«Raniej była śmiardziučaja, roźnica kałasalnaja». Ciapier usie minčuki žyvuć z artezijanskaj vadoj — jakija ŭražańni?
Minsk narešcie pieraviali na artezijanskuju vadu. Vodhuki roznyja.
15.01.2025 / 16:39
Skrynšot videa z tyktoku
Pa tyktoku raźlaciełasia žartaŭlivaje videa, pryśviečanaje pieravodu stalicy na artezijanskuju vadu. U roliku pakazvajuć, jak minčuki pjuć jaje z kielichaŭ i vykidajuć filtry dla vady.
Ale samaje cikavaje — nie sam rolik, jaki nabraŭ amal 800 tysiač prahladaŭ, a bolš za tysiača kamientaroŭ da jaho, dzie minčuki dzielacca ŭražańniami nakont artezijanskaj vady.
Karystalniki nahadvajuć, što častka rajonaŭ Minska i raniej karystalisia artezijanskaj vadoj. Ale žychary Frunzienskaha i Maskoŭskaha rajonaŭ, jakich ciapierašnija źmieny zakranuli, raskazvajuć, što vada stała smačniejšaja:
«Ura! Na Malinaŭcy narmalnaja vada!»
«Vada sapraŭdy stała vydatnaja! Smačna i biez pachu, filtr bolš nie patrebny. Dziakuj usim datyčnym!»
«Žyviem kala Puškinskaj. Roźnica ŭ vadzie kałasalnaja. Była śmiardziučaja, skura razdražniałasia i sochnuła ad jaje. Ciapier cudoŭnaja vada!»
«Tak, ja zaŭvažyła, Malinaŭka. Učora dehustavała — smačnaja, raniej pić uvohule było niemahčyma».
Ale ž novaja vada padabajecca nie ŭsim:
«Nu kali ŭ nas na Kamiency ŭžo artezijanskaja, to lepš by była staraja — čajnik ad nakipu mienš čyściła».
«Ja z Frunzienskaha, sprabavała pakaštavać. Usio adno, mnie zdajecca, čymści addaje, ci ja prydzirajusia».
«Paviercie, lepš praź filtr usio adno prahaniać [vadu]. U Sierabrancy daŭno ŭžo takaja vada, ale papjecie dni try jaje — i pačynaje baleć žyvot».
«Tak-tak-tak, u siastry na Karła Libkniechta navat kava nie maskiruje smurod vady».
Šmat chto z kamientataraŭ stavicca da novaŭviadzieńnia skieptyčna. Ludzi nahadvajuć — jakaja b ni była vada, na šlachu da karystalnikaŭ jana prachodzić praz tyja ž truby, što i raniejšaja vada. Taksama ŭ artezijanskaj vadzie bahata vapny — adsiul i nakip na čajnikach, i ślady, naprykład, na škle ŭ dušavoj.
Vyhladaje, što rasstavacca ź filtram pakul rana:
«Pačuli zvon i pabiehli vykidać:) Prajekt na stadyi razhortvańnia, im jašče hadoŭ 10 da poŭnaha zapuska pracavać».
«Z krana ź filtram usio roŭna miakčejšaja vada… Nu a sa zvyčajnaha krana choć nie śmiardzić užo! Ahułam dla mianie ničoha nie źmianiłasia, usio roŭna filtravanuju budu pić (Kamiennaja horka, chełoŭ)».
Minsk aficyjna pieraviali na artezijanskuju vadu
«Dyjamient, try razy vymyła prachody». Pravadnica čyhunki pryviała ŭ zachapleńnie pasažyraŭ