Sańnikaŭ: Demsiły — heta ja. A Łatuška i inšyja — samazvancy
U intervju Deutsche Welle Andrej Sanńnikaŭ adkazaŭ, čamu nie supracoŭničaje z Ofisam Śviatłany Cichanoŭskaj i jak bačyć mahčymym vyzvaleńnie palitviaźniaŭ.
07.02.2024 / 00:58
Andrej Sańnikaŭ. Skryn videa dwbelarus / YouTube
Pra adnosiny z Ofisam Śviatłany Cichanoŭskaj
U Sańnikava spytali pra jaho staŭleńnie da demakratyčnych siłaŭ Biełarusi. Na heta jon zaŭvažyŭ, što sam źjaŭlajecca pradstaŭnikom demakratyčnych sił.
«Ja — demsiły. «Jeŭrapiejskaja Biełaruś» — heta demakratyčnyja siły, jakija padrychtavali revalucyju 2020 hoda. U 2019 hodzie vy viedali takoha lidara apazicyi, jak Łatuška, Cichanoŭskaja? Nie»,
— zaŭvažyŭ Sańnikaŭ i raspavioŭ svaju viersiju padrychtoŭki padziej 2020-ha.
«U 2017 hodzie my zrazumieli, što narod zakipaje paśla taho, jak ludzi pajšli na pratesty paśla ŭkazu ab darmajedach — samyja masavyja pratesty paśla časoŭ pierabudovy. U 2019 hodzie my, lidary Biełaruskaha nacyjanalnaha kanhresu, Niaklajeŭ, Statkievič i ja, u Varšavie analizavali situacyju.
Vysunuli našym kandydatam Mikałaja Statkieviča na tak zvanych prezidenckich vybarach 2020 hoda. Było zrazumieła, što ŭ Mikałaja nie skončyŭsia termin paražeńnia ŭ pravach pa łukašenkaŭskich zakonach. Ale heta byŭ adziny čałaviek, jaki byŭ naceleny na pratesty, ź jakim u nas było poŭnaje razumieńnie, što biez vulicy ŭ nas ničoha nie dasiahnuć».
Pa słovach Sańnikava, Mikałaj Statkievič pačaŭ źbirać ludziej pa rehijonach. Adnym ź ich byŭ Siarhiej Cichanoŭski. «Z hetaha pačaŭsia 2020 hod. Jany ŭdvuch pajechali pa Biełarusi, i tamu ich terminova izalavali 29 maja. Dalej užo raźvivaŭsia scenar KDB».
Kali ŭ Sańnikava spytali, ci maje jon ciapier adnosiny z novymi demakratyčnymi strukturami, toj adkazaŭ:
«Jany samazvancy. Jakija adnosiny mohuć być, kali toj ža Łatuška nazyvaŭ Statkieviča kryminalnikam, kali toj u 2008 hodzie siadzieŭ, a jon byŭ u Polščy? Ja liču, što toje, što tam robicca, vielmi mocna stała škodzić Biełarusi. Tamu ja nie mahu razhladać mahčymaść adnosin ź imi».
Jak heta škodzić, jon nie staŭ udakładniać.
Pra sankcyi i palitviaźniaŭ
Andrej Sańnikaŭ — kandydat u prezidenty Biełarusi ŭ 2010 hodzie i były palitviazień. Abmiarkoŭvajučy los ciapierašnich palitviaźniaŭ, jon adznačyŭ, što vystupaje za ŭzmacnieńnie sankcyj.
«Kali režym bačyć, što idzie pasłableńnie, iduć represii. Užo bolš za hod nijakich sankcyj niama. I navat ciapier pakiet, jaki byccam by prymajuć z pryviazkaj da Rasii, jak pravilna prakamientavaŭ muž palitźniavolenaj Paliny Šarenda-Panasiuk i sam były palitźniavoleny Andruś, heta śmiešna. Heta nie sankcyi, heta niejkija pustyja miery dla taho, kab chiba što ptušačku pastavić. Heta nie dapamoža».
Na pohlad palityčnaha dziejača, sankcyi pavinny tyčycca ŭsich śfier ekanamičnaha žyćcia krainy. I ŭmovaj ich admieny pavinna być vyzvaleńnie palitźniavolenych. «Kropkavyja sankcyi, piersanalnyja — heta nie sankcyi. Heta turystyčnyja abmiežavańni. Jany i tak nikudy nie jeździać. Navošta suprać ich prymać niejkija sankcyi?»
Jon ličyć, što Zachadu nie chapaje pryncypovaści ŭ hetym pytańni.
Sańnikaŭ pryhadaŭ, što jaho razam sa Źmitrom Bandarenkam vyzvalili ŭ 2012 hodzie, kali tolki pačali ŭvodzić ekanamičnyja sankcyi. Ale paśla hetaha praces pašyreńnia sankcyj spyniŭsia.
«Chiba što była niejkaja damoŭlenaść: kali mianie vypuskajuć, to tady jany pojduć na pasłableńnie. I jany pierastali ŭvodzić sankcyi navat tyja, pra jakija abviaścili. Heta było cynična. Palityki ŭ Jeŭropie nie razumiejuć, što heta značyć dla ludziej. A dla ludziej heta aznačaje kankretnyja rečy.
Statkievič zastaŭsia ŭ turmie. Dasiadzieŭ amal uvieś termin. Chacia jaho pavinny byli vyzvalić taksama, jak mianie i Bandarenku. Heta pavinna było być, bo ŭ turmie amal nikoha nie zastavałasia pa padziejach 2010 hoda. I heta pakazalny prykład. Z adnaho boku, vyzvalili dziakujučy ekanamičnym sankcyjam, a z druhoha boku, jak tolki pajšło pasłableńnie, usio spyniłasia».
Čytajcie jašče: