«Adzin kielich karysny»? Vyhladaje, što nie

Ciapier bolšaść daktaroŭ upeŭniena śćviardžaje, što ałkahol škodzić zdaroŭju, navat kali pić jaho u niaznačnaj kolkaści.

Čamu ałkahol taki škodny?

Navukoŭcy ličać, što ałkahol vyklikaje prablemy sa zdaroŭjem, škodziačy DNK.

Arhanizm rasščaplaje ałkahol u acetaldehid — chimičnaje rečyva, taksičnaje dla kletak, jakoje nie tolki razburaje vašu DNK, ale i nie daje arhanizmu adnaŭlać paškodžańni. Kletka z paškodžanym DNK moža pačać pracavać niapravilna, u tym liku moža pačać utvaracca rakavaja puchlina.

Ałkahol taksama vyklikaje akiślalny stres. Heta ŭžo inšaja forma paškodžańnia DNK, jakaja moža być asabliva niebiaśpiečnaja dla kletak, što vyściłajuć kryvianosnyja sasudy. Akiślalny stres moža pryvieści da fizičnaha źmianieńnia arteryj, u vyniku čaho pavyšajecca arteryjalny cisk i źjaŭlajecca išemičnaja chvaroba serca.

Chiba ałkahol nie karysny dla serca?

Niekatoryja daśledavańni śćviardžajuć, što nievialikaja kolkaść ałkaholu, asabliva čyrvonaha vina, moža być karysnaj. Minułyja daśledavańni pakazali, što ałkahol pavyšaje ŭzrovień ŁPVŠ (lipaprateinaŭ vysokaj ščylnaści) — tak zvanaha «dobraha» chalesterynu. A reśvieratroł (antyaksidant, jaki znachodzicca ŭ vinahradzie i čyrvonym vinie), maje sardečna-achoŭnyja ŭłaścivaści.

Hipoteza, što nizkaja doza ałkaholu karysnaja dla serca, imavierna, uźnikła z-za taho, što ludzi, jakija pjuć u nievialikich kolkaściach, jak praviła, majuć zdarovyja zvyčki: dajuć sabie fizičnyja nahruzki, jaduć udostal sadaviny i harodniny i nie kurać. U naziralnych daśledavańniach pieravahi takich pavodzinaŭ dla serca mahli być pamyłkova prypisany ałkaholu, piša The New York Times.

Apošnija daśledavańni pakazali, što pryjom navat małych doz ałkaholu pavialičvaje ryzyku pavyšeńnia kryvianaha cisku i raźvićcia sardečnych zachvorvańniaŭ, a kali čałaviek dobra tak pje, to ryzyka ŭzrastaje jašče bolš. Užyvańnie ałkaholu taksama źviazana z parušeńniami sardečnaha rytmu, viadomymi jak pulsujučaja arytmija, što pavyšaje ryzyku ŭtvareńnia trombaŭ i insultu.

Ałkahol viadzie da raku

Usie viedajuć, što kureńnie vyklikaje rak, ale mała chto ŭśviedamlaje, što ałkahol taksama mocny kancerahien.

Ałkahol — pryčyna mnohich vidaŭ raku: połaści rota, hłotki i hartani, raku stravavoda, raku piečani, raku małočnaj załozy i kałarektalnaha raku. Daśledavańni pakazvajuć, što moža być suviaź pamiž ałkaholem i inšymi vidami raku, u tym liku rakam prastaty i padstraŭnikavaj załozy, choć dokazy pakul mienš adnaznačnyja.

Dla niekatorych vidaŭ raku, naprykład, raku piečani i pramoj kiški, ryzyka ŭźnikaje tolki tady, kali ludzi pjuć praźmierna. A voś dla raku małočnaj załozy i stravavoda ryzyka ŭzrastaje pry ŭžyvańni lubych doz ałkaholu.

Dyk varta mienš pić ci zusim kinuć?

Navat nievialikaje źnižeńnie spažyvańnia ałkaholu moža być karysnym, kažuć navukoŭcy, asabliva kali vy trymajeciesia zdarovaha ładu žyćcia ŭ astatnim: nie kurycie, zajmajeciesia sportam.

Pry ciažarnaści ałkahol supraćpakazany ŭ lubych kolkaściach, navat samych niaznačnych. 

Kali vy adčuvajecie siabie kiepska paśla ŭžyvańnia ałkaholu — značyć, vaš arhanizm jaho nie ŭsprymaje, vam jon asabliva škodny.

U kožnym razie, admova ad spažyvańnia ałkaholu pryniasie karyść i vam, i ludziam pobač, asabliva kali zhadać pra toje, što z dachodaŭ ad vytvorčaści i prodažu ałkaholu apłačvajecca značnaja častka palityčnych represij u Biełarusi.

• 51
• 0
• 5
• 1
• 5
• 7
• 4
• 0