Sirata, «pravilna» havoryć, addany Łukašenku. Čym admietny mahiloŭski ideołah, jaki stanie samym maładym deputatam Pałaty pradstaŭnikoŭ
Nie vyklučana, što Uładzimiru Paŭłoŭskamu zareziervavali miesca ŭ łukašenkavym parłamiencie praź jahony hod naradžeńnia. Jon źjaviŭsia na śviet za piać dzion da pieramohi Łukašenki na pieršych prezidenckich vybarach. 30-hodździu hetaj padziei prapahanda adnaznačna pryśviecić bahata času.
16.01.2024 / 10:43
«Prychilnikaŭ Łukašenki našmat bolš»
Uładzimiru Paŭłoŭskamu ciapier 29 hadoŭ, stolki, kolki Łukašenka pry ŭładzie. Što da ŭzrostu, to ŭ Pałatu pradstaŭnikoŭ traplali i maładziejšymi.
Naprykład, Maryi Vasilevič było 22 hady, kali jana «raźmianiała» karonu «Mis Biełaruś-2018» na deputackaje paśviedčańnie. Vasilevič zapomniłasia tym, što ŭ 2020 hodzie naviedała špital i vybačyłasia pierad paciarpiełymi ad hvałtu siłavikoŭ.
Ad Paŭłoŭskaha takoha ŭčynku čakać nie vypadaje, chiba tolki, kali zahadajuć.
Dla jaho Łukašenka — «sapraŭdy nacyjanalny lidar», jaki zastupajecca za biełaruski narod.
26 žniŭnia 2020 hodzie małady ideołah byŭ na mitynhu ŭ padtrymku Łukašenki. Na jaho zvozili ŭdzielnikaŭ z usioj krainy, ale abiacanaj kolkaści ŭ sotni tysiač udzielnikaŭ sabrać nie ŭdałosia.
«Pakul Alaksandr Łukašenka byŭ zaniaty spravaj, prykładajučy ŭsie siły, kab vyrašać najvažniejšyja pytańni, chacia b uziać składanuju situacyju z karanavirusnaj infiekcyjaj, inšyja prosta pościli ŭsialakija fejki ŭ sacyjalnych sietkach, finansavali mitynhi i płacili ludziam za toje, kab tyja vychodzili na vulicy», — kazaŭ mahiloŭski bereesemaviec.
Na prapahandysckich fota Uładzimir Paŭłoŭski niaredka źjaŭlajecca ź siamjoj. Paŭłoŭski z žonkaj i dačkoj źleva. Fota: mogilev-region.gov.by
Pavodle Paŭłoŭskaha, prychilnikam Łukašenki nie varta płacić, kab jany sabralisia i padtrymali jaho.
U dalejšym łukašenkaŭcy abiacali pravieści miehamitynh, ale ŭsio ž nie navažylisia. Łukašenka kazaŭ pra 300 tysiač udzielnikaŭ.
U tym ža, 2020-ym, Paŭłoŭski zaklikaŭ mahiloŭcaŭ vyjści na praŭładny mitynh «Za baćku» i za lubimuju, jakuju nie addajuć. Na jaho taksama zvozili ŭdzielnikaŭ usio vobłaści.
Spasyłajučysia na Łukašenku, Paŭłovič davodziŭ, što suprać Biełarusi viadziecca hibrydnaja vajna, jakuju, mahčyma, nie zaŭvažajuć abyvacieli.
«Ad bolšaści abmiežavańniaŭ pacierpić najpierš prosty narod», — strašyŭ jon u 2021 hodzie.
«U nas kankurencyi i apanientaŭ, ja b skazaŭ, niama»
Uładzimir Paŭłoŭski pracuje namieśnikam hienieralnaha dyrektara pa ideałahičnaj pracy i bytu Mahiloŭskaha miasakambinata, dzie doŭhi čas vykryvali karupcyjanieraŭ.
Były funkcyjanier BRSM zajmaje hetu pasadu z 2022 hoda.
U Pałacie pradstaŭnikoŭ jon źbirajecca zasiadać jak vyłučeniec čatyroch rajonaŭ Mahiloŭščyny: Horackaha, Drybinskaha, Mścisłaŭskaha i Čavuskaha.
Paŭłoŭski naradziŭsia ŭ vioscy Malki Horackaha rajonu. Kali jamu było try hady baćki trahična zahinuli. Vychoŭvała jaho siamja dziadźki.
Uładzimir Paŭłoŭski pa pasadzie kiraŭnika abłasnoj arhanizacyi BRSM. Fota: mogilev-region.gov.by
U hutarcy z čytačom «Našaj Nivy» Paŭłoŭski nie praminuŭ adznačyć, što Horacki rajon — jaho małaja radzima.
Jon nastojvaŭ, što maje «niemały žyćciovy šlach» i dastatkova kampietencyj, kab pradstaŭlać intaresy ziemlakoŭ.
Asnoŭny ž pasył jaho vybarčaj prahramy, kab «jak minimum usie ludzi vybarčaj akruhi byli ŭ roŭnych umovach».
Paŭłoŭski nie staŭ tłumačyć, što maje na ŭvazie.
Pavodle jaho, dakumienty na rehistracyju kandydatam u deputaty Pałaty pradstaŭnikoŭ jon zdaŭ i ciapier čakaje rašeńnia.
BRSMaviec Paŭłoŭski nie strymaŭsia, kab pachvalicca, jak vyhladaje ź milicejskim pistaletam. Fota: sacyjalnyja sietki
Pradstaŭnik maładoha pakaleńnia namienkłatury bałatujecca ŭ łukašenkaŭski parłamient jak siabra kišennaj Respublikanskaj partyi pracy i spraviadlivaści.
Jaho abrańnie musić zaśviedčyć šmatpartyjnaść Pałaty pradstaŭnikoŭ.
Sparynh-partnioram dla Paŭłoŭskaha zrabili dyrektarku biblijatečnaj sietki Čavuskaha rajona Alenu Maksimovič. Jana vyłučenka partyi «Biełaja Ruś».
Paŭłoŭski zapeŭnivaje, što hetyja dźvie partyi nie kankurujuć adna z adnoj.
«U nas kankurencyi i apanientaŭ, ja b skazaŭ, niama. My ŭsie ŭ adnym klučy pracujem», — adznačaje jon i raić pasłuchać, što kaža pra partyjnaje ŭładkavańnie ŭ ciapierašniaj Biełarusi Łukašenka.
Byŭ družyńnikam
Siarhiej Paŭłoŭski prajšoŭ pravierku słužbaj u BRSM.
Try hady zajmaŭ pasadu pieršaha sakratara abkamu hetaj dziaržaŭnaj maładziožnaj arhanizacyi, jakaja daŭno ŭ narodzie zaviecca «łukamołam».
Paŭłoŭski zasiadaŭ u Moładzievym parłamiencie pry Pałacie pradstaŭnikoŭ i staršyniavaŭ u kamisii pa pytańniach ekałohii i pryrodakarystańnia ŭ Moładzievaj pałacie parłamienckaha schoda sajuzu Biełarusi i Rasii.
Znajomyja Paŭłoŭskaha kažuć, što jon umieje «pravilna» havaryć.
U svaich vystupach nie praminaje zhadvać «patryjatyzm» i «nieabchodnaść abjadnacca pierad pahrozami». Ich tłumačeńni najčaściej razmytyja.
«Siońnia hramadstva sutykajecca z novymi vyklikami i pahrozami, i vielmi važna vychoŭvać luboŭ da Ajčyny i svajho naroda, imknieńnie słužyć ich intaresam», — davodziŭ namienkłaturnik dva hady tamu.
Uładzimir Paŭłoŭski chvalicca nahrudnym znakam «Za adznaku ŭ achovie hramadskaha pravaparadku». Fota: zviazda.by
Pavodle adukacyi ideołah miasakambinata — fizik-matematyk. Jon vypusknik fakulteta matematyki i pryrodaznaŭstva mahiloŭskaha ŭniviersiteta imia Kulašova.
U 2022 hodzie BRSMaviec chvaliŭsia, što padčas vučoby ŭ składzie moładzievaha atrada «Sokał» dapamahaŭ milicyi łavić złačyncaŭ» i maje nahrudny znak «Za adznaku ŭ achovie hramadskaha pravaparadku». Pavodle jaho słovaŭ, takaja dziejnaść vychoŭvaje patryjatyzm.
Byłyja adnakurśniki kažuć, što Paŭłoŭski, chodziačy ź milicyjaj u rejdy, bolš pantavaŭsia, čym dapamahaŭ, a ŭ moładzievym asiarodździ stanaviŭsia abjektam dla kpinaŭ. Na ich beeresemaviec staraŭsia nie zvažać, ale nie zaŭždy vychodziła. Tady pahražaŭ razabracca.
Łukašenkaviec aktyŭny ŭ sacyjalnych sietkach. Razam ź siamiejnymi fotkami vykładaje zdymki z prapahandysckich mierapryjemstvaŭ.
Nie zabyvaje znajści miesca ŭ albomie i Łukašenku.
«Lublu BY, žonku i dačku», — napisana ŭ jaho instahramie.
Taki Uładzimir Paŭłoŭski pa-za dziaržaŭnaj słužbaj. Fota: sacyjalnyja sietki
Hladzicie taksama:
Vasilevič, Davydźka, Savinych — chto z deputataŭ Pałaty nie idzie na pieravybary
Kaho pastaviać śpikieram Pałaty pradstaŭnikoŭ zamiest śpisanaha Andrejčanki?
Samy małady kandydat u deputaty — 23-hadovaja dziaŭčyna ad partyi Hajdukieviča FOTA