Premjer Hrenłandyi zajaviŭ pra imknieńnie krainy da niezaležnaści
Premjer-ministr Hrenłandyi Mute Ehiede ŭ svajoj navahodniaj pramovie padkreśliŭ žadańnie Hrenłandyi ŭmacoŭvać suviazi ź inšymi krainami i samastojna vyznačać svaju budučyniu, piša Reuters.
04.01.2025 / 08:47
Hrenłandyja. Fota: freepik.com
Kiraŭnik hrenłandskaha ŭrada adznačyŭ, što supracoŭnictva z Danijaj nie zabiaśpiečyła jahonaj krainie poŭnaj roŭnaści:
«Para likvidavać pieraškody, jakija možna nazvać kajdanami kałanijalizmu, i ruchacca napierad», — zajaviŭ Ehiede.
Rašeńnie ab niezaležnaści, pa jahonych słovach, pavinien pryniać narod Hrenłandyi, adnak terminy mahčymaha hałasavańnia palityk nie nazvaŭ.
«Nastaŭ čas, kab my sami zrabili krok i vyznačyli svaju budučyniu, u tym liku ŭ dačynieńni da taho, z kim my budziem ciesna supracoŭničać i chto budzie našymi handlovymi partniorami», — skazaŭ Mute Ehiede.
Ruch za niezaležnaść u Hrenłandyi ŭzmacniŭsia ŭ apošnija hady, u tym liku praz vykryćcio niepravamiernych dziejańniaŭ Danii ŭ XX stahodździ, uklučajučy prymusovy kantrol naradžalnaści ŭ 1960-ch.
Raniej abrany prezident ZŠA Donald Tramp zajaviŭ, što ZŠA pavinny kupić Hrenłandyju. Ehiede tady kateharyčna adkazaŭ: «Vostraŭ nie pradajecca».
Hrenłandyja — najbujniejšy ŭ śviecie vostraŭ z nasielnictvam kala 60 tysiač čałaviek, bolšaja častka ź jakich — eskimosy-inuity. Vostraŭ šmat hadoŭ byŭ kałonijaj Danii, ale ŭ 1979 hodzie atrymaŭ samakiravańnie i ŭłasny parłamient. U 2009 hodzie pahadnieńnie pamiž Danijaj i Hrenłandyjaj paćvierdziła prava vostrava na niezaležnaść, ale tolki praz paśpiachovaje praviadzieńnie refierendumu.
Danija ŭzmacniaje abaronu Hrenłandyi. Tramp niadaŭna znoŭ zahavaryŭ pra žadańnie nabyć jaje
Biełaruska pierajechała ŭ Hrenłandyju, kab pracavać architektarkaj. Jak jano tam?