Kiravać Aŭstryjaj najchutčej stanie ŭltrapravaja i prakramloŭskaja partyja, zasnavanaja nacystami

Fiederalny prezident Aŭstryi Alaksandr Van der Bielen abviaściŭ, što daručaje lidaru ŭltrapravaj i prakramloŭskaj «Aŭstryjskaj partyi svabody» (FPÖ) Hierbiertu Kiklu sfarmavać urad, paviedamlaje vydańnie Der Spiegel. Hetaje rašeńnie «stała pavarotnym momantam u aŭstryjskaj historyi», adznačaje vydańnie.

Libieralnaja, Sacyjał-demakratyčnaja i Kansiervatyŭnaja partyi Aŭstryi nie zdoleli damovicca ab farmavańni kaalicyjnaha ŭradu ŭ abychod «Aŭstryjskaj partyi svabody», jakaja ŭpieršyniu pieramahła na niadaŭnich parłamienckich vybarach u krainie. Hetaja niaŭdača i stała adnoj z hałoŭnych pryčyn pieradačy mandata na farmavańnie aŭstryjskaha ŭradu lidaru FPÖ Hierbiertu Kiklu, pryznajecca Van der Bielen, nazvaŭšy heta «ciažkim krokam».

Na parłamienckich vybarach u vieraśni minułaha hoda ŭltrapravaja FPÖ zaniała pieršaje miesca z vynikam u 29,2%, ale atrymanych joj miescaŭ u parłamiencie nie chapiła dla samastojnaha farmavańnia ŭrada. Inšyja partyi tady admovilisia ŭstupać z FPÖ u kaalicyju z-za «jaje radykalnaj antylibieralnaj i antyimihranckaj rytoryki, prarasijskich nastrojaŭ i nacysckich karanioŭ».

Ale ciapier najbolš vierahodnym kandydatam na rolu małodšaha partniora ŭ kaalicyi pad kiraŭnictvam «Aŭstryjskaj partyi svabody», jak daviedałasia aŭstryjskaje vydańnie Die Press, moža stać ciapierašniaja kirujučaja kansiervatyŭnaja «Aŭstryjskaja narodnaja partyja», čyj lidar Karł Niechamier učora abviaściŭ ab adstaŭcy. Na fonie hetaha aŭstryjskija studenckija abjadnańni i niaŭradavyja arhanizacyi rychtujucca da masavych pratestaŭ, kab «nie dapuścić viartańnia da ŭłady nacystaŭ».

Ultrapravaja «Aŭstryjskaja partyja svabody» (FPÖ) była zasnavana ŭ 1955 hodzie hrupaj pierakananych aŭstryjskich nacyjanał-sacyjalistaŭ i vieteranaŭ vojsk SS na čale z Antonam Rajntaleram, jaki da paražeńnia hitleraŭskaj Hiermanii ŭ Druhoj suśvietnaj uvachodziŭ u Rejchstah ad niamieckaj nacysckaj partyi NSDAP, zajmaŭ pasadu namieśnika ministra sielskaj haspadarki Treciaha Rejcha, a taksama byŭ hanarovym členam vojsk SS u zvańni bryhadenfiurara (hienierał-majora). Na praciahu historyi isnavańnia FPÖ u skład jaje kiravańnia rehularna ŭvachodzili byłyja nacysckija funkcyjaniery i vajskoŭcy.

Pavialičyć

Pavialičyć

Hierbiert Kikl, jaki ŭznačalvaje FPÖ, źjaŭlajecca zaŭziatym voraham levych libierałaŭ, nielehalnaj i zvyčajnaj imihracyi, kiraŭnictva Jeŭrasajuza, isłamu i antyrasijskich sankcyj. Kali jon byŭ ministram unutranych spraŭ Aŭstryi (2017-2019), jon prasoŭvaŭ miechanizm chutkaj departacyi na radzimu ŭciekačoŭ, jakija ździejśnili złačynstva doma ci ŭ Aŭstryi (nie kankretyzujučy, ci padpadajuć pad miechanizm jašče i palityčnyja ŭciekačy), a taksama prapanoŭvaŭ aŭstryjskamu ŭradu vyjści ź mižnarodnych pahadnieńniaŭ ab pravach čałavieka, kab jany «nie pieraškadžali jamu rabić toje, što nieabchodna pa zakonie».

U svajoj pieradvybarčaj pijar-kampanii palityk aktyŭna tyražuje łozunh «Krepaść Aŭstryja — zakrytyja miežy — harantyja biaśpieki» i vystupaje za stvareńnie «bolš adnarodnaj» aŭstryjskaj nacyi šlacham strohaha kantrolu miežaŭ i «reimihracyi» (departacyi z krainy) usich imihrantaŭ, jakija lehalizavalisia ŭ Aŭstryi, «ale nie zdoleli całkam asimilavacca».

Kikl adkryta nazyvaje siabie «narodnym kancleram» («Volkskanzler») — termin, jaki nacysty zvyčajna adnosili da Adolfa Hitlera. Jak i Hitler, Kikl vieryć u teoryi zmovy i vykarystoŭvaje ich dla prapahandy svaich palityčnych pohladaŭ.

Staršynia FPÖ, aproč inšaha, ličyć antyrasijskija sankcyi i dapamohu Ukrainie vialikaj pamyłkaj, adznačajučy, što «pastavić kryž na lubych sprobach Kijeva ŭvajści ŭ ES i pierastanie vydatkoŭvać hrošy na padtrymku ŭkraincaŭ».

Sama FPÖ jašče ŭ 2016 hodzie padpisała damovu ab supracoŭnictvie z rasijskaj partyjaj «Adzinaja Rasija», a Kikl, zajmajučy pasadu kiraŭnika MUS Aŭstryi, sprabavaŭ źniščyć hałoŭnuju kontrraźviedvalnuju słužbu krainy BVT i ihnaravaŭ najaŭnaść u krainie rasijskich špijonaŭ. 

Adnym z hałoŭnych nacyjanalnych intaresaŭ Aŭstryi, pa słovach Kikla, źjaŭlajecca rasijski haz, a siabroŭstva z Rasijaj lidar FPÖ stavić u pryjarytet aŭstryjskaj źniešniaj palityki. Prykładam dla ŭłasnaha natchnieńnia Hierbiert Kikl nazyvaje Vienhryju i jaje premjera Viktara Orbana — adnaho z samych prakramloŭskich palitykaŭ Jeŭrasajuza.

Pa infarmacyi ahienctva Reuters, Aŭstryja zastajecca samaj zaležnaj ad rasijskaha hazu krainaj ES niahledziačy na paśpiachovuju ahulnuju tendencyju Jeŭrasajuza pa admovie ad rasijskich resursaŭ. Tak, 83% ad usiaho impartavanaha Aŭstryjaj hazu ŭ lipieni pryjšło mienavita z Rasii.
Aŭstryja taksama była adnym z najbujniejšych inviestaraŭ budaŭnictva rasijskaha hazapravoda «Paŭnočny patok — 2».

Pavialičyć

Analityki i čynoŭniki ES jašče pierad parłamienckimi vybarami ŭ Aŭstryi papiaredžvali, što Hierbiert Kikl u vypadku pieramohi stanie «jašče adnym Orbanam» i pasprabuje stać fiederalnym kancleram Aŭstryi. U pierśpiektyvie kaalicyja Aŭstryi Hierbierta Kikla, Vienhryi Viktara Orbana, Słavakii Robierta Fica i Čechii Andreja Babiša (pavodle apytańniaŭ, pravapapulisckaja i prarasijskaja češskaja partyja ANO («Tak») maje ŭsie šancy pieramahčy na budučych parłamienckich vybarach u Čechii) jašče macniej budzie skoŭvać astatni Jeŭrasajuz u jaho palitycy dapamohi Ukrainie, cisku na Maskvu i praciahu jeŭraintehracyi. 

«Aŭstryjskaja partyja svabody» abiacała svaim vybarščykam «aktyŭnuju mirnuju palityku», u tym liku zamarožvańnie šmatmiljardnych vypłat Ukrainie, błakavańnie luboj dapamohi Ukrainie i jaje ŭstupleńnia ŭ ES, niedapuščeńnie stvareńnia ahulnaj armii ES, a taksama spynieńnie «varjactva sankcyj, jakija razburajuć dabrabyt samoj Aŭstryi». U adnoj ź pieradvybarčych pramovaŭ Kikl zajaviŭ, što ŭsie sankcyi suprać Rasii treba admianić.

Jak raniej analizavała «Naša Niva», prychod da ŭłady ŭ Aŭstryi Hierbierta Kikla, uličvajučy ŭsiu jahonuju prarasijskuju i antyimihracyjnuju rytoryku, moža pryvieści da bolš talerantnaha staŭleńnia krainy da režymu Łukašenki jak da sajuźnika Maskvy (siońnia Aŭstryja ŭvachodzić u top-3 bujnych inviestaraŭ u biełaruskuju ekanomiku, vystupaje suprać sankcyj i, u adroźnieńnie ad bolšaści inšych krain ES, praciahvaje supracoŭničać ź biełaruskaj Hienprakuraturaj).

Adnačasova z hetym moža adbycca paharšeńnie stanovišča biełaruskich mihrantaŭ u krainie, asabliva palityčnych. U pryvatnaści, moža być skasavanaja damoŭlenaść z Ofisam Cichanoŭskaj pra pryznańnie aŭstryjskimi ŭładami praterminavanych pašpartoŭ biełarusaŭ, całkam prybranaja mahčymaść atrymać u Aŭstryi palityčny prytułak, moža być uskładniena ŭsialakaja lehalizacyja ŭ krainie i pry hetym moža ŭzraści ryzyka departacyi biełaruskich uciekačoŭ z Aŭstryi, a taksama pašyrycca supracoŭnictva pamiž aŭstryjskimi i biełaruskimi siłavikami.

• 8
• 1
• 2
• 14
• 5
• 1
• 22
• 0