запрошаны на «Белую вечарынку» (штогадовае зорнае мерапрыемства, якое Комбс арганізоўваў з 1998 па 2009 год). Паводле судовых дакументаў, Комбс пераканаў 16-гадовага падлетка, музыку-пачаткоўца, зняць штаны, заявіўшы, што гэта абрад пасвячэння ў індустрыю, а затым пачаў лашчыць яго геніталіі.
Іншы заяўнік сцвярджае, што яму было 17 гадоў, калі яго запрасілі на эксклюзіўную вечарынку, арганізаваную Комбсам у пентхаусе гатэля на Манхэтэне ў 2022 годзе. P. Diddy прапанаваў падлетку напой, ад якога ў таго закружылася галава і ён адчуў слабасць. Хлопец спрабаваў знайсці прыбіральню і натыкнуўся на пакой, дзе праходзіла оргія. Там Комбс прыцягнуў яго да ложка і пачаў дамагацца.
Акрамя таго, у пазовах апісаны выпадкі, калі дамаганні Комбса да мужчын былі перапынены. Напрыклад, адзін з мужчын, які працаваў ахоўнікам на вечарынцы Комбса ў 2005 годзе, заявіў, што дамаганні спыніліся, калі ў пакой увайшла ягоная жонка. Іншы мужчына, які даваў Комбсу ў арэнду раскошныя аўтамабілі і ўпрыгожванні, сцвярджае, што кароль хіп-хопу дамагаўся яго на вечарынцы ў 2022 годзе і інцыдэнт быў перапынены, калі ў пакой увайшоў вядомы спартсмен.
Некаторыя мужчыны заяўляюць, што іх не толькі дамагаліся, але і гвалцілі. Адзін з інцыдэнтаў, апісаны ў пазове, адбыўся на вечарынцы ў 2022 годзе ў Лос-Анджэлесе. Пацярпелы — трэнер па фітнэсе, які сцвярджае, што яго апаілі і вымусілі ўдзельнічаць у сэксуальных актах з Комбсам і іншымі вядомымі асобамі.
Комбс, які ў цяперашні час знаходзіцца ў федэральнай турме ў Брукліне ў чаканні суда, працягвае адмаўляць сваю віну. У нядзелю, 20 кастрычніка, яго адвакаты папрасілі суддзю Нью-Ёрка забараніць любым патэнцыйным сведкам або іх адвакатам выказвацца супраць іх кліента, сцвярджаючы, што такія заявы перашкаджаюць справядліваму судоваму разбору.
Па прад'яўленых абвінавачаннях Комбсу пагражае пакаранне ад 15 гадоў да пажыццёвага заняволення. Суд павінен адбыцца ў маі 2025 года.
Ці здасць Трамп Украіну Расіі? Чаму дэмакраты разгромленыя? Да чаго прывядзе кантроль рэспубліканцаў над выканаўчай і заканадаўчай уладай адначасова?8282
Каментары
А што ж гэта за асобы такія? Ці раптам не тыя, што за любога Дэмакрата апантана агітуюць, як і сам Дыдзі? Можа нядобра выйсці, калі апублічыць прозвішчы. Прама як з Эпстайнам.