Wizz Air admoviŭ biełaruscy z polskim prajaznym dakumientam u pasadcy na rejs na Kipr
Čytačka telehram-kanała Dzik Pic płanavała palacieć na Kipr kampanijaj Wizz Air, a ŭ vyniku straciła bolš za 1700 złotych (410 dołaraŭ). Voś jak jano było, piša Devby.io.
09.01.2025 / 19:56
Što zdaryłasia
— Vylet mieŭsia adbycca 10 kastryčnika — z Hdańska ŭ Łarnaku, — raskazała dziaŭčyna. — Ja płanavała pabačycca tam z baćkami: jany nie zmahli zapisacca praź vizavy centr, kab atrymać vizu ŭ Polšču. Ale zmahli atrymać vizu na Kipr.
Moj tata skinuŭ mnie spasyłku, dzie apisvałasia situacyja ź biełaruskaj, jakuju nie puścili na bort praz polski prajazny dakumient. Ja asabliva nie pierajmałasia, bo pračytała, što heta Wizz Air dapuściŭ pamyłku. Plus vyvučyła ŭsie dakumienty ab prajaznym dakumiencie, i što pry najaŭnaści statusu rezidenta Jeŭrasajuza viza na Kipr mnie nie patrebnaja.
Z dakumientaŭ u mianie byŭ polski prajazny dakumient, jaki ja atrymała ŭ vieraśni 2024 (ja ŭžo paśpieła źlotać pa im u Amsterdam z KLM i ŭ Kapienhahien z Wizz Air i Ryanair). I jašče — karta rezydenta długoterminowego UE (karta doŭhaterminovaha rezidenta ES).
Z avijakampanijaj da vyletu ja nie źviazvałasia. Ale kali rabiła anłajn-čekin za 24 hadziny da vyletu, to prahrama Wizz Air vydała paviedamleńnie: pakolki moj prajazny vydadzieny ŭ Polščy, a hramadzianstva — Biełarusi, to mnie varta padyści na stojku rehistracyi dla čekinu.
Ale pakolki anłajn-čekin prajšoŭ paśpiachova, mnie vydali pasadačny tałon, ja niejak praihnaravała hetaje paviedamleńnie. Pryjechała nastupnaha dnia ŭ aeraport, prajšła praz ramki z pasadačnym tałonam, vyrašyła, što ŭsio akiej, i pajšła dalej.
Prajšła kantrol, dzie mianie spytali, kudy ja laču, i znoŭ ža skazali, što ŭsio ŭ paradku. Choć dadali, što pieršy raz sutykajucca z polskim prajaznym dakumientam.
Potym ja kala hadziny čakała vyletu kala hiejta (Wizz Air dasłaŭ SMS, što rejs spaźniajecca). Kali abviaścili pasadku, to adrazu pajšła da hiejta. Pakazała svoj dakumient i pasadačny tałon.
Supracoŭnik na stojcy skazaŭ, što ŭdakładnić pa maim dakumiencie, a pa viartańni paviedamiŭ, što mnie treba padyści da jaho kalehi. I voś tam dziaŭčyna skazała, što, na žal, jany nie mohuć mianie pasadzić na rejs, bo hety dakumient nie pasuje dla palotu na Kipr.
Ja adkryła na telefonie dakumienty ab prajaznym dakumiencie i staronku ambasady Kipra, dzie było napisana: z residence permits issued by Schengen member states viza na Kipr nie patrebnaja.
Dziaŭčyna vietliva skazała, što patelefanuje kiraŭnicy. Adnak paźniej mnie skazali, što puskać mianie nie chočuć, bo ja nie padyšła na stojku rehistracyi, i jany nie viedajuć, ci puściać mianie pamiežniki Łarnaki.
Ja prapanavała patelefanavać prosta ciapier, bo da vyletu zastavałasia jašče 30 chvilin, zhodna z paviedamleńniem pra zatrymku. Ale mnie adkazali, što heta pamyłka sistemy. Samalot vylataje ŭžo ciapier, i času telefanavać ni ŭ kaho niama.
Za hety čas usich pasažyraŭ puścili na bort, a mnie prapanavali abmianiać kvitok na nastupny rejs i prosta padyści na stojku pierad vyletam.
Sproba numar dva
— Ja tak i zrabiła: abmianiała kvitok, a pa fakcie kupiła novy, choć i sa źnižkaj. Vylet byŭ z Varšavy nastupnaha dnia, a 7 ranicy (reč u tym, što nastupny rejs z Hdańska byŭ tolki praz 2 dni, u toj ža termin, što i moj zvarotny bilet).
Ja adrazu pajechała na vakzał, kupiła kvitok da Varšavy. Pryjechała ŭ aeraport, a 4-j ranicy, adrazu padyšła na stojku rehistracyi.
Mnie skazali, što z dakumientami ŭ mianie ŭsio dobra, i adpravili prachodzić usie kantroli. Ja paprasiła pierapravieryć, raskazała pra situacyju ŭ Hdańsku. Maładzion pajšoŭ kansultavacca sa staršym pa źmienie. Potym da jaho zaprasili i mianie.
Tam mnie dosyć chutka skazali, što ryzykavać jany nie chočuć. Bo kali mianie puściać na rejs, a mnie niamožna lacieć, to Wizz Air aštrafujuć na tysiačy jeŭra. A kali mianie nie puściać, to vypłaciać tolki kampiensacyju cany kvitkoŭ — 1300 złotych (313 dołaraŭ).
Pryčyna, ź jakoj mianie nie puścili ŭ hety raz, była ŭ tym, što raz u mianie zvyčajny prajazny dakumient, to mnie patrebnaja viza. Kali b u mianie byŭ prajazny dakumient uciekača, tady b viza mnie nie spatrebiłasia.
Ja pakazvała staršamu pa źmienie ŭ aeraporcie staronku pra vizavyja patrabavańni Kipra, dzie skazana, što z rezidenctvam Jeŭrasajuza viza nie patrebnaja. Ale nijakija maje pierakanańni nie padziejničali.
Taksama staršy pa źmienie niekalki razoŭ kamuści telefanavaŭ i pytaŭsia: «Tut znoŭ hety prajazny dakumient, my ž ź im nie puskajem, jak i ŭ tym vypadku, praŭda?»
Plus za čas majoj hutarki da jaho padychodzili try razy — udakładnić, ci možna puścić pasažyraŭ z prajaznym dakumientam. Bolš za ŭsio mianie ŭraziła, jak jon adkazvaŭ: «Kudy laciać? Teneryfe? Teneryfe možna. Heta na Kipr niamožna».
U vyniku ŭ mianie skłałasia ŭražańnie, što ŭ ich asabliva nie hladziać na tvaje dakumienty i ich nabor. Kali jość prajazny dakumient i niama vizy, to lacieć niamožna. Byŭ by pašpart i DNŽ, tady b viza była nie patrebnaja.
Fakt taho, što polski prajazny dakumient pracuje jak pašpart u vypadku pierasiačeńnia miežaŭ, składana danieści. Tamu, niadoŭha pasmutkavaŭšy, ja pamčała nazad na vakzał i adrazu kupiła kvitok nazad da Hdańska.
Ci atrymałasia damahčysia kampiensacyi
— Ja stvaryła dva rekviesty ŭ techpadtrymku. Adzin — pra kampiensacyju kvitkoŭ z nahody denied boarding, i druhi — pra kampietentnaść supracoŭnikaŭ service complaints.
Adkaz ad Wizz Air pryjšoŭ praź miesiac paśla taho, jak jany zakryli moj rekviest, i ja znoŭ im napisała. Tam było skazana, što «pasažyr niasie adkaznaść za najaŭnaść usich nieabchodnych dakumientaŭ dla pajezdki ŭ poŭnaj adpaviednaści z patrabavańniami i praviłami krain, pamiž jakimi ažyćciaŭlajecca pieralot. Kali heta nie vykonvajecca, to našyja pradstaŭniki ŭ aeraporcie pakidajuć za saboj prava admović vam u pasadcy na bort». A taksama, što ŭ takich vypadkach kampiensacyja ŭ adpaviednaści z rehłamientam 261/2004 nie vypłačvajecca.
Što adkazała ambasada Kipra
Akramia taho, ja napisała ŭ ambasadu Kipra — daviedacca, ci možna z maimi dakumientami lacieć na Kipr bieź vizy?
Adkaz byŭ takim:
«U vypadku hramadzian Biełarusi, jakija nie majuć dziejnaha pašparta i vykarystoŭvajuć tolki polski prajazny dakumient, my nie rekamiendujem padarožža ŭ Respubliku Kipr. Na dadzieny momant u nas niama kančatkovaha adkazu kiprskich uładaŭ, jaki paćviardžaje, što takoje padarožža moža prajści biez prablem. U suviazi z hetym, pakul my nie atrymajem takoha paćvierdžańnia, raim nie ryzykavać kuplaj avijakvitkoŭ».
Bolš ja ŭ Wizz Air nie pisała, choć chacieła b viarnuć hrošy za kvitki. Kali b u pieršy raz mnie nie skazali, što ŭsio dobra, treba tolki patelefanavać ad stojki, to ja b nie vydatkavała jašče 450 złotych (108 dołaraŭ) na kvitki da Varšavy i nazad, kab daviedacca, što reč usio ž taki ŭ prajaznym dakumiencie.
U cełym, prajazny dakumient pracuje. Maje paloty pa šenhienie nie vyklikali pytańniaŭ, i ŭ jaho taksama staviać vizy. Adnak pa-za šenhienskaj zonaj pačynajucca pytańni.
Polšča praciahnuła dla biełarusaŭ atrymańnie prajaznoha dakumienta pa sproščanaj schiemie
Adbyŭsia pieršy vypadak vydačy pašparta inšaziemca biełarusu ŭ Šviecyi
Važnyja źmieny dla biełarusaŭ Polščy: prajazny dakumient pryznali ekvivalentam pašparta