ŠI-ahienty zamieniać prahramy: hiendyrektar Microsoft pradkazvaje revalucyju ŭ karystańni kampjutarami
Ludzi buduć movaj tłumačyć štučnamu intelektu zadačy, jon budzie vykonvać. Heta źmienić i zadačy prahramistaŭ.
26.12.2024 / 23:09
Fota: Alighayoor / Wikimedia Commons
Na jutub-kanale Matthew Berman hienieralny dyrektar Microsoft Saćja Nadeła (Satya Nadella) padzialiŭsia svaimi prahnozami nakont budučyni prahramnaha zabieśpiačeńnia. Źmieny čakajucca kałasalnyja.
Kaniec tradycyjnych dadatkaŭ
Ciapier kampanii stvarajuć asobnyja dadatki, zvanyja SaaS (Software as a Service — prahramnaje zabieśpiačeńnie jak pasłuha). Heta vobłačnyja servisy, dzie zamiest zahruzki prahramy na kampjutar karystalnik atrymlivaje dostup da jaje praź internet-braŭzer.
Kožnaja prahrama maje karystalnicki interfiejs, bazu danych i «biznes-łohiku»: nabor praviłaŭ, jakija vyznačajuć, što mienavita robić prahrama. Naprykład, u sistemie prodažaŭ łohika moža aŭtamatyčna adpraŭlać napamin pry spaźnieńni płaciažu.
Saćja Nadeła prahnazuje, što hetyja aŭtanomnyja prahramy i interfiejsy źniknuć. Na jaho dumku, toje, jak my siońnia karystajemsia prahramnym zabieśpiačeńniem, — uvachod u roznyja veb-prahramy ci mabilnyja dadatki — chutka budzie zamieniena zusim inšym padychodam.
ŠI-ahienty jak novaja realnaść
Budučynia budzie hruntavacca na ŠI-ahientach — intelektualnych prahramnych rašeńniach, jakija samastojna vykonvajuć zadačy bieź nieabchodnaści śpiecyjalizavanaha interfiejsu.
U tradycyjnym SaaS karystalnik uzajemadziejničaje z «tonkim słojem» interfiejsu, što ŭzajemadziejničaje z bazaj danych praz CRUD (create, read, update, destroy — stvaryć, pračytać, abnavić, źniščyć).
Nadeła tłumačyć, što ŠI-ahienty zmohuć niepasredna pracavać z bazami danych. A kali ahient moža čytać, abnaŭlać i vykonvać łahičnyja zadačy ŭ bazach danych, tady patreba ŭ asobnych dadatkach źnikaje.
Videaviadučy pierafrazavaŭ heta nastupnym čynam: «Kali vy možacie prosta skazać štučnamu intelektu: «Znajdzi danyja pra piać najlepšych klijentaŭ i dašli im elektronnyja listy», vam bolš nie daviadziecca adkryvać roznyja ekrany ci prahramy».
Takim čynam, ŠI pierajmaje na siabie biznes-łohiku, značna skaračajučy patrebu ŭ tradycyjnych karystalnickich interfiejsach.
Novyja mahčymaści i vykliki dla IT-industryi
Nadeła adznačaje, što Microsoft Copilot stanie arhanizacyjnym płastom dla ŠI. Śpiecyjalizavanyja prahramy, takija jak Excel i Word, pieratvoracca ŭ ŠI-ahientaŭ, jakimi budzie kiravać Copilot.
«Vy navat možacie skazać: «Navošta mnie Excel?»
Siońnia Excel źjaŭlajecca instrumientam dla arhanizacyi danych, vyličeńniaŭ i stvareńnia dyjahram. Ale z dapamohaj ŠI, jaki razumieje vaš zapyt, možna budzie abyścisia bieź niepasrednaj pracy ŭ Excel.
Naprykład, zamiest pracy ź sietkaj danych vy prosta paviedamlajecie ŠI, što vam treba: «Zrabi prahnoz prodažaŭ na pieršy kvartał» ci «Dašli list našym piaci najlepšym klijentam».
Štučny intelekt aŭtamatyčna piša nieabchodny kod, naprykład, na Python, i vykonvaje zadaču.
Nastupstvy pašyreńnia ŠI-ahientaŭ
Z prahnozaŭ Nadeły vynikaje, što pašyreńnie ŠI-ahientaŭ vykliča značnyja źmieny:
- Zaniapad tradycyjnych UI-dadatkaŭ (Dyzajn User Interface (UI) zaklučajecca ŭ stvareńni vizualna pryvabnych i zručnych dla karystalnika interfiejsaŭ dla prahramnych dadatkaŭ). Mnohija prahramy straciać aktualnaść, kali ŠI zmoža vykonvać zadačy praz bazy danych i API (Application Programming Interfaces — interfiejsy prahramavańnia dadatkaŭ — «masty», jakija dazvalajuć roznym prahramnym dadatkaŭ uzajemadziejničać pamiž saboj).
- Novyja patrabavańni da prahramistaŭ. Tradycyjnaja raspracoŭka prahram budzie skaročanaja, a navyki kiravańnia ŠI-ahientami stanuć bolš zapatrabavanymi.
- Adaptacyja kampanij da novych technałohij. Biznes pavinien budzie pierajści da AI-native rašeńniaŭ, kab zastavacca kankurentazdolnym.
Dla zvyčajnych karystalnikaŭ hetyja źmieny aznačajuć značnaje spraščeńnie: zamiest vyvučeńnia składanych instrumientaŭ dastatkova budzie prosta pahavaryć sa svaim ŠI-ahientam albo nabrać instrukcyju prostaj movaj.
Źjaviŭsia partał pa historyi Biełarusi z AI-asistentam i 3D-madelami
Štučny intelekt ChatGPT o1 pačaŭ padmanvać svaich raspracoŭščykaŭ
Kampanija, jakaja stvaryła ChatGPT, uvajšła ŭ vajskovy biznes
ŠI-porna pačynaje vyciaśniać zvyčajnaje. «Onlifanz» pieratvarajecca ŭ płatformu dypfejkaŭ