«Lubaja zaležnaść — u hałavie». Biełarus kinuŭ kuryć, pić ałkahol i staŭ viehanam. Ën raskazvaje, jakija źmieny ŭ ciele adčuŭ
Siarhiej Sasin kuryŭ siem hadoŭ. Ale voś užo piać hadoŭ nie kuryć. Paśla jon pryjšoŭ i da viehanstva. Ën raskazaŭ «Našaj Nivie» pra svaje adčuvańni i pra toje, što pamianiałasia ŭ jahonym žyćci.
19.02.2023 / 21:52
Fota: sacsietki
«Lubaja zaležnaść — u hałavie»
Pačynaŭ kuryć Siarhiej za kampaniju. A paśla ŭciahnuŭsia.
«Dajšło da taho, što kožny dzień staŭ vykurvać pačak. Kali kuryŭ, zadychaŭsia, ciažej było ruchacca», — zhadvaje jon.
Zaviazać vyrašyŭ, kali ŭ 2017-m jechaŭ u ciahniku ŭ Polšču.
«Pierajazdžaŭ ź Biełarusi. Tady była składanaja situacyja z pracaj u krainie i sa svabodaj.
Chacieŭ źmianić śviet, ale spačatku treba było pačać ź siabie. Staŭ zabaraniać sabie ŭsio drennaje», — kaža jon.
U Homieli 39-hadovy Siarhiej pracavaŭ pradaŭcom-kansultantam, a va Urocłavie ŭładkavaŭsia budaŭnikom.
Čaradziejnaha recepta, jak kinuć kuryć, u jaho niama. Mužčyna kaža, što pierš za ŭsio varta zrazumieć dla siabie, pa jakoj pryčynie ciahnie da cyharety.
«Mnie, naprykład, kali ja pracavaŭ jašče kansultantam, chaciełasia adpačyć niejak, voś i vychodziŭ na pierakur. A paśla padumaŭ, što mahu adpačyvać i biez kureńnia.
Chtości ŭžyvaje śpiecyjalnyja płastyry ź nikacinam, ale ja nie sprabavaŭ. Kinuŭ rezka. Nie było składana, tolki paru razoŭ śniłasia, jak kuru. Napeŭna, prosta adhałoski biesśviadomaha.
Liču, što lubaja zaležnaść u hałavie. Parazmaŭlajcie z samim saboj. Časta byvaje, što ŭ čałavieka ciažki psichałahičny stan i jon choča znajści suciašeńnie ŭ cyharetach.
Kali zryvajeciesia, to znoŭ raju zapytacca ŭ siabie, čamu vykuryŭ cyharetu, čamu nie zrabiŭ niešta inšaje. Naprykład, pajeści možna, na špacyr pajści ci niejkija fizičnyja praktykavańni zrabić. Lepš prydumać sabie inšuju, dobruju zvyčku. Prosta asensavana treba padychodzić da taho, što robiš», — kaža jon.
Fota: sacsietki
Paśla taho, jak mužčyna advučyŭ siabie ad cyharet, kinuŭ i ałkahol. Hetym razam u jaho była jašče bolšaja matyvacyja, bo jon pračytaŭ, jak śpirtnoje moža sapsavać mozh.
«Chaciełasia nie być zaležnym u niejkich učynkach ad ałkaholu, — tłumačyć jon. — Dumaju, što kali b nie kinuŭ pić, to znoŭ by staŭ kuryć. U takim stanie zvyčajna zaŭsiody pačynaješ.
Ałkahol davaŭ mnie byccam by volnaść, ale heta tak tolki padavałasia. Nasamreč ja prosta hublaŭ samakantrol».
Raniej Siarhiej lubiŭ vypić niekalki butelek piva ź siabrami paśla futboła.
«I ŭžo adčuvaŭ siabie pjanym, bo paśla fizičnaj aktyŭnaści ałkahol chutka raspaŭsiudžvajecca pa arhaniźmie. Prychodziŭ dadomu i kłaŭsia spać. Zaŭvažaŭ u inšych, što ałkahol paharšaŭ psichałahičny stan. Ludzi stanavilisia ahresiŭnymi», — raskazvaje jon.
«Kali chočacca hamburhier, kuplaju fałafiel»
Ale na hetym Siarhiej nie spyniŭsia: staŭ viehietaryjancam, a potym pryjšoŭ da viehanstva.
«Spačatku chacieŭ prosta pasprabavać, pahladzieć, jak budu siabie adčuvać, jak adreahuje arhanizm na źmienu charčavańnia. Nie jeŭ miasa doŭhi čas, ale piŭ małako, užyvaŭ syr. Paśla pačytaŭ pra vytvorčaść syru, pra fabryki i pierastaŭ jaho jeści.
Pryjšoŭ da taho, što bieź miasa, jajek, małaka i inšaha moj arhanizm narmalna moža funkcyjanavać. Heta śviadomy vybar», — raskazvaje jon.
Mužčyna pachudzieŭ, ale staŭ lepš siabie adčuvać.
«Z-za taho, što piŭ piva, zajadaŭ areškami, čypsami, lubiŭ salonaje, drenna z arhanizma vyvodziłasia vada. Ciapier uvohule nie salu ničoha.
Navat praściej ranicaj ustavać, źjaviłasia ŭ ciele lohkaść. Jem čaściej za try razy na dzień, ale sadavinu, harodninu. Jany dobra zasvojvajucca arhanizmam, u ich mała kałoryj. I adrazu nie źjadaju try-čatyry jabłyki, bo hetaha nadoŭha nie chapaje. Kali pa adnym-dva, ale časta, to jeści nie chočacca», — tłumačyć Siarhiej svaju sistemu.
Fota: sacsietki
Kali mužčynu chočacca źjeści hamburhier, jon kuplaje fałafiel.
«Ale niadaŭna źjeŭ pačak čypsaŭ, — pryznajecca Siarhiej. — Mabyć, raz na miesiac sabie takoje mahu dazvolić.
Adna maja znajomaja doŭha była viehankaj. Paśla raskazvała historyju, što zachaciełasia joj kryłcaŭ z KFC, jana dva tydni chadziła i maryła pra ich. Paśla dazvoliła sabie ich. I praciahnuła być viehanam. Kali mocna chočacca, to varta źjeści».
Siabry Siarhieja čas ad času pakieplivajuć ź jaho viehanstva.
«Uvohule ja starajusia pra heta nie razmaŭlać, kab nie pryciahvać uvahi, i nie daju parad biez prośby samoha čałavieka. Asabistaja sprava kožnaha, što jeści, ci kuryć i ci spažyvać ałkahol.
Kali sustrakajusia ź siabrami, to pju biezałkaholnaje piva. Prosta admaŭlajusia, kali prapanoŭvajuć ałkaholnaje», — raskazvaje jon.
Siarhiej adznačaje, što kali jon pierastaŭ kuryć i ŭžyvać ałkahol, u jaho prajšoŭ hałaŭny bol.
«Raju zapisvać, jak vy siabie adčuvajecie, — kaža jon. — Kali ŭ niejki dzień było drenna, naprykład, baleŭ žyvot ci hałava, praanalizavać dla siabie, što vy rabili ŭčora. Arhanizm takim čynam pakazvaje, što jamu nie padabajecca».
U hetym hodzie Siarhiej vyłučyŭsia ŭ Kaardynacyjnuju radu. Jon tam delehat ad supolnaści biełarusaŭ Urocłava. «Chaču, kab nas, biełarusaŭ, čuli, — kaža jon. — Nas šmat i my roznyja!»