«Rasija nikoli nas nie padmanvała, u adroźnieńnie ad Ukrainy». Słavacki premjer pahardliva vykazaŭsia pra Zialenskaha i ŭkraincaŭ
Premjer-ministr Słavakii Robiert Fica zajaviŭ, što prezident Ukrainy Uładzimir Zialenski nibyta jeździć pa Jeŭropie, kab «žabravać» i «šantažavać inšych». Jon skazaŭ heta padčas vystupleńnia na pasiadžeńni parłamienckaha kamiteta 10 studzienia, piša «Jeŭrapiejskaja praŭda».
11.01.2025 / 23:14
Uładzimir Zialenski vitajecca z Robiertam Fica na samicie Jeŭrasajuza ŭ Brusieli. 17 kastryčnika 2024 hoda. Fota: AP Photo/Omar Havana
«Jon [Zialenski] chodzić pa toj Jeŭropie, prosta žabruje i šantažuje inšych, prosić hrošaj. Heta prosta pavinna spynicca», — zajaviŭ słavacki premjer.
Pasiadžeńnie parłamienckaha kamiteta było sklikana słavackaj apazicyjaj, jakaja patrabavała ad Fica tłumačeńniaŭ adnosna jaho sustrečy z kiraŭnikom Rasii Uładzimiram Pucinym u Maskvie, a taksama infarmacyi pra dalejšyja kroki Słavakii ŭ suviazi sa spynieńniem tranzitu rasijskaha hazu praz Ukrainu.
Fica raskazaŭ, što ŭ pytańni tranzitu hazu z Ukrainy na terytoryju Słavakii było padrychtavana dva varyjanty rašeńniaŭ, jakija nibyta byli ŭzhodnienyja premjer-ministram Dzianisam Šmyhalom. Adnym ź ich pavinna była stać damoŭlenaść pamiž Rasijaj i Azierbajdžanam, kab azierbajdžanski haz pastupaŭ u Słavakiju. Ale, sa słoŭ Fica, Zialenski sarvaŭ hetuju damoŭlenaść.
Druhim varyjantam była prapanova słavackaj kampanii SPP stvaryć daččynuju kampaniju na rasijska-ŭkrainskaj miažy, kab užo nibyta słavacki haz z Rasii transpartavaŭsia ŭ Słavakiju praz Ukrainu.
Fica nazvaŭ prezidenta Ukrainy nienadziejnym i skazaŭ, što časam jon «syty im pa horła». U toj ža čas jon zajaviŭ, što Rasija zaŭsiody była nadziejnym partnioram, kali havorka išła pra pastaŭki enierhanośbitaŭ.
«Rasija nikoli nas nie padmanvała, u adroźnieńnie ad Ukrainy. Ja pamiataju situacyju ŭ 2009 hodzie, kali ja byŭ va Ukrainie, kali ja źviarnuŭsia da ŭkrainskaj premjer-ministarki Cimašenki z prośbaj dać nam z reziervuaraŭ, jakija jany majuć u zachodniaj častcy Ukrainy, trochi hazu. Ja atrymaŭ adkaz, što mianie pasłali da djabła. Heta typovyja ŭkraincy», — paskardziŭsia Fica.
Tym časam prezident Słavakii Pieter Pielehryni zajaviŭ, što admaŭlajecca jechać z aficyjnym vizitam u Kijeŭ z-za taho, što Ukraina spyniła tranzit rasijskaha hazu. Akramia taho, u suviazi z prypynieńniem tranzitu hazu Fica ahučyŭ śpis pahroz na adras Kijeva, siarod jakich — prymianieńnie vieta na rašeńni ES pa Ukrainie.
Premjer Słavakii paśla pajezdki da Pucina pajechaŭ adpačyvać u šykoŭny vjetnamski hatel
Rasija straciła tranzit hazu praz Ukrainu ŭ Jeŭropu. Chto prajhraŭ i što budzie dalej?
Łukašenka zaprasiŭ słavackaha premjera Fica ŭ Biełaruś
Kiravać Aŭstryjaj najchutčej stanie ŭltrapravaja i prakramloŭskaja partyja, zasnavanaja nacystami