Z Łatvii vysłali 82-hadovaha vajskovaha piensijaniera, jaki pracavaŭ na Rasiju
12 studzienia z Łatvii na terytoryju rasijskaj Pskoŭskaj vobłaści departavali vajskovaha piensijaniera, šmathadovaha staršyniu Łatvijska-rasijskaj asacyjacyi supracoŭnictva 82-hadovaha Barysa Katkova. Pierad hetym jon byŭ zatrymany supracoŭnikami pamiežnaj achovy Łatvii, a jašče raniej atrymaŭ rasparadžeńnie ad imia ministra ŭnutranych spraŭ pakinuć Łatviju, piša Delfi.lv.
13.01.2024 / 18:17
Barys Katkoŭ paśla vydvareńnia z Łatvii daje intervju rasijskim prapahandysckim ŚMI. Skrynšot ź videa
Pavodle słoŭ samoha Katkova, rasparadžeńnie pakinuć Łatviju jon atrymaŭ 10 studzienia. U rašeńni, padpisanym ministram unutranych spraŭ Łatvii, havaryłasia, što Katkoŭ ujaŭlaje pahrozu dla biaśpieki dziaržavy.
Ranicaj 12 studzienia da jaho pryjechali pamiežniki, dali hadzinu na zbory, kab zatym vyvieźci na miažu.
Jak vyśvietliŭ partał Delfi, pastanovu ab uniasieńni Katkova ŭ śpis niepažadanych u Łatvii pierson pryniaŭ kiraŭnik MUS Rychards Kazłoŭskis na padstavie zaklučeńnia Słužby dziaržbiaśpieki, jakaja atrymała infarmacyju ab dziejnaści Katkova, što pahražaje dziaržaŭnaj biaśpiecy. Było ŭličana jaho doŭhaje supracoŭnictva z pradstaŭnikami Rasii i prakramloŭskimi arhanizacyjami ŭ Łatvii.
Barys Katkoŭ pryjechaŭ u Łatviju ŭ 1966 hodzie. Spačatku jon pracavaŭ u vajskovym kamisaryjacie ŭ horadzie Cesis, a paśla ŭ Daŭhaŭpiłsie. Pajšoŭ na piensiju ŭ zvańni pałkoŭnika ŭ 1991 hodzie.
Pašpart niehramadzianina Łatvii Katkoŭ atrymaŭ u 1998 hodzie, a ŭ 2000-m uziaŭ rasijskaje hramadzianstva. Pastajanny DNŽ Łatvii jon atrymaŭ pavodle zakona, jaki straciŭ siłu jašče ŭ 2003 hodzie, a pad apošnija papraŭki da Zakona ab imihracyi, bolš strohija da asob z rasijskim pašpartam, jon nie trapiŭ.
Katkoŭ byŭ viadomy ŭ Łatvii jak aktyŭny prarasijski dziejač. U 1999 hodzie jon uznačaliŭ Łatvijska-rasijskuju asacyjacyju supracoŭnictva, ideja stvareńnia jakoj pachodziła ad rasijskaj Dziarždumy. U 2004 hodzie asacyjacyja zaklučyła damovu ab supracoŭnictvie z partyjaj «Adzinaja Rasija», sam Katkoŭ publična vykazvaŭsia ŭ padtrymku Pucina.
Praŭda, u listapadzie minułaha hoda Katkoŭ tłumačyŭ, što hramadzianstva RF jon pryniaŭ, maŭlaŭ, dla taho, kab jeździć da svajakoŭ u Rasiju, dzie ŭ jaho była nieruchomaść, ale ciapier jaho ničoha z hetaj krainaj nie źviazvaje. Jahonaja žonka-piensijanierka, paŭnaletnija syn i dačka — usie niehramadzianie Łatvii.
Pavodle papravak u łatvijski Zakon ab imihracyi, pryniatych Siejmam u 2022 hodzie hodzie, praduhledžvałasia, što hramadzianie Rasii, jakija žyvuć u Łatvii, da 1 vieraśnia 2023 hoda pavinny byli prajści ekzamien na viedańnie łatyšskaj movy, a kali chto nie zdaŭ, to paŭtorny ekzamien — da 30 listapada 2023 hoda.
Tyja ž, chto patrabavańni novaha zakona prosta praihnaravaŭ, z 2 vieraśnia 2023 hoda hublali DNŽ. Jany taksama pazbaŭlajucca sacyjalnych harantyj u Łatvii, nie mohuć lehalna pracavać i atrymlivać miedycynskaje absłuhoŭvańnie. Paśla hetaha Upraŭleńnie pa spravach hramadzianstva i mihracyi rassyłała im listy z prośbaj pakinuć krainu na praciahu 90 dzion.
Vierahodna, siarod tych, chto praihnaravaŭ patrabavańni novaha zakona, byŭ i Barys Katkoŭ.
Čytajcie taksama:
Deputaty łatvijskaha Siejma zaklikali nie puskać biełaruskich i rasijskich spartoŭcaŭ na Alimpijadu
Łatvija budzie ŭmacoŭvać miažu ź Biełaruśsiu
Što stała z rasijskimi pomnikami, jakija impieryja staviła ŭ nacyjanalnych pravincyjach