Гэты плывучы гатэль (па-навуковаму дэбаркадар) добра вядомы ўсім жыхарам Гомеля: атмасфернае судна прышвартаванае ў «акваторыі» санаторыя «Прыдняпроўскі». Два паверхі, некалькі дзясяткаў нумароў, адкрытыя палубы, неверагодная прырода вакол. Але цяпер гаспадар вырашыў яго прадаць, піша «Анлайнер».
«Змяніліся жыццёвыя абставіны, таму вырашыў прадаць горача любімы мною дэбаркадар,— тлумачыць сваё рашэнне прадпрымальнік. — Зрэшты, са здзелкай не спяшаюся, таму аддаваць яго за бесцань не буду: калі не прадасца ў гэтым годзе, нічога страшнага — працягну свой бізнэс і паспрабую ў наступным. Балазе, усе працэсы адладжаныя і настроеныя».
Пры гэтым стары гаспадар гатовы інфармацыйна і тэхнічна падтрымаць новага ўласніка. А таксама аддаць яму ў дадатак усе сацсеткі: у інстаграме ў яго амаль 20 000 падпісчыкаў, ёсць і свой сайт.
«Тэрміновага рамонту судна не патрабуе, з ім усё ў парадку. Я перыядычна нешта падпраўляю, але гэта, хутчэй, з любові да мастацтва, чым дзеля вострай неабходнасці. Мне хочацца, каб усё было прыгожа, дыхтоўна, але ў той жа час каб захоўваўся гістарычны дух», — гаворыць гаспадар карабля.
Паводле яго, толькі за мінулы тыдзень на караблі адпачылі чалавек з 250 (гэта з улікам таго, што цяпер у працы толькі 20 нумароў на другім паверсе). На наступным — штодня будзе адпачываць 34-35 чалавек. Цяперашні сезон вельмі добры.
Пры жаданні дэбаркадар можна перапрафіляваць і пад нешта іншае, на 300 «квадратаў» можна ўвасабляць любыя ідэі. Камунікацыі на судне цэнтральныя, вада прыходзіць і сыходзіць праз санаторый, праблемы толькі з зімовым ацяпленнем. Але на гэты выпадак побач з караблём абсталяваны жылы домік-кантэйнер.
За свой карабель гамяльчук разлічвае атрымаць $190 000 па курсе.
Каментары