Ultrapravyja prychilniki Trampa aktyŭna stvarajuć milicyju pa ŭsich štatach. Nakolki heta surjozna?
Čalcy roznych ultrapravych hrupovak, adepty teoryj zmovy, a taksama niekatoryja byłyja siłaviki i vajskoŭcy, jakija padtrymlivajuć Donalda Trampa, pačali abjadnoŭvacca i stvarać pa ŭsich štatach atrady ŭzbrojenaj milicyi praz Telegram. Inicyjatar dadzienaj zadumki, jaki ciapier siadzić u turmie za šturm Kapitolija, nie chavaje, dziela čaho ŭsio robicca.
Častka prychilnikaŭ Donalda Trampa pieravažna ź liku čalcoŭ ultrapravych hrupovak i adeptaŭ teoryj zmovy sprabujuć vierbavać ludziej va «ahulnanacyjanalnuju ŭzbrojenuju milicyju» pa ŭsioj krainie napiaredadni prezidenckich vybaraŭ, kanstatuje amierykanskaje vydańnie Wired.
Dla paŭnavartasnaha analizu niebiaśpiečnaj tendencyi žurnalisty vydańnia źviazalisia niepasredna z naminalnym lidaram ruchu Džejkam Łenham, ultrapravym aktyvistam, jaki kiruje pracesam stvareńnia milicejskich atradaŭ u roznych štatach prosta z turmy.
Džejk Łenh prasłaviŭsia ŭ internecie za ŭdzieł u šturmie Kapitolija ŭ Vašynhtonie z-za niazhody z projhryšam Donalda Trampa na prezidenckich vybarach 2020 hoda (na toj momant mužčynie było 25 hadoŭ). Łenh užo tady sprabavaŭ arhanizoŭvać praz Telegram atrady ŭltrapravaha apałčeńnia dla ŭzbrojenaha supraćstajańnia fiederalnym uładam.
Za šmatlikija złačynstvy padčas biesparadkaŭ ciapier znachodzicca pad vartaj i čakaje sudu. Mužčynie pahražaje da 20 hadoŭ źniavoleńnia, ale jaho papularnaść u amierykanskich sacsietkach ad hetaha tolki ŭźlacieła.
«Tak, heta nievierahodna, tamu što, kali ja niadaŭna źviazvaŭsia z Łenham, to dumaŭ, što jon vyjšaŭ pad zakład, ale jon byŭ u turmie. Jon vielmi chutka adkazaŭ mnie ŭ X (Tvitary), i paśla hetaha ja pahavaryŭ ź im pa telefonie.
Niezrazumieła, jak Łenh arhanizoŭvaje milicyju z-za krataŭ. Jon śćviardžaje, što ŭ jaho adabrali mabilny telefon, ale za apošnija try-čatyry hady z momantu jaho aryštu Łenh praciahvaje być naminalnym kiraŭnikom abo lidaram hetaha ruchu, niahledziačy na toje, što jon byŭ zaklučany ŭ turmu», — raspaviadaje karespandent Wired Devid Hiłbiert, jaki razmaŭlaŭ z Džejkam Łenham pa telefonie.
Hiłbiert, spasyłajučysia na Łenha, adznačaje, što ŭsia arhanizacyja atradaŭ milicyi idzie praz Telegram, i što hetym zajmajucca 50 telehram-kanałaŭ. A kolkaść samich «milicyjantaŭ» užo nibyta składaje 20 tysiač čałaviek pa ŭsich štatach, dla kiravańnia jakimi na miescach pryznačajucca «miascovyja lidary štataŭ».
Sam Łenh u razmovie zajaviŭ, što ŭ milicyi niama aficyjnaj mety. Ale mužčyna namiaknuŭ, što jaho atrady rychtujucca da prezidenckich vybaraŭ z metaj supraćstajać fiederalnym uładam u vypadku paražeńnia Donalda Trampa, jakoje Łenh nazyvaje «niemahčymym», pieradaje karespandent Wired Devid Hiłbiert.
Hiłbiert i jaho kamanda pry hetym zaŭvažyli, što Łenh vidavočna pieravyšaje moc svajoj milicejskaj sietki. Praanalizavaŭšy čaty i kanały prychilnikaŭ Łenha ŭ Telegram, žurnalisty Wired pryjšli da vysnovy, što realnaja kolkaść «milicyjantaŭ» na dadzieny momant składaje nie 20 tysiač, a ŭsiaho tolki 2 tysiačy čałaviek, i što značnaja kolkaść padpisčykaŭ adpaviednych telehram-kanałaŭ štučna nakručana.
Ale hetyja 2 tysiačy ŭltrapravych aktyvistaŭ usio jašče majuć zbroju, padkreślivaje Hiłbiert.
Karespandent Wired miarkuje, što Łenh źjaŭlajecca ŭsiaho tolki padstaŭnoj asobaj, za jakoj chavajucca sapraŭdnyja ŭpłyvovyja arhanizatary. Hiłbierta turbuje toj fakt, što administracyja Telegram nijak nie maderuje i nie vydalaje nieanacysckija kanały i čaty Łenha, a technałahičnyja hihanty (Apple, Google i inšyja) dy i sami amierykanskija palityki nie robiać nijakich aficyjnych zajaŭ pa dadzienaj prablemie.
Akaŭnt Kabančuka ŭzłamali — ale ci biełaruskija śpiecsłužby?10
Kamientary