«Chacieŭ pradać nieruchomaść i źjechać ad maci za miažu». Novyja detali apošnich dzion žyćcia syna Jarmošynaj
Padrabiaznaści siamiejnaj dramy eks-staršyni Centrvybarkama Lidzii Jarmošynaj — simvała falsifikacyj vybaraŭ i skradzienaj budučyni Biełarusi — maksimalna ščyra raskazvaje siabar jaje syna Alaksieja.
09.01.2025 / 07:00
Alaksiej u studzieni 2017 hoda. Fota: fejsbuk
U bazie danych pamierłych žycharoŭ Biełarusi ŭ Alaksieja Jarmošyna, jaki pajšoŭ z žyćcia ŭ 2017 hodzie va ŭzroście 39 hadoŭ, pryčynaj śmierci paznačany kod R99. Jon abaznačaje «inšyja niedakładna paznačanyja i nieŭdakładnienyja pryčyny śmierci». Takaja paznaka zvyčajna śviedčyć pra toje, što pravodziłasia ŭskryćcio cieła, ale jano nie dazvoliła vyśvietlić dakładnuju pryčynu śmierci.
Vakoł śmierci Alaksieja Jarmošyna chodzić šmat lehiendaŭ i padajucca roznyja viersii. Adnyja siabry kazali pra naturalnyja pryčyny: prablemy sa zdaroŭjem. Inšyja ludzi namiakali na suicyd: Jarmošyn vielmi ciažka pieražyvaŭ śmierć svajho stryječnaha brata i blizkaha siabra Vadzima Kapuścina, jaki raźbiŭsia ŭ aŭtakatastrofie. Ahučvalisia namioki i na hvałtoŭnuju śmierć, ale kankretnych dokazaŭ hetamu nie pryvodziłasia. Zrešty, žaleznych paćviardžeńniaŭ nivodnaj z hetych viersij niama — kali znajšli cieła, jano ŭžo było ŭ stadyi raskładańnia, što ŭskładniła pracu sudmiedekśpiertaŭ. Chavali Alaksieja Jarmošyna ŭ zakrytaj trunie.
Blizki siabar Alaksieja, jaki źviazaŭsia z redakcyjaj «Našaj Nivy» i paprasiŭ zachavać jaho ananimnaść, kaža, što jamu «nadakučyła čytać roznyja kazki pra Alaksieja». Mienavita tamu Maksim (imia źmienienaje) vyrašyŭ raskazać viadomyja jamu detali žyćcia Jarmošyna — eks-prakurora Frunzienskaha rajona Minska, a paśla — advakata Minskaj abłasnoj śpiecyjalizavanaj jurydyčnaj kansultacyi №2. Raniej jon, jak i mnohija, zachoŭvaŭ maŭčańnie, bo infarmacyju zahadali nie raznosić, pahražajučy nastupstvami z boku Lidzii Jarmošynaj: «A Loša ž maryŭ, što pra jaho adnojčy napišuć knihu, dyk chaj choć u ŚMI».
Alaksiej Jarmošyn naradziŭsia ŭ 1977 hodzie. Jon ros u Kalininhradzie, dzie jaho maci Lidzija Jarmošyna atrymała jurydyčnuju adukacyju i zastałasia pracavać na miascovych pradpryjemstvach, a paśla ŭ prakuratury. Kali siamiejnaje žyćcio razvaliłasia ŭščent, jana razam z 10-hadovym synam viarnułasia ŭ Biełaruś i ŭładkavałasia ŭ jurydyčny adździeł Babrujskaha harvykankama. Tam jana atrymała pryznačeńnie ŭ Centralnuju vybarčuju kamisiju i ŭrešcie pierajechała ŭ Minsk. Alaksieju tady było 19 hadoŭ.
Maksim nie vieryć u naturalnuju pryčynu śmierci Alaksieja Jarmošyna, bo da apošniaha dnia toj «pracavaŭ, chadziŭ u kafe, vypivaŭ». A voś stresaŭ u jaho chapała — najpierš praz kanflikty z maci i niervovuju pracu:
«Jaho maci była despatyčnaja ŭ adnosinach da jaho. Lubiła, kab joj u rot hladzieli, nie davała synu i kroku stupić, nie dazvalała mieć stasunki z tymi, z kim jon chacieŭ. Jon ros u nielubovi, tamu što maci vielmi žorstkaja była — jak vartaŭnik na zonie. Jana pastajanna im manipulavała i šantažavała, kali treba było tak, jak jana choča. A šantažavać było čym, tamu što ŭ Lošy było niamała kasiakoŭ».
Maksim tłumačyć, što maje na ŭvazie prakurorskuju pracu Jarmošyna. Padčas jaje «ni za što pasadziŭ niekatorych ludziej — prosta za zorački na pahonach».
«Za dva tydni da śmierci Loša jeździŭ u carkvu na spoviedź. U jaho była isteryka: jon płakaŭ, kazaŭ, što jamu pa načach śniacca tyja ludzi, jakich jon pasadziŭ, nazyvaŭ ich «kryvavymi chłopčykami», — raskazvaje siabar.
Darečy, z prakuratury Jarmošynu daviałosia pajści praz skandał — jaho złavili na atrymańni chabaru. Z dapamohaj maci historyju ŭdałosia zamiać, i jon pierajšoŭ u advakaty.
«Kali jon staŭ na bok abarony, u jaho ŭ hałavie adbyłasia transfarmacyja. Plus jon narešcie zrazumieŭ i pačuŭ, jak inšyja ludzi adhukajucca pra ich siamju», — zhadvaje Maksim.
Čytajcie taksama:
Syn Jarmošynaj pieradaje vitańnie z Haahi
Syn Jarmošynaj u majcy «Ja lublu mamin boršč» FOTAFAKT
Alaksiej Jarmošyn z maci
Siabar Alaksieja śćviardžaje, što stasunki pamiž Lidzijaj Jarmošynaj i synam apošnija hady jaho žyćcia byli maksimalna naciahnutyja.
«Ale najmahutniejšy kanflikt vybuchnuŭ, kali Jarmošyna daviedałasia, što Loša choča pradać nieruchomaść, jakuju maci jamu dabudoŭvała, i źjechać za miažu. Kab pačać žyćcio ŭ novaj krainie, jamu patrebnyja byli hrošy. Jon prosta chacieŭ źbiehčy ad maci, ź jakoj, jak jon sam kazaŭ, byŭ u kontrach», — raskazvaje Maksim.
Admietna, što dla siamji Jarmošynych historyja davoli typovaja. Hetaksama Lidzija paśla škoły ŭciakała z Babrujska pastupać va ŭniviersitet u Kalininhrad — aby być dalej ad despatyčnaha baćki-vajskoŭca.
Maksim dadaje, što Jarmošyna nie ŭchvalała, što syn pačaŭ siabravać ź ludźmi «nie toj palityki», supraćlehłymi kołu znosin maci. Alaksiej žyŭ u stanie piermanientnaha stresu i svarak.
Da hetaha dadałasia trahičnaja hibiel stryječnaha brata, adzinaha blizkaha jamu čałavieka.
«Jašče Loša pakutavaŭ na narkalepsiju (zachvorvańnie niervovaj sistemy, dla jakoha charakternyja parušeńni ŭ pracesie snu i pieryjadzie niaspańnia, halucynacyi — NN). Unačy jon nie moh zasnuć, rubiŭsia ŭ tančyki. A dniom pačynaŭ zasynać prosta padčas razmovy.
Kab karektavać hety stan, u ich doma stajała śpiecyjalnaja kisłarodnaja kamiera, u jakoj jon moh zasynać. U balnicu jaho nie chacieli kłaści, kab nichto nie daviedaŭsia pra zachvorvańnie.
Ja razumieju, čamu jamu było tak drenna: u im zmahałasia toje, na čym jon byŭ vychavany, i toje, z čym jon sutyknuŭsia ŭ realnym žyćci. Ad hetaha jon chacieŭ źjechać. Ale nie atrymałasia. I mienavita tamu jaho nie stała», — upeŭnieny siabar.
Lidzija i Alaksiej Jarmošyny
Miortvaje cieła Alaksieja paśla śmierci pralažała ŭ kvatery niekalki dzion. Jaho pačali šukać tolki tady, kali jon mieŭsia sustrakacca z klijentam, ale nie pryjechaŭ.
«Leta, vysokaja tempieratura za aknom, a jon jašče i važyŭ bolš za sto kiłahramaŭ… Možacie sabie ŭjavić, što tam užo było pieradadziena sudovym ekśpiertam. Tamu i kod taki paznačany ŭ pryčynie śmierci. Škada, što ŭ toj dzień ja nie byŭ pobač, tak by, moža, zmoh jaho vyratavać», — padsumoŭvaje Maksim.
Pachavańnie Jarmošyna. Fota: «Radyjo Svaboda»
Jarmošyna: Pretendenty ŭ 2020 — vyradki. A ja ŭratavała krainu ad hramadzianskaj vajny
Historyja ŭźlotu babrujskaj jurystki Lidzii Jarmošynaj
«Ja syšła, jak sychodziać mužyki». Praviły žyćcia Lidzii Jarmošynaj