Нехта зарабіў тысячы рублёў, а кагосьці аблілі вадой: беларусы паказваюць, як калядавалі
Як сёлета калядавалі ў розных кутках Беларусі? Людзі дзеляцца досведам у тыктоку. Ёсць нават сапраўдныя гісторыі поспеху!
16.01.2025 / 08:29
Скрыншот відэа ў тыктоку
Дарэчы, трэба адзначыць, што калявалі беларусы ў розны час — адны напярэдадні Раства, іншыя — перад старым Новым годам.
Самай паспяховай можна назваць гісторыю калядавання ў Брэсце. Адна з блогерак пахвалілася, што яе дзеці накалядавалі каля 5300 рублёў, а яшчэ пяць пакетаў цукерак.
— Сказалі: «У гэтым месяцы, мама, можаш не працаваць», — смяецца жанчына.
Ролік набраў 510 тысяч праглядаў і больш за 11 тысяч лайкаў. Але не ўсе каментатары паверылі жанчыне, што такую вялікую суму было рэальна сабраць.
«Тут хаця б 10 рублёў паспрабуй накалядаваць, якія 5 тысяч?», — абурыўся адзін з каментатараў. «Вы ў Дубаі калядавалі, што столькі далі?» — пацікавіўся іншы.
Нехта выказваў прэтэнзіі да якасці падрыхтоўкі калядоўшчыкаў: «Калі да мяне прыйшлі дзеці і з тэлефона чыталі вершык у два слупкі, дык хацелася сказаць: дзеці, ідзіце па дамах, а як вывучыце, прыходзьце».
Багатую ўзнагароду, якую прынеслі дадому дзеці пасля калядак, прадэманстравала блогерка з Ганцэвічаў. Побач з неверагоднай колькасцю цукерак і шакаладак ляжаць і грошы: можна налічыць сем купюр па 100 рублёў, дзве па 20 і некалькі па 5.
І таксама шмат хто ў каментарах сумняваўся, ці магчыма гэта. Але ж былі і іншыя меркаванні. «Мы з мужам тыя самыя людзі, якія давалі чужым дзецям па 20 і 50 рублёў. Нам было не шкада, дзеці падрыхтаваліся добра», — адзначыла каментатарка і дадала, што для яе гэта магчымасць захаваць традыцыю.
Іншая тыктокерка з Ганцэвічаў паказала, як у яе пад'ездзе падрыхтаваліся людзі, якія паспелі стаміцца ад калядоўшчыкаў: на адны дзверы павесілі пакет з цукеркамі, на другія прыляпілі некалькі купюр па 5 рублёў.
Гэты ролік таксама завірусіўся і за дзень набраў каля 357 тысяч праглядаў і 9 тысяч лайкаў.
У каментарыях жанчына дадала, што ў горадзе было шмат калядоўшчыкаў — ажно чэргі былі з дзяцей і дарослых. «У гэтым годзе малайцы, шмат дзяцей было, ажно сэрца радавалася, бо летась было сумнавата. Сёлета цукерак не хапіла, бегала дакупляла, а ў мінулым годзе яны засталіся. А касцюмы якія былі, грым — клас!» — пагадзілася з ёй каментатарка.
Цудоўнае відэа з маленькімі калядоўшчыкамі зрабіла тыктокерка з Гомеля. Цікава назіраць, як з цягам часу змяняюцца вобразы дзяцей: напрыклад, побач з традыцыйнай цыганкай можна пабачыць і юнага Халка ці Чалавека-Павука.
Асабліва міла выглядае хлопчык, якому тэлефануе маці, а ён з усёй сур’ёзнасцю адказвае: «Я калядую!».
Ролік за дзень набраў каля 230 тысяч праглядаў і 11,5 тысячы лайкаў. Каментатары ў захапленні: «Цудоўнае свята. Не трэба яго забываць, я з дачкой пакуль хадзіла, дык шчокі стаміліся ўсміхацца. Людзі, дарыце адзін аднаму ўсмешку! Гэта ж так проста», «За адзін вечар столькі пазітыву ад дзяцей, што навагодняя ноч проста адпачывае», «Дзеці атрымліваюць задавальненне не столькі ад цукерак, колькі ад самога працэсу. А тыя, хто адорвае, яшчэ больш».
На іншым відэа з Гомеля калядоўшчыкі з энтузіязмам спяваюць песню «Не прадаецца хата бацькоў» гурта «Дразды». Дзіцячы запал забяспечыў 300 тысяч праглядаў і больш за 9 тысяч лайкаў. У каментарыях можна знайсці смешныя гісторыі:
«Хлопчык сказаў: «Тут яшчэ і грошы даюць, а не толькі цукеркі. Дзякуй табе, старая жанчына, жыві доўга і шчасліва». А мне ўсяго 26!».
У Слуцку калядоўшчыкі прыйшлі з баянам, а падпявалі песні Юрыя Шатунова на тэлефоне. У каментарыях рэспектуюць — і калядоўшчыкам, і іх рэпертуару.
У Давыд-Гарадку актыўна калядавалі дарослыя. Яны падабралі больш традыцыйныя касцюмы, але, канечне, былі і экзатычныя варыянты накшталт мушкецёра.
У Пінску калядавалі на Раство. Хлопцы, якія трапілі на відэа, не падрыхтавалі святочныя касцюмы, затое добра вывучылі песню пра свята.
У Мінску таксама калядавалі. Тыктокерка Лізавета Чэхаўская з сяброўкамі добра падрыхтавалася. Яна прызналася, што раней ніколі не калядавала. Але эксперымент атрымаўся ўдалы: «Усе былі рады. Хтосьці нават праслязіўся. Успамінаў маладосць і як сам калядаваў».
Блогерка, якая называе сябе «Тома з вёскі», паказала відэа, якое магло б падацца сумным. Разам с сяброўкай маладая жанчына танчыць на ганку дома і чытае калядныя вершы. Дзверы рэзка адчыняюцца і на Тамару выліваюць вядро вады. Мужчынскі голас за кадрам кажа: «Пашлі прэч, папрашайкі». Калядоўшчыцы пры гэтым рагочуць.
Гэтае відэа набрала больш за 2 мільёны праглядаў і каля 143 тысяч лайкаў. У каментарыях шмат хто абураецца паводзінамі мужчыны. Але калі паглядзець іншыя відэа тыктокеркі, дык становіцца зразумела, што здымалі вірусны ролік на ганку дома самой Тамары. А «злы мужчына», якога не бачна, хутчэй за ўсё, яе ж муж.
Не пусціць у хату калядоўніка — дрэнная прыкмета. Як і дзеля чаго калядавалі беларусы
«За два тыдні чосу — заробак мідла». Праграміст 20 гадоў працуе Дзедам Марозам
Беларусы сабралі неабходную суму грошай на калядныя падарункі дзецям палітвязняў