Prapahandystka ANT Natalla Stelmach źmianiła imia na Naci Ryšna i zarablaje ŭ Mieksicy na šamanach i narkatyčnych hrybach
Raniej Natalla Stelmach viała na ANT rubryku «Dvoje iz Dvorca», dzie z zachapleńniem raspaviadała pra budni Łukašenki. Ale ŭ Mieksicy eks-prapahandystka znajšła bolš cikavy zaniatak, źviazany z narkatyčnymi hrybami i dziŭnymi žabami.
15.01.2025 / 19:11
Natalla Stelmach
Natalla była adnoj z zorak łukašenkaŭskaha pułu. Na ANT jana pracavała bolš za 10 hadoŭ, joj było pryjemna zdymać prapahandysckija roliki i krucicca ŭ kołach namienkłatury.
Jana sprabavała ramantyzavać hetych ludziej u svajoj prahramie «Dvoje iz Dvorca», kazała Łukašenku: «Hramadstva čakaje, kali vy ŭžo pryznajecie Krym».
Natalla addana rychtavała repartažy z vybaraŭ-2020 i refierendumu ŭ 2022 hodzie. Ale ž u chutkim časie paśla jaho raptam zvolniłasia i razam sa svaim partnioram pierajechała ŭ Mieksiku.
U novaj krainie dziaŭčyna zasnavała kampaniju, jakaja zajmajecca «retrytami budučyni» — spravaj davoli ekzatyčnaj (u Biełarusi b za taki biznes dali šmat hadoŭ turmy). Natalla prapanoŭvaje achvotnym za hrošy schadzić da «daśviedčanaha šamana», kab pad jaho kiraŭnictvam spažyvać narkatyčnyja hryby (u ich jość psiłacybin), a taksama narkatyčnaje rečyva, jakoje zdabyvajuć z žab Bufa Alvaryus.
Darečy, na sajcie Natalli paznačana, što razabracca ŭ niuansach mieksikanskich zakonaŭ ab narkotykach davoli składana, bo ich šmat, i byvaje, što jany supiarečać adzin adnamu na dziaržaŭnym, rehijanalnym i municypalnym uzroŭniach.
Patencyjalnym klijentam rajać viedać ab tym, što ŭ Mieksicy aficyjna hryby, jakija źmiaščajuć psiłacybin, źjaŭlajucca niezakonnymi. Ale ž śćviardžajecca, što isnujuć relihijnyja vyklučeńni: «Tamu ŭłady nie mohuć pieraśledvać vas za vykarystańnie psiłacybinavych hryboŭ u tradycyjnych duchoŭnych praktykach abo cyrymonijach».
Patencyjnym udzielnikam abiacajuć hłybokuju ŭnutranuju transfarmacyju, vyzvaleńnie ad emacyjnych błokaŭ i traŭm, a taksama ačyščeńnie ad nazapašanaha stresu i napružańnia.
Jak cikava skłaŭsia los. Tearetyčna Natalla mahła b ciapier zapisvać prymusovyja videa z byłymi ŭdzielnikami pratestaŭ. Ale zamiest hetaha robić intervju z udzielnikami retrytu, jakija raspaviadajuć pra svaje pryhody ŭ śnie i najavie paśla ŭžyvańnia narkatyčnych rečyvaŭ.
Ciapier Natalla Stelmach nazyvaje sabie Naci Ryšna. Voś što pra jaje minułaje pišuć na sajcie, dzie maładaja žančyna razam z mužam rekłamuje pasłuhi ich hiest-chausa:
— Naci vielmi rada vitać vas u svajoj prastory! Na svaim dośviedzie jana pryjšła da razumieńnia taho, što lačeńnie mahčyma tolki ŭ atmaśfiery poŭnaha davieru. Jana rodam z Uschodniaj Jeŭropy, dzie materyjalny dabrabyt u bolšaści vypadkaŭ cenicca značna bolš, čym duchoŭnaje raźvićcio. U toj čas jana mieła paśpiachovuju karjeru teležurnalista. Joj było 33 hady, kali jana adčuła klič miedycyny i adpraviłasia ŭ Mieksiku na cyrymoniju Ajauaski, navat nie viedajučy da kanca, što heta takoje, ale adčuvajučy padśviadomuju ciahu da jaje.
Naci i Nik Ryšna. Fota z sajta tripaneer.com
Muž Natalli pradstaŭlajecca jak Nik Ryšna. Pra jaho paviedamlajecca, što mužčyna byŭ psichołaham, ale adčuvaŭ, što adnoj tolki navuki niedastatkova, kab pa-sapraŭdnamu vylečyć čałaviečyja dušy. Tamu praź niekalki hadoŭ pošukaŭ jon adčuŭ paklikańnie stać šamanam.
Jakraz ciapier Nik i Naci rekłamujuć duchoŭny retryt dla par:
— Padčas hetaha retrytu vy zmožacie značna harmanizavać vašy adnosiny ŭsiaho za adzin uik-end. My stvarajem spryjalnuju atmaśfieru, u jakoj kožny z partnioraŭ moža raspaznać asablivaści i naturalnyja roli adno adnaho. Paśla hetaha ŭ vas źjavicca bolš matyvacyi dla źmieny svajho charaktaru, i vam budzie praściej papravić siabie. Tamu transfarmacyja adbudziecca značna chutčej, čym heta było mahčyma raniej.
Udzieł u takim retrycie kaštuje dla pary 1515 jeŭra. U košt uvachodzić pražyvańnie 2 dni i 3 nočy ŭ hiest-chausie, viehietaryjanskaje charčavańnie i, kaniečnie, cyrymonii z narkatyčnymi hrybami i Bufo alvarius.
Hiest-chaus Nika i Naci
Režysiorka kancertaŭ dla Łukašenki śviatkavała Novy hod i Rastvo ŭ Vialikabrytanii — šmat FOTA
«Nu kajf ža!» Kamientatarka «Biełaruś 5» Daryna Zapolskaja adpačyvaje ŭ Francyi FOTA
«Bierlin uziaty». Zakachanyja žurnalisty BT adpačyvajuć u Hiermanii FOTY