«Chitom budzie bčb-šot». Viadomy viciebski biznesoviec adkryŭ art-pab u Kijevie
Vital Broŭka — viadomy viciebski biznesoviec i arhanizatar kancertaŭ. Jašče niadaŭna jaho art-pab «Torvald» byŭ kultavym miescam dla horada. Paśla pratestaŭ jaho daviałosia začynić, a sam Vital źjechaŭ u Kijeŭ. I adkryŭ tam biełaruski art-pab dla tych, chto sumuje pa dranikach i rodnaj kultury.
Kali ŭ Viciebsku pačałasia pandemija, art-pab Vitala try miesiacy karmiŭ miedykaŭ na pieradavoj. Vazili abiedy ŭ abłasnuju infiekcyjnuju balnicu, adździaleńnie KT abłasnoha dyjahnastyčnaha centra, łabaratoryju, jakaja rabiła testy na kavid.
«Hatavali dla ich blizka sta porcyj štodnia. Vielmi časta ja sam razvoziŭ, potym užo padciahnulisia vałanciory, jakija stali dapamahać z dastaŭkaj», — zhadvaje Vital.
Prablemy ŭ paba pačalisia ŭ vieraśni 2020 hoda. Pryjšła pazapłanavaja kompleksnaja pravierka: Dziaržkantrol, DFR, padatkovaja, sanstancyja. Ale nijakich istotnych parušeńniaŭ nie vyjavili. Paśla była pravierka z MNS. Kali haradski adździeł ničoha nie znajšoŭ, prysłali abłasnoje ŭpraŭleńnie.
«I ŭžo jany znajšli chiby ŭ kanstruktyvie budynka, jaki znachodzicca ŭ dziaržaŭnaj ułasnaści i ŭ jakim zaŭsiody byli ŭstanovy charčavańnia. A tut niečakana akazałasia, što jon nie adpaviadaje patrabavańniam», — raskazvaje Vital.
U studzieni pab daviałosia začynić.
«U nas zaŭždy była vielmi łajalnaja aŭdytoryja. I choć užo byli tryvožnyja časy, kali nie da viasiella i zastollaŭ, ludzi sa skruchaj uspryniali navinu, što pab budzie začyniacca. Mnohija vykazvali nadzieju, što usio jašče vierniecca. I kali my raspradavali pradmiety interjeru, spadziejučysia sabrać srodki i pravieści ramont, ludzi padtrymlivali. Kazali: «Ja zabiraju častku «Torvalda», ale nie dla siabie, a dla zachoŭvańnia, jak tolki adrodzicca, viarnu nazad. A hrošy ličycie achviaravańniem na spravu».
Z hetaha momantu ja pačaŭ adčuvać pa sutnaści zabaronu na prafiesiju. Admianialisia hastrolnyja paśviedčańni na artystaŭ, kancerty jakich ja pryznačaŭ. Paźniej likvidavali i sacyjalna-kulturnuju ŭstanovu «Viciebsk dla mianie». Ja spadziavaŭsia niejkim čynam pierasiadzieć, ale kali snarady pačali razryvacca zanadta blizka, pryniaŭ rašeńnie źjechać».
U Kijeŭ Vital pierabraŭsia try miesiacy tamu. Mnohija jamu raili nie śpiašacca z adkryćciom biznesu tut: spačatku ahledziecca, zrazumieć, jak što pracuje.
«Ale kali b ja siadzieŭ na miescy, było b značna składaniej. A kali kinuŭsia ŭ spravu, i ruki, i hałava zaniatyja, psichałahična lahčej. Chacia z nula pačynać, tym bolš u čužym i vialikim horadzie… Ja nikoli nie žyŭ u miehapolisie, heta zusim nie tak, jak u Viciebsku, dzie ty viedaješ praktyčna kožnaha.
Va Ukrainie praściej dakumientalna afarmlać biznes, chutčej adbyvajucca pracedury. Ź inšaha boku, u Viciebsku ŭ mianie było bolš infarmacyi i kantaktaŭ, ja viedaŭ, kamu zadać pytańni. Va Ukrainie mnohija interpretacyi zakanadaŭstva davoli błytanyja abo supiarečlivyja ŭ zaležnaści ad taho, dzie ty šukaješ kamientaryi».
Adkryćcio paba z nula zaniało dva miesiacy. Kab paśpieć usio za hety čas, pracavali biez vychadnych i pryciahnuli ŭ dapamohu šmat siabroŭ. Kolki heta kaštavała, Vital nie ahučvaje.
«Prajekt tolki zapuskajecca, vydatki jašče praciahvajucca, — tłumačyć jon. — Zrazumieła, što ŭ Kijevie krychu daražej, ale nie ŭ razy. Usio ž taki dośvied stvareńnia miescaŭ hramadskaha charčavańnia ŭ Viciebsku ŭ mianie vialiki — byŭ nie tolki «Torvald», ale i «Bro'bar», inšyja inicyjatyvy. Dy i dostup da materyjałaŭ i abstalavańnia tut značna lepšy, čym u Biełarusi».
U kijeŭskim «Torvaldzie» niekalki załaŭ. U asnoŭnaj na scenie buduć vystupać biełaruskija muzyki, ładzicca roznyja aśvietnickija mierapryjemstvy. Adna z załaŭ — «Radziviłaŭskaja» — aformlenaja hraviurami Napaleona Ordy. Na ścienach u pabie vystava Uładzimira Ceślera. Ekspazicyi buduć pastajanna mianiać, kab pakazać tvory roznych biełaruskich mastakoŭ.
«Mnohija ź biełarusaŭ, asabliva tyja, chto źjechaŭ raniej, skardziacca, što sumujuć pa biełaruskaj ježy, pa rodnych dranikach. Maŭlaŭ, dzieruny ŭkrainskija — heta nie toje. Tamu pa mieniu startujem z dranikaŭ i inšych nacyjanalnych straŭ — na patelni, ź miasa.
Budzie i viehanskaje mieniu na asnovie fałafiela i tofu.
Napoi — našy firmovyja nastojki (višnioŭka, žuravinaŭka, chrenavucha, «Tajamnica Torvalda»), tradycyjnaje i kraftavaje piva, šyrokaja kaktejlnaja karta.
I, biezumoŭna, chit 2019 i 2020 hadoŭ — bčb-šot. Jon budzie składacca z kakosavaha siropu, žuravinaŭki, śvietłaha romu i tajamnicy», — dzielicca Vital.
Jon nie hublaje nadziei, što «Torvald» jašče adrodzicca ŭ Viciebsku.
«Ja vieru, što heta adbudziecca abaviazkova, i adbudziecca davoli chutka. I miesca budzie jašče lepšym, čym raniej. Tamu što novy kijeŭski dośvied i padtrymka hramadstva zrobiać nas bolš cikavymi i paśpiachovymi».
«Tania, my z taboj!» Ułady zapuścili fłešmob u padtrymku žančyny ŭ čyrvona-zialonym VIDEA17
Kamientary