«Łukašenka budzie razmaŭlać z narodam, a my za jaho śpinaj — rabić reformy». Pra što kazaŭ Fiaduta paśla pieramohi Łukašenki ŭ 1994-m
«Treba hipnatyzavać źmiejaŭ biełaruskich zababonaŭ».
04.06.2024 / 09:26
Pieršy prezident Rasii Barys Jelcyn prymaje Alaksandra Łukašenku ŭ Kramli, 3 žniŭnia 1994 hoda
U novym vypusku TOKu analityk Juryj Drakachrust zhadvaje svaju razmovu z palitołaham i litaraturaznaŭcam Alaksandram Fiadutam u 1994 hodzie adrazu paśla pieramohi Łukašenki.
«Jon mnie pazvaniŭ, nie viedaju čamu, i my doŭha hulali pa parku Horkaha, siadzieli na łavačkach. Jon mnie tłumačyŭ ich (jaho, Hančara, Bułachava) schiemu. Jon kazaŭ: «Vy ž razumiejecie, jaki ŭ nas narod, kali jamu ŭprahać dyskurs Hajdara i Čubajsa, jon nas, vas na viły nadzienie, kali vy heta budziecie rabić (Paźniak ci Šuškievič).
Z našym narodam treba razmaŭlać inakš. Treba, tak skazać, hipnatyzavać źmiejaŭ biełaruskich zababonaŭ. I Łukašenka heta zrobić lepš za ŭsich. A my za jaho śpinaj budziem rabić reformy, budziem zbližacca z Zachadam».
Drakachrust raskazvaje, što pachvaliŭ taki płan, ale zaŭvažyŭ, što baicca, što ŭ Fiaduty i jaho adnadumcaŭ z kamandy Łukašenki ničoha nie atrymajecca:
«Bajusia, što nie vy jaho vykarystajecie, a jon vas. I na karotki čas. U jaho aŭtarytarnyja ŭchvatki, talent kamunikatara. Jon vas pierajhraje, źniščyć».
Pa słovach palitołaha, Fiaduta pahadziŭsia, što jany ryzykujuć.
Drakachrust ličyć Łukašenku talenavitym dyktataram i tłumačyć: «Było šmat vyklikaŭ suprać jaho i šmat niespryjalnych faktaraŭ. (…) Jak minimum dva razy byli vielmi mocnyja vykliki. Pieršy — heta kanstytucyjny kryzis 1996 hoda. (…) I, zrazumieła, 2020 hod».
Palitołah adznačaje, što z Rasijaj u Łukašenki atrymałasia vybudavać «chitruju schiemu, składanuju sistemu adnosin», jakuju jon kaliści nazvaŭ hulnioj «chavacca ad Rasii ŭ jaje abdymkach».
«Jon zanadta lubić uładu, kab całkam pajści pad Maskvu. U jaho myśleńnie fieadała. Jano nacyjanalnaje ŭ vielmi małoj stupieni. Jon adbudavaŭ svoj fieod i nie źbirajecca nikomu addavać. (…) Ni Cichanoŭskaj, ni Pucinu, ni Bajdenu. Čałaviek u 21-m stahodździ — taki fieadał 13-ha stahodździa».
Hladzicie całkam:
Chto moža stać biełaruskim Chruščovym? Viersija Drakachrusta
Čamu Łukašenka stolki hadoŭ trymaje pres-sakratarkaj Natallu Ejsmant?
«Kali nie Cichanoŭskaja, to nichto», — Drakachrust
Jaki momant byŭ dla Łukašenki samym traŭmatyčnym? Razvažaje Drakachrust