У Беларусі спросцяць працэдуры мытнага афармлення
Старшыня Дзяржаўнага мытнага камітэта Уладзімір Арлоўскі падчас нарады ў Лукашэнкі паведаміў пра намеры спрасціць працэдуры мытнага афармлення, прытым як для арганізацый, так і для грамадзян, піша БелТА.
18.01.2024 / 18:34
Фота ілюстрацыйнае
Калі праекты зменаў рэалізуюцца, кампаніям не трэба будзе падаваць для мытнага афармлення шэраг дакументаў, паколькі неабходную інфармацыю перададуць іншыя дзяржорганы і банкі. Да таго ж некаторыя дакументы можна будзе падаваць толькі ў электронным выглядзе.
Акрамя таго, па асобных кірунках скароцяць тэрміны адміністрацыйных мытных працэдур. Напрыклад, рашэнне аб класіфікацыі тавару камплектнага аб'екта будзе прымацца на працягу 15 дзён, а не 30, як цяпер.
Таксама плануецца, што фізічныя асобы змогуць падаваць не папяровую дэкларацыю, а электронную, прытым зрабіць гэта можна будзе да ўезду на мяжу. Уладзімір Арлоўскі ўдакладніў, што такая дэкларацыя будзе бясплатнай.
Спросцяць заканадаўства і для тых, хто збіраецца пераехаць у Беларусь. Цяпер, калі такі чалавек захоча ўвезці свой аўтамабіль, то яму трэба валодаць ім не менш за два гады, інакш прыйдзецца плаціць мыты. У праекце закона прапануюць скараціць гэты тэрмін да шасці месяцаў.
Чытайце таксама:
Перачэпліванне фур з Еўрасаюза зрабілі платным
Лукашэнка значна павысіў мыты на шампуні з «краін англасаксонскай групы»