Brytanskija ultrapravyja vydali biełaruski marš za svoj ułasny
«300 tysiač brytanskich patryjotaŭ, vami hanarycca ŭvieś hrobany zachodni śviet».
31.10.2024 / 23:20
«Marš novaj Biełarusi» 23 žniŭnia 2020 hoda, u jakim pa roznych acenkach uziali ŭdzieł sotni tysiač biełarusaŭ. Fota: Naša Niva
U brytanskim siehmiencie tvitara (X) pačali raspaŭsiudžvacca videa antyŭradavaha šeścia miascovych ultrapravych, jakija niezadavolenyja najaŭnaściu mihrantaŭ (pieravažna ź isłamskich krain) u Vialikabrytanii. Sami mitynhi adbylisia 26 kastryčnika.
Na adnym ź videa, jakoje raspaŭsiudžvali brytanskija ultrapravyja, akazaŭsia «Marš novaj Biełarusi», jaki ładziŭsia sotniami tysiač biełaruskich pratestoŭcaŭ 23 žniŭnia 2020 hoda suprać hvałtu siłavikoŭ i falsifikacyi Alaksandram Łukašenkam prezidenckich vybaraŭ.
Akaŭnt ultrapravych, jaki vykłaŭ hetaje videa, padpisaŭ jaho tak (pierakładajem biez maciukoŭ).
«Jakoje dzivosnaje vidovišča — 300 tysiač brytanskich patryjotaŭ. Siońnia hanarusia tym, što ja brytaniec, jak nikoli. Tomi nami hanarycca, my saboj hanarymsia. Uvieś zachodni śviet nami hanarycca. Vydatnaja praca», — piša adzin z akaŭntaŭ brytanskich ultrapravych.
Skrynšot publikacyi adnaho z akaŭntaŭ brytanskich ultrapravych u tvitary (X), dzie było raźmieščana videa z «Maršu novaj Biełarusi» 23 žniŭnia 2020 hoda
Jak paviedamlaje vydańnie Deutsche Welle, 26 kastryčnika niekalki tysiač prychilnikaŭ brytanskaha ultrapravaha aktyvista Tomi Robinsana sabralisia ŭ centry Łondana na antyŭradavuju demanstracyju pad nazvaj Unite the Kingdom («Abjadnać Karaleŭstva»).
Tomi Robinsan — psieŭdanim zaciataha antyimihranckaha aktyvista, isłamafoba i byłoha lidara ultrapravaha ruchu «Abarončaja liha Anhlii» Styviena Jakśli-Lenana, jaki zaklikaŭ svaich prychilnikaŭ vyjści na vulicy suprać «tyranii» brytanskaha premjer-ministra Kira Starmiera. Sam 41-hadovy radykalny aktyvist pavinien byŭ stać hałoŭnym pramoŭcam na hetaj akcyi, adnak prysutničać na joj nie zmoh, pakolki byŭ zatrymany palicyjaj.
Siarod sabranych na pratest 26 kastryčnika ŭ Łondanie pieravažali biełyja mužčyny siaredniaha ŭzrostu. Niekalki ŭdzielnikaŭ akcyi prynieśli płakaty ŭ padtrymku eks-prezidenta ZŠA Donalda Trampa, taksama byŭ zaŭvažany rasijski ściah».
Ultrapravy brytanski aktyvist Tomi Robinsan (Styvien Jakśli-Lenan) vystupaje pierad prychilnikami na mitynhu 1 červienia 2024 hoda. Fota: Guy Smallman / Getty Images
Pravaabaroncy padličyli, kolki ludziej asudzili za palityku z 2020 hoda
Ultrapravyja prychilniki Trampa aktyŭna stvarajuć milicyju pa ŭsich štatach. Nakolki heta surjozna?