U Mahilovie źbirajuć podpisy suprać pierajmienavańnia płoščy Ardžanikidze ŭ honar Hieorhija Kaniskaha
Pietycyja suprać pierajmienavańnia płoščy Ardžanikidze ŭ płošču imia Hieorhija Kaniskaha, źjaviłasia na sajcie petitions.by.
«My vystupajem suprać pierajmienavańnia płoščy Ardžanikidze ŭ Mahilovie ŭ honar Hieorhija Kaniskaha — havorycca ŭ pietycyi. —
Asoba Kaniskaha ŭžo ŭšanavanaja ŭ naźvie susiedniaj vulicy Archirejski Vał Kaniskaha. Niadaŭna ž pastaŭleny pomnik śviacicielu znachodzicca nie na płoščy, na vulicy Karła Marksa.
Kudy bolš hetaja nazva pasavała b dla trapiecapadobnaj płoščy nasuprać archijepiskapskaha pałaca, stvoranaj na ŭzor płoščy Kapitolija ŭ Rymie, bo pałac i kompleks uvohule źjaviŭsia na zakaz Kaniskaha.
Što tyčycca płoščy Ardžanikidze, to ŭžo nie pieršy raz prapanujecca adradžać u nazvach płoščaŭ i skvieraŭ histaryčnuju tapanimiku Mahilova.
Hety kvartał pamiž vulicami Bołdzina i Kamsamolskaj uźnik tolki dziakujučy tamu, što było źniesiena druhoje koła ŭmacavańniaŭ horada — Blizki vał. Prapanujem tak i nazvać płošču — płošča Blizki Vał.
Dla prykładu, u Minsku jość vulica Haradski Vał, a taksama płošča Stary Aeraport, jakija adlustroŭvajuć roznyja histaryčnyja abjekty, što siońnia ŭžo całkam źnikli z haradskoj prastory».
Pietycyja była stvoranaja 27 vieraśnia. Zbor podpisaŭ pad joj budzie prachodzić da 4 kastryčnika.
U 2016 hodzie ź inicyjatyvaj ab nadańni płoščy imia Kaniskaha ŭžo vystupali, jak zajaŭlałasia, pravasłaŭnyja vierniki. Namiery źmianić nazvu płoščy jany arhumientavali tym, što saviecki dziejač Hryhoryj (Siarho) Ardžanikidze nikoli nie byŭ u Mahilovie i ŭdzielničaŭ u represijach.
Siem hadoŭ tamu prapanova vyklikała palemiku. Jana vyjaviła nieadnaznačnaje staŭleńnie da Kaniskaha jak carkoŭnaha dziejača i histaryčnaj asoby.
Łatuška: Ryžankoŭ maryć stać prezidentam Biełarusi i nienavidzić Łukašenku. Jon nie projdzie detektar chłuśni6
Kamientary