Ułaśnik «Vitalura» sprabuje vyratavać sietku, ale vyhladaje, što kampanija pierastanie zajmacca roźničnym handlem
Raniej «Naša Niva» padrabiazna aśviatlała šerah vyklikaŭ, jakija paŭstali pierad sietkaj retejłu «Vitalur». Daŭhi, ekanamičny spad i «ŭkaz ab cenach» pastavili kampaniju na miažu bankructva. Na fonie niehatyŭnych čakańniaŭ pastaŭščyki spynili adhruzki i kampanija vymušanaja była ich supakojvać, vydaŭšy płan pierastać być retejłam.
U paniadziełak, 26 śniežnia, ułaśnik «Vitalura» Alaksandr Jacuk źbiraŭ pastaŭščykoŭ kampanii na sustreču, kab pierakanać ich adnavić pastaŭki — mnohija admovilisia praciahvać pastaŭki na fonie niehatyŭnych navin ab kampanii.
U kampanij-pastaŭščykoŭ na fonie niehatyŭnych navin ab kampanii ŭźnikli sumnievy ŭ metazhodnaści supracoŭnictva.
Čytajcie: «Vitalur» moža ŭ chutkim časie zbankrutavać. Niekatoryja z retejłu tolki i čakajuć
Doŭh kampanii pierad pastaŭščykami kožny miesiac raście, što adlustravana ŭ danych ab prymusovych sudovych vytvorčaściach.
U toj ža čas isnyja pastaŭščyki, jakija nie majuć pretenzij da «Vitalura», atrymlivajuć apłaty za pastaŭki praz vykanaŭčy podpis nataryusa [zhodna z ukazam № 366 ad 11 žniŭnia 2011, nataryusy mohuć rabić vykanaŭčyja nadpisy ab spahnańni zapazyčanaści na patrabavańnie jurydyčnych asob. Kali inšy bok pryznaje najaŭnaść zapazyčanaści i jaje spraviadlivaść, to hrošy śpisvajucca z rachunku], u abychod čarhi inšych kredytoraŭ, jakija bjucca za daŭhi ŭ sudach.
Na fonie šmatlikich pytańniaŭ da kampanii i admovy supracoŭničać «Vitalur» pravioŭ sustreču z pastaŭščykami. Na joj prysutničaŭ taksama hiendyrektar «Santa Retejł» Alaksandr Čujko.
Aśviatlali jaje žurnalisty łukašenkaŭskich srodkaŭ prapahandy.
«Pamiž «Vitaluram» i «Santa Retejł» dasiahnuta pahadnieńnie pa zaklučeńni ŭhody, jakaja praduhledžvaje pieradaču ŭ arendu ŭsich handlovych abjektaŭ sietki «Vitalur». Metaj i ŭmovaj uhody źjaŭlajecca poŭnaje pahašeńnie debitorskaj zapazyčanaści pierad pastaŭščykami. Na siońnia my majem vysoki ŭzrovień padrychtavanaści. Uzhodnieny klučavyja paramietry, u tym liku abjom płoščaŭ, jakija zdajucca ŭ arendu. Heta 84 handlovyja abjekty. U ramkach biahučaj uhody jurasoby abjektaŭ nieruchomaj majomaści, jakija pieradajucca ŭ arendu, zastanucca raniejšymi. Nie razhladajucca nijakija pytańni, źviazanyja ź likvidacyjaj abo bankructvam», — cytuje hiendyrektara «Vitalura» Alaksandra Kaleśnikava adna z łukašenkaŭskich haziet.
Prastaŭnik «Santy» na sustrečy byŭ, možna mierkavać, svajho rodu harantam słoŭ pradstaŭnikoŭ «Vitalura» dla prysutnych.
«U lubym vypadku dla pakryćcia doŭhu ŭ ramkach uhody praduhledžany prodaž abstalavańnia ŭnutry handlovych abjektaŭ, heta prykładna dźvie traciny ahulnaha doŭhu kampanii, adbudziecca taksama prodaž rešty tavaru», — taksama było skazana vitaluraŭcami.
Takim čynam, sa słoŭ dyrektara «Vitalura» vyciakaje, što, faktyčna, kampanija z retejlera pieraŭtvarajecca ŭ ranćje i pieradaje biznes «Santa Retejł».
«Budziem sprabavać praciahvać zarablać na opcie, admaŭlacca ad roźnicy. A taksama na arendzie. Heta dobry scenar. Jość taksama pierapracoŭka ryby. Z roźnicaj nie atrymałasia, prablem šmat», — pryznaŭ surazmoŭca «Našaj Nivy» ź liku rabotnikaŭ kampanii.
Ale farmuloŭki kiraŭnictva «Vitalura» havorać pra toje, što damova z «Santaj» jašče nie padpisanaja. Pa našaj infarmacyi, Alaksandr Jacuk šukaje i inšyja varyjanty vyratavać kampaniju.
Tak, jak stała viadoma «Našaj Nivie», adzin z varyjantaŭ — pradać budynki, kab raźličycca z daŭhami, ale zachavać u ich roźničnyja kramy «Vitalur». Atrymlivajecca, krama budzie praciahvać pracavać tam ža, ale ŭžo ŭ čužym budynku i za arendu.
Pa takoj madeli ŭ Jacuka ŭžo pracuje niekalki kramaŭ, ale tyja kankurenty ź liku sietak, jakija mahli b vykupić pamiaškańni «Vitalura», na takuju madel u bolšych masštabach nie zhodnyja.
U lubym razie, los kampanii vyrašycca ŭ chutkim časie. Kali jana sapraŭdy addaść pamiaškańni «Sancie», to ŭ bujnoha «Jeŭraopta» źjavicca vialiki kankurent.
Pradstaŭniki biznes-kołaŭ padkreślivajuć, što Alaksandr Jacuk maje reputacyju čałavieka, «jaki zrabiŭ siabie sam», ale «darma vyrašyŭ, što kali jon dobry ŭ opcie, to sto pracentaŭ budzie dobry i ŭ roźnicy».
Asnoŭnaja prablema 27-hadovaj kampanii ŭ tym, što «Vitalur» uziaŭ praźmierna ambitny stratehičny kurs na admovu ad arendy pamiaškańniaŭ dla svaich kramaŭ i pabudovy ŭłasnych płoščaŭ.
«Vitalur» razharnuŭ vializnaje budaŭnictva, ale zdaryŭsia 2020-ty i 2022-i: represii, napad na Ukrainu i sankcyi ŭ adkaz. U vyniku banki skaracili finansavańnie budoŭlaŭ.
Dla praciahu budaŭnictva «Vitalur» pačaŭ karystacca schiemaj svajho rodu karotkaha samakredytavańnia, zatrymlivajučy płaciažy pastaŭščykam. Zrabić usio «pryhoža» nie atrymałasia, i prablemy stali narastać kamiakom.
Dajšło da niepłaciažoŭ: da prykładu, u listapadzie 2022-ha pastaŭščyki padali zajavy na spahnańnie z «Vitalura» praz sud 4,8 młn rubloŭ, u śniežni (pa stanie na 15.12) — 1,5 młn rubloŭ.
Dakładnaj spravazdačnaści «Vitalura» za 2022-hi ŭ dostupie jašče niama, ale i 2020-ty, i 2021 hod sietka spracoŭvała ŭ minus — 19,7 i 14,9 młn rubloŭ adpaviedna.
Ad abaznanych surazmoŭcaŭ «Našaj Nivie» stała viadoma, što ŭ struktury doŭhu kampanii ciapier pieravažajuć karotkija daŭhi — blizka da 90%. Prykładna taki ž pracent byŭ i ŭ 2021-m (na sumu 376 młn rubloŭ).
«Naša Niva» — bastyjon biełaruščyny
PADTRYMAĆ«Tania, my z taboj!» Ułady zapuścili fłešmob u padtrymku žančyny ŭ čyrvona-zialonym VIDEA27
Kamientary