Avakada — smačny i karysny frukt, jaki źmiaščaje bolš białkoŭ, čym usie astatnija frukty. U im taksama bahata monanienasyčanyjach tłuščaŭ, što źmianšajuć ryzyku raku i chvarob serca. Prapanujem vam try prostyja recepty z avakada, jakija dakažuć, što hety frukt jašče i moža być duža smačnym.
Huakamole
Hetaja kłasičnaja mieksikanskaja zakuska — mahčyma, samaja viadomaja strava z avakada. Huakamole možna dadavać jak harnir da lubych straŭ, a možna vykarystoŭvać jaho jak namazku na chleb ci tarcillu. Kab zrabić hetuju stravu, vam spatrebicca:
- 3 śpiełyja avakada biez skury i kostki, parezanyja na drobnyja kavałki
- pałova drobna pakryšanaj čyrvonaj cybuliny
- žmienia kinzy (jaje taksama treba drobna pašatkavać)
- sok adnaho łajma
- dadatkova: 1 pierac čyli (drobna narezany)
- Pakładzicie avakada ŭ šyrokuju płoskuju misku i raźminajcie jaho videlcam, pakul amal usio avakada nie stanie miakkim. Pakińcie niekalki bolš hrubych, ale drobnych kavałkaŭ avakada dla naležnaj tekstury huakamole.
- Dadajcie cybulu, kinzu i sok łajma, prypraŭcie sollu i čornym piercam. Pieramiašajcie, pry nieabchodnaści dadajcie bolš soku łajma. Dadajcie pierac čyli, kali vy jaho vykarystoŭvajecie. Adrazu padavajcie hatovy huakamole.
Sałata z avakada
Takuju sałatu možna pryhatavać vielmi lohka i chutka, ale jana daść adčuvańnie sytaści na doŭhi čas. Strava stanie dobrym elemientam abiedu ci viačery.
Na dźvie porcyi sałaty vam spatrebicca:
- ¼ čyrvonaj cybuliny, parezanaj na tonkija paŭkolcy
- 400 hram kansiervavanaj fasoli sortu Kanielini, pramytaj i absušanaj (možna zamianić na biełuju fasolu)
- 1 vialikaje avakada
- 100 hram pamidoraŭ čery, razrezanych na čatyry kavałki
- 20 hram śviežaha parublenaha baziliku
- sok ad ¼ limona
- pałova čajnaj łyžki aliŭkavaha aleju
- sol i śviežazmołaty čorny pierac
- Zdymicie z avakada skuru i dastańcie ź jaho kostačku. Narežcie avakada na toŭstyja kavałki.
- Pakińcie cybulu ŭ maleńkaj miscy z chałodnaj vadoj na 5 chvilin, kab palepšyć jaje smak.
- Pieramiašajcie ŭ vialikaj miscy fasolu, avakada, pamidory čery i bazilik.
- Vysušycie cybulu i dadajcie jaje da sałaty.
- Prypraŭcie sałatu limonnym sokam i alejem, pasalicie jaje i papierčycie. Pieramiašajcie sałatu i padavajcie na stoł.
Jajki z avakada
Zapiečanaje avakada nabyvaje duža bahaty i miakki smak. Źjeści takuju stravu na śniadanak — cudoŭny sposab pačać dzień. Voś što spatrebicca, kab pryhatavać dźvie porcyi jajek z avakada:
- 2 vialikija avakada chatniaj tempieratury
- 4 maleńkija jajki
- 4 čajnyja łyžki hustych viarškoŭ
- 2 pamidory čery, razrezanyja na čatyry kavałki
- 20 hram ciortaha syra čedar
- drobna parezanaje ściabło zialonaj cybuli (možna zamianić na cybulu-parej)
- 4 drobki mołataha piercu čyli
- sol i śviežazmołaty čorny pierac
- Razrežcie avakada na pałovy i dastańcie ź ich kostački. Razahrejcie duchoŭku da 200 hradusaŭ.
- Z kožnaj pałovy avakada dastańcie pa stałovaj łyžcy miakaci. Sačycie za tym, kab słoj miakaci, što zastajecca, byŭ raŭnamiernym. Možacie prypravić 4 stałovyja łyžki miakaci, što vy atrymali, limonnym sokam i aliŭkavym alejem i vykarystać ich jak namazku na tosty.
- Kab vam było zručna zapaŭniać avakada načynkaj, možacie pakłaści ich u kubak. Vaźmicie pałovu avakada, prypraŭcie jaje sollu i piercam, dadajcie ŭnutr čajnuju łyžku viarškoŭ. Vylicie źvierchu adno jajka. Na jajka pakładzicie pałovu pamidora čery, častku syru, cybuli i piercu čyli. Takim ža čynam zapoŭnicie i inšyja pałovy avakada.
- Akuratna pieramiaścicie avakada ŭ formu dla zapiakańnia, pry hetym sačycie, kab nie pralilisia jajki. Kab było zručniej, možna vykarystoŭvać formy dla zapiakańnia kieksaŭ. Vypiakajcie avakada na siaredniaj palicy ŭ duchoŭcy na praciahu 10—12 chvilin ci pakul nie pryhatujucca białki jajek. Adrazu padavajcie na stoł.
Kamientary