Za 2000—4000 jeŭra znojduć rumynskich svajakoŭ i polskija karani. Jak firmy-pasiarednicy robiać biełarusam hramadzianstva ES?

Pašpart ES za 12 miesiacaŭ

Hramadzianstva luboj z krain ES daje mahčymaść žyć, pracavać i vieści biznes u Jeŭrapiejskim sajuzie. A taksama svabodna padarožničać pa ŭsioj Jeŭropie i naviedvać bieź vizy bolš za sto inšych krain. U bolšaści vypadkaŭ dla šarahovaha biełarusa atrymańnie jeŭrapiejskaha hramadzianstva — heta składany i vielmi praciahły pa časie praces.

Tym nie mienš, u internecie chapaje abjaŭ, dzie žadajučym prapanujuć atrymać hramadzianstva adnoj z krain ES pa terminach ad 12 miesiacaŭ. Miarkujučy pa kolkaści prapanoŭ, samym papularnym kirunkam źjaŭlajecca Rumynija.

Pavialičyć

Pa słovach supracoŭnikaŭ admysłovych ahienctvaŭ, chutki šlach da atrymańnia hramadzianstva Rumynii lažyć pa schiemie repatryjacyi. Jany źviartajuć uvahu na adsutnaść nieabchodnaści zdačy ispytaŭ pry nabyćci hramadzianstva.

Kab skarystacca takoj mahčymaściu, nie treba mieć u rodzie karennych rumynaŭ, dastatkova dakazać, što vašy prodki ŭ pieryjad z 1918 pa 1940 hod pražyvali na terytoryi Rumynii. U jaje skład u tyja časy ŭvachodziła Respublika Małdova, a taksama Adeskaja i Čarnavickaja vobłaści Ukrainy. 

Takim čynam nieabchodna dakumientalna dakazać, što vašyja prodki ŭ toj pieryjad pražyvali na vyšejzhadanych ziemlach. I, jak vynikaje z razmovaŭ z pasiarednikami, daviedku možna atrymać u niezaležnaści ad taho, dzie nasamreč žyli vyšy prodki kala sta hadoŭ tamu.

Adkul źjaviacca «rumyny» ŭ vašym siamiejnym drevie?

Supracoŭniki ahienctvaŭ abiacajuć praanalizavać siamiejnaje dreva i znajści svajaka, pa jakim zachavałasia mienš za ŭsio infarmacyi. Dalej jany robiać zapyt ab adnaŭleńni danych, u adkazie na jaki buduć paznačany patrebnyja terytoryi. Heta značyć, što jany znojduć prynaležnaść vašych prodkaŭ da Małdovy albo Čarnavickaj ci Adeskaj vobłaści Ukrainy. Taki «adnoŭleny» dakumient i budzie hałoŭnaj padstavaj dla taho, kab atrymać rumynskaje hramadzianstva, kažuć u ahienctvach.

Abiacajuć, što heta budzie nie prosta niejkaja niezrazumiełaja daviedka, a aryhinalny dakumient, jaki pieradajuć u zamiežnaje Ministerstva justycyi, dzie jon projdzie praceduru apastylavańnia i budzie prymacca ŭ Jeŭropie. Pierapravieryć infarmacyju ab realnym pachodžańni vašych prodkaŭ, pa słovach kantor, nichto nie moža, pakolki takoj krainy, jak SSSR, užo daŭno nie isnuje. Roŭna jak i niama ahulnych baz danych. 

Taki sposab znachodžańnia rumynskich karanioŭ pradstaŭniki padobnaha rodu biznesu nazyvajuć «aficyjnym zapaŭnieńniem prabiełaŭ u historyi».

Pavialičyć

Kolki heta kaštuje i što ŭtojvajuć ahienctvy?

Kab takim sumnieŭnym čynam stać hramadzianinam Rumynii, vam pryjdziecca vykłaści 3500-4000 jeŭra za pasłuhi (biez uliku pajezdak u Bucharest). U zaležnaści ad firmy dadzienuju sumu padzialajuć na 2-3 płaciažy.

I choć schiema va ŭsich pasiarednikaŭ vyhladaje plus-minus adnolkava, abiacańni adroźnivajucca. Adnyja kažuć, što zapavietny dakumient budzie ŭ vas na rukach usiaho praz hod, inšyja advodziać na heta hod-paŭtara.

Pa słovach supracoŭnikaŭ adnoj z takich firmaŭ, kab atrymać takim čynam rumynski pašpart, vam pryjdziecca dvojčy jeździć u Bucharest, inšyja ž kažuć, što dastatkova tolki adnaho vizitu.

Jašče adno adroźnieńnie ŭ apisańni pracedury ŭ padobnaha rodu avanturach zaklučajecca ŭ moŭnym pytańni. Adny śćviardžajuć, što viedańnie movy nie patrabujecca zusim, inšyja ŭsio ž papiaredžvajuć, što minimalna vyvučyć jaje pryjdziecca, pakolki treba budzie prymać prysiahu.

Tym nie mienš, raśpisvajučy ŭsio pieravahi nabyćcia rumynskaha hramadzianstva pa vyšejapisanaj schiemie, pasiaredniki čamuści zabyvajucca papiaredzić, što, zhodna ź dziejnym zakanadaŭstvam, Rumynija maje prava pazbaŭlać hramadzianstva tych, chto atrymaŭ jaho nie pa naradžeńni. Siarod padstaŭ, pa jakich jaho možna zhubić, jość punkt «atrymańnie hramadzianstva machlarskich šlacham». 

Polski kirunak

Akramia dapamohi z nabyćciom hramadzianstva Rumynii, niekatoryja kampanii hatovyja dapamahčy z atrymańniem karty palaka, jakaja choć i nie vydajecca ŭ kamplekcie z polskim pašpartam, ale značna palahčaje i paskaraje praces jaho dalejšaha atrymańnia.

Zabiahajučy napierad, adznačym, što ŭ adroźnieńnie ad hramadzianstva Rumynii nabyćcio polskaha pašparta dla biełarusaŭ vyhladaje mienš «mutnaj schiemaj». Pakolki nie małaja častka biełarusaŭ maje mahčymaść zrabić heta na całkam zakonnych padstavach.

Kab atrymać kartu palaka, dastatkova mieć maci, baćku abo adnaho dziadulu ci adnu babulu, u jakich u paśviedčańni ab naradžeńni ŭ hrafie «nacyjanalnaść» budzie prapisana «palak/polka».

Takija hramadzianie Biełarusi mohuć pretendavać na kartu palaka i dalejšaje atrymańnie polskaha hramadzianstva na lehalnych padstavach. Praŭda, u adroźnieńnie ad «rumynskaj schiemy» tut pryjdziecca spačatku atrymać kartu palaka, potym pastajanny vid na žycharstva, a zatym užo padavacca na atrymańnie hramadzianstva. Na ŭsio sydzie ad paŭtara da dvuch z pałovaj hadoŭ. Aproč heta treba budzie vyvučyć movu, mieć viedy pa historyi i kultury dla zdačy ekzamienu.

Za miesiac pasiaredniki abiacajuć znajści polskija karani i padrychtavać usie nieabchodnyja dakumienty. Košt pasłuhi — kala 2000 jeŭra.

Pavialičyć

Biez ekzamienaŭ nie abyścisia

A što, kali svajakoŭ-palakaŭ niama? Schiema ŭ ahienctvaŭ taja ž, jak i ŭ vypadku z Rumynijaj. Jany vyvučajuć vaša dreva i robiać zapyt u archiŭ, paśla dakazvajuć, što ŭ dakumientach była dapuščana pamyłka. Źjaŭleńnie pamyłak tłumačać tym, što na terytoryii SSSR u tyja časy było niebiaśpiečna nazyvacca palakami. Paśla ŭsich hetych dziejańniaŭ zajaŭniku vydajuć infarmacyju, što, naprykład, chtości ź jaho baćkoŭ źjaŭlajecca etničnym palakam.

Nastupny krok paśla atrymańnia karty palaka — padača na pastajanny VNŽ. Ahienty śćviardžajuć, što kali ščylna praciahvać pracavać u hetym kirunku, to pastajanny VNŽ pa takoj schiemie možna atrymać užo ŭ pieršym trymiestry nastupnaha hoda. Ale za dapamohu ŭ atrymańni VNŽ daviadziecca zapłacić pasiarednikam jašče kala 2000 jeŭra.

Uvohule, šlach da atrymańnia polskaha hramadzianstva pa takoj schiemie zajmaje 2-2,5 hoda. Dla atrymańnia polskaha pašparta na padstavie karty palaka treba dvojčy zdavać ispyty. Pieršy — pry atrymańni samoj karty, a druhi — pry padačy zajavy na hramadzianstva. Atrymańnie pastajannaha VNŽ adbyvajecca biez zdačy ekzamienaŭ. 

Čytajcie taksama: 

«605 rubloŭ za adzin dakumient ci čakajcie da sakavika». Jak biełarusy robiać apastyli ŭ krainie i ŭ pasolstvach za miažoj

• 19
• 10
• 7
• 4
• 4
• 16