Čamu Tramp zahavaryŭ pra Hrenłandyju?

Da dyskusii adnosna prapanovy Donalda Trampa kupić Hrenłandyju dałučyŭsia brytanski žurnalist i piśmieńnik, dypłamatyčny ahladalnik The Times Rodžer Bojz (Roger Boyes).

U svajoj kałoncy jon źviartaje ŭvahu, što cikavaść da vostrava prajaŭlaje Kitaj, jaki bačyć jaho častkaj svajho Palarnaha šoŭkavaha šlachu, važnym prypynkam dla sudoŭ, jakija buduć vykarystoŭvać rastavańnie arktyčnych ildoŭ, kab uzmacnić handal pamiž Azijaj i Zachadam.

Kab supraćstajać namieram Kitaja, Tramp choča kupić Hrenłandyju.

Ideja ab pierachodzie Hrenłandyi pad ściah ZŠA nie novaja. Paśla Druhoj suśvietnaj vajny prezident Hary Trumen taksama razhladaŭ pakupku Hrenłandyi, kab zaścierahčy ZŠA ad savieckaj pahrozy. Ździełka tady nie adbyłasia, ale ZŠA pabudavali sietku vajskovych baz, uklučajučy bazu «Tule», jakaja stała klučavym punktam rańniaha papiaredžańnia ab rakietnych atakach.

Paśla zakančeńnia chałodnaj vajny amierykanskaja prysutnaść na vostravie skaraciłasia. Miascovyja žychary stracili pracoŭnyja miescy i hrošy, ale nie sumavali pa amierykancach, uspaminajučy šum samalotaŭ i takija incydenty, jak katastrofa B-52 z čatyrma vadarodnymi bombami ŭ 1968 hodzie.

Datčanie nastojliva patrabavali, kab usie zatanułyja bomby i apramienieny lod byli spakavanyja i adpraŭlenyja nazad u ZŠA dla demantažu. U advarotnym vypadku Danija zakryje bazu ŭ Tule. ZŠA nieachvotna pahadzilisia.

Hrenłandyja i novyja hieapalityčnyja realii

Rodžer Bojz adznačaje, što ciapier śviet źmianiŭsia dla ZŠA, Danii i hrenłandcaŭ.

Z taho času, jak Tramp pieramoh na vybarach, Kitaj pavialičyŭ vajennuju aktyŭnaść, pravioŭ najbujniejšyja vajenna-marskija vučeńni, uzmacniŭ kibieršpijanaž i raspracoŭki novych vidaŭ uzbrajeńniaŭ. Heta stvaraje pahrozu, ź jakoj ZŠA treba spraŭlacca. Kupla Hrenłandyi ci chacia b pavieličeńnie ŭpłyvu ŭ rehijonie moža stać častkaj stratehii supraćdziejańnia Kitaju.

Žurnalist źviartaje ŭvahu na stratehičnuju važnaść vostrava. Rastavańnie ldoŭ robić arktyčnyja resursy, takija, jak nikiel i kobalt, bolš dastupnymi. Hetyja materyjały krytyčna važnyja dla vytvorčaści batarej, mikraelektroniki i ŭzbrajeńniaŭ. Kantrol nad Hrenłandyjaj dazvolić ZŠA źmienšyć zaležnaść ad Kitaja ŭ pastaŭkach hetych redkich mietałaŭ.

Staryja kryŭdy

Na pohlad ahladalnika The Times, Tramp, imavierna, raźličvaje, što zmoža zrabić vostraŭ bolš kvitniejučym z dapamohaj inviestycyj ZŠA. U takim vypadku dla miascovych žycharoŭ šopinh-uikend u Ńju-Jorku stanie takim ža dastupnym, jakim jon staŭ dla siaredniaha kłasa Isłandyi.

Chacia Danija subsiduje Hrenłandyju, miascovyja žychary ličać, što heta supravadžajecca zališnim umiašańniem, zamaskavanym pad kłopat. Aŭtar zaŭvažaje, što hrenłandcy ŭsprymajuć datčan jak napyšlivych kałanizataraŭ. Adnoj z krynic napružanaści stała historyja z prymusovaj kantracepcyjaj, jakuju dackija ŭłady naviazvali padletkam ź liku karennych hrenłandcaŭ u 1970-ch hadach.

Danija nie žadaje hublać tvar i terytoryju. Karol Frederyk navat pavialičyŭ vyjavu biełaha miadźviedzia na hierbie.

Mahčymyja scenaryi

Tramp moža zrabić staŭku na refierendum ab niezaležnaści Hrenłandyi, jaki, mahčyma, adbudziecca ŭ krasaviku. Kali hrenłandcy pierakanaŭča prahałasujuć za niezaležnaść, heta moža adkryć novuju dyskusiju: ci moža vostraŭ, atrymaŭšy bolš paŭnamoctvaŭ u vyznačeńni svajoj zamiežnaj palityki, u niejkaj formie zblizicca z ZŠA.

Heta byŭ by mocny sihnał dla Kitaja, a dla Trampa ŭvasableńniem łozunhu Make America Great Again u realnaści.

Bojz spadziajecca, što ŭ atačeńni novaabranaha prezidenta znojducca ludzi, jakija źviernuć uvahu, što taki krok vyklikaje raskoł u NATA. Heta ryzykoŭna, bo adpaviadaje daŭniaj mary Pucina — asłabić zachodni aljans, unieści razład siarod jaho členaŭ.

Bolš realistyčnym varyjantam, na pohlad aŭtara, moža być damoŭlenaść z Danijaj i Hrenłandyjaj ab nadańni ZŠA bolšaha ŭpłyvu na zachodnija terytoryi vostrava, jakija najbolš blizkija da ŭźbiarežža Złučanych Štataŭ. Heta mahło b prynieści Hrenłandyi inviestycyi, ZŠA — biaśpieku, a Danii — umacavańnie adnosin z Vašynhtonam.

• 9
• 0
• 2
• 4
• 2
• 0
• 0
• 0