Жонка кандыдата ў прэзідэнты Польшчы нарадзіла ў 17 гадоў
Кандыдат ад PiS Караль Наўроцкі расказаў, як ён гадуе сына жонкі, якога тая нарадзіла да шлюбу, і чаму ён выступае супраць абортаў.
04.12.2024 / 14:04
Гісторык Караль Наўроцкі (у цэнтры) стаў кандыдатам у прэзідэнты Польшчы ад партыі «Закон і справядлівасць» (PiS). Злева — ягоная жонка Марта, справа — сын Даніэль. Фота: Jakub Porzycki / Anadolu via Getty Images
Кандыдат у прэзідэнты Польшчы ад PiS Караль Наўроцкі доўгі час пазбягаў выказванняў на светапоглядныя тэмы, такія, як легалізацыя абортаў. Аднак у панядзелак, 2 снежня, падчас сустрэчы з прыхільнікамі ў Бельска-Бялай заявіў, што ён «за жыццё». «Мяне і мая асабістая гісторыя да гэтага абавязвае», — сказаў ён. І прызнаўся, што выхоўвае сына сваёй жонкі, якая зацяжарыла ад іншага мужчыны яшчэ непаўналетняй.
«Я — тата выдатнага сына, Даніэля, яму 21 год», — цытуе палітыка польскі партал Fakt.pl. «Моцна люблю яго і не ўяўляю свайго жыцця без яго», — сказаў Наўроцкі.
«Мы ў сям’і ясна разумеем, што Даніэль жыве, таму што яго мама была псіхалагічна ўстойлівая, самаадданая і гатовая — хоць яна была зусім юная тады — нарадзіць яго і выбраць жыццё» — падкрэсліў палітык.
Гэтая сямейная гісторыя, кажа Наўроцкі, дадаткова абавязвае да пазіцыі «за жыццё», да непрыняцця абортаў.
Дзевяць гадоў таму партыя «Закон і справядлівасць» (PiS), галоўная апазіцыйная сіла Польшчы, нечакана вылучыла ў прэзідэнты малавядомага юрыста Анджэя Дуду. Ход аказаўся ўдалы, малады палітык спадабаўся выбарцам. Яго перамога на выбарах праклала дарогу да перамогі партыі і на парламенцкіх выбарах 2015 года. А Дуда выявіўся паспяховым прэзідэнтам, яго пераабралі на другі тэрмін. Па Канстытуцыі балатавацца ў трэці раз ён не можа.
На гэты раз PiS дзейнічае аналагічна. Партыя вылучыла ў якасці свайго кандыдата ў прэзідэнты 41-гадовага гісторыка. Наўроцкі — беспартыйны, але чалавек кансерватыўных поглядаў, яго пазіцыі ў асноўным супадаюць з праграмнымі палажэннямі гэтай партыі.
На выбарах 2025 года яго асноўным апанентам стане, хутчэй за ўсё, Рафал Тшаскоўскі, дзеючы прэзідэнт — гэта значыць, мэр Варшавы. Ён кандыдат ад цэнтрысцкага альянса «Грамадзянская кааліцыя», які ў сваю чаргу ёсць ядром урадавай кааліцыі.
Апрача Тшаскоўскага і Наўроцкага, пра намер стаць кандыдатамі ў прэзідэнты заявілі пяць іншых палітыкаў, а цягам бліжэйшых тыдняў могуць з’явіцца яшчэ адзін ці два прэтэндэнты. Мяркуючы па цяперашнім узроўні падтрымкі, усе яны маюць мала шанцаў трапіць у другі тур.
Прэзідэнцкія выбары адбудуцца ў маі 2025 года.