Ministerstva zamiežnych spraŭ Rasii spadziajecca, što tadžykskija ŭłady pry pierajmienavańni vulic u Dušanbe prysłuchajucca da mierkavańnia «vieteranaŭ». Ale ŭłady zajaŭlajuć, što pierajmienavańnie nazvaŭ vulic, jakija zastalisia z savieckich časoŭ, nie maje dačynieńnia da «nacyjanalizmu».
Ministerstva zamiežnych spraŭ Rasii zakłapočanaje pierajmienavańniem vulic i praśpiektaŭ u Dušanbe, tych, što zastalisia ŭ spadčynu z časoŭ Savieckaha Sajuza. Aficyjny pradstaŭnik ministerstva Maryja Zacharava na pres-kanfierencyi ŭ Maskvie zajaviła, što ŭ minułym hetyja vulicy zvalisia imionami hierojaŭ Vialikaj Ajčynnaj vajny, savieckich navukoŭcaŭ i dziejačaŭ kultury. Pavodle jaje słoŭ, hetaja tema šyroka abmiarkoŭvałasia i ŭ miascovych ŚMI.
«Viedaju, što hrupa viadomych historykaŭ, u pryvatnaści pradstaŭniki vieteranskich arhanizacyj i studenty, prasili zachavać raniejšyja nazvy vulic, jakija źjaŭlajucca jarkimi staronkami historyi našaha naroda. Tamu, spadziajusia, što ŭłady prysłuchajucca da mierkavańnia viadomych asob i vieteranaŭ», — dadała Zacharava.
Kiraŭnictva Kamiteta pa movie i terminałohii Tadžykistana ličyć, što pierajmienavańnie vulic i praśpiektaŭ nie źjaŭlajecca prajavaj «nacyjanalizmu» abo źniščeńniem savieckaj kultury, a adbyvajecca na asnovie narmatyŭna-pravavych patrabavańniaŭ i zakanadaŭstva krainy.
Abdurachimi Zułfanijon, načalnik upraŭleńnia Kamiteta pa movie i terminałohii Tadžykistana, 19-ha žniŭnia ŭ hutarcy z radyjo «Azadzi» nazvaŭ nieabhruntavanaj zajavu pradstaŭnika MZS Rasii ŭ pytańni pierajmienavańnia vulic i praśpiektaŭ u horadzie Dušanbe. Jon adznačyŭ, što «pierajmienavańnie vulic i praśpiektaŭ pravodzicca na asnovie zakanadaŭstva krainy. Heta nie maje dačynieńnia da nacyjanalizmu, a źjaŭlajecca prykmietaj adnaŭleńnia nacyjanalnych kaštoŭnaściaŭ tadžykskaha naroda».
Načalnik upraŭleńnia Kamiteta pa movie i terminałohii Tadžykistana skazaŭ: «ščyra kažučy, ja ničoha nie čuŭ pra zvarot vieteranaŭ i hrupy studentaŭ adnosna zachavańnia raniejšych nazvaŭ vulic i praśpiektaŭ, da nas takija dakumienty nie pastupali».
Praces pierajmienavańnia vulic, praśpiektaŭ, rajonaŭ, haradoŭ i navat abłaściej u Tadžykistanie praciahvajecca ŭžo bolš za piatnaccać hadoŭ. Za hety čas, da prykładu, Leninabadskaja vobłaść pierajmienavana ŭ Sahdyjskuju. Kujbyšaŭski rajon u Abdurachmani Džamo. U apošniaj chvali pierajmienavańniaŭ hieahrafičnaja nazva horada Čkałaŭski była pieranazvana ŭ Huliston.
Hety praces praciahvajecca i ŭ stalicy krainy. U krasaviku hetaha hoda vulica Vojkava pierajmienavana ŭ Ruchafzo, Čajkoŭskaha ŭ Nadžmidzina Abdułojeva, Panfiłava ŭ Boba Džabirava, a vulica Miru stała nazyvacca Čamanzor.
Stała viadoma aficyjnaja pryčyna śmierci Makieja, Ašurka i Tarajkoŭskaha7
Kamientary