Усяго патроху

У тыктоку знайшлі яшчэ адну 100% прыкмету беларусаў

Пра тое, што беларусы чакаюць зялёнае на святлафоры нават уначы ў пустым горадзе, а таксама гатовыя несці смецце да сметніцы хоць кіламетр, ходзяць легенды. А што яшчэ?

Скрыншот відэа ў тыктоку

У тыкток-акаўнце нарачанскага санаторыя «Прыазёрны» з’явілася відэа, на якое, мабыць, натхнілі наведвальнікі. Падпісаны ролік так: «Калі надышоў час высяляцца, але ты з Беларусі». У роліку дзяўчына збіраецца пакінуць нумар, але не можа. Яна бачыць беспарадак, здымае абутак і кідаецца прыбіраць усё ў пакоі: выкідвае смецце, засцілае ложак, акуратна складае ручнікі.

За суткі ролік набраў каля 200 тысяч праглядаў і 8300 лайкаў. Шмат хто прызнаўся ў каментарыях, што сапраўды пазнаў сябе. Пакінуць непрыбраны нумар для беларусаў псіхалагічна складана. Нехта нават пыл імкнецца працерці ў канцы адпачынку.

@priozerniy_san Признавайтесь, кто узнал себя?#отдыхвбеларуси #нарочь #санаторийприозерный #юмор ♬ оригинальный звук - санаторий Приозерный, Беларусь

У каментары прыйшлі і тыя, хто працуе ў гатэлях. Яны адзначылі, што звычка гасцей запраўляць ложак не такая карысная, як можа падацца. Бо пакаёўцы ўсё роўна прыйдзецца здымаць пасцелю — яе ж неабходна памыць пасля кожнага пастаяльца.

Але хуценька высветлілася, што хапае сярод беларусаў і тых, хто ў гатэлях перад ад’ездам здымае пасцельную бялізну і акуратна складае яе стосам.

Каментары да артыкула