Polšča vyjšła ŭ lidary pa vydatkach na abaronu siarod krain NATA
Bolš za 20 krain — siabraŭ NATA — dasiahnuli mety ŭ 2% vydatkaŭ ad svajho VUP na abaronu ŭ 2024 hodzie. U lidary vyjšła Polšča: kali ŭ 2014 hodzie jana traciła na abaronu 1,88% VUP, to ciapier 4,12%, piša «Radyjo Svaboda».
10.01.2025 / 20:18
Fota: freepik.com
Značny rost adbyŭsia i ŭ Estonii, jakaja zajmaje ciapier druhoje miesca ŭ aljansie — z 1,93% dziesiać hadoŭ tamu estoncy vydatkoŭvajuć na abaronu ŭžo 3,43%.
Złučanyja Štaty, jakija byli vidavočnym lidaram dziesiać hadoŭ tamu z pakazčykam 3,71%, ciapier vydatkoŭvajuć 3,38% i apuścilisia ŭ rejtynhu na treci radok. Darečy, ZŠA — adzinaja kraina Paŭnočnaatłantyčnaha aljansu, dzie vydatki na nacyjanalnuju abaronu adnosna vałavoha ŭnutranaha praduktu za 10 hadoŭ źmienšylisia.
Značny rost prykmietny ŭ Łatvii. Vychad z 0,94% u 2014 hodzie na 3,15% letaś padniaŭ krainu na 4-je miesca. Pavialičyli svaje vydatki taksama Hrecyja i Litva — da 3,08% i 2,85% adpaviedna.
Usie hetyja krainy majuć pakazčyki vyšejšyja za siarednija, jakija ŭ 2014 hodzie, na pačatak rasijskaj ahresii va Ukrainie, składali 2,58%, a ciapier, paśla amal troch hadoŭ z pačatku poŭnamaštabnaha napadu, roŭnyja 2,71%.
Inšyja krainy majuć ličby nižejšyja za siarednija pa aljansie. Pry hetym vydatki pavialičyli ŭsie, akramia Charvatyi, jakaja praciahvaje pryznačać na abarončyja mety 1,81% VUP.
Najnižejšyja ličby ŭ Ispanii. Jana vydatkoŭvaje tolki 1,28% VUP.
9 studzienia na sustrečy na amierykanskaj bazie ŭ niamieckim Ramštajnie ministry abarony krain NATA abmierkavali prapanovu abranaha prezidenta ZŠA Donalda Trampa pavysić vydatki na abaronu da 5%.
Praŭda, niekatoryja ministry zajavili, što zdolnaść krain-udzielnic NATA vykonvać pastaŭlenyja abarončyja zadačy važniejšaja za vydatki adnosna VUP. U pryvatnaści, ministr abarony Hiermanii Barys Pistoryus adznačyŭ, što ličby nie majuć vialikaj značnaści.
«Dva adsotki mocnaha VUP mohuć być vialikim unioskam, a try z pałovaj adsotki słaboha VUP — vielmi małym», — adznačyŭ jon.
Donald Tramp ličyć, što Jeŭropa ŭnosić mizernuju dolu hrošaj u paraŭnańni z tym, što ŭnosić ZŠA. Na hety momant vydatki ZŠA sapraŭdy składajuć 60% ahulnych vydatkaŭ NATA.
Ale ministr abarony Estonii Chana Peŭkur adznačyŭ, što ŭ takim vypadku Złučanyja Štaty pavinny pakazać prykład inšym i pieršymi vydatkavać na abaronu 5% svajho VUP.
U toj ža čas ministr abarony Łatvii Andrys Spruds adznačyŭ, što ciapierašni ŭniosak Łatvii ŭ 3,4% vyraście praz hod da 3,7%, a potym dojdzie i da 4%.
«My pavinny pakłaści kaniec hetaj vajnie». Tramp raspavioŭ ab padrychtoŭcy sustrečy z Pucinym
Čamu Tramp zahavaryŭ pra Hrenłandyju?
ZŠA «niezaŭvažna» pastavili va Ukrainu šmat zbroi jašče da pačatku kanfliktu z Rasijaj — Blinkien
Hienieralny sakratar NATO paraiŭ Zialenskamu mienš krytykavać Šolca