Kanhresvumien Mardžary Tejłar Hryn uvojdzie ŭ novaje ministerstva Iłana Maska pa kantroli nad efiektyŭnaściu ŭrada ZŠA.
Člen Kanhresa ZŠA ad štata Džordžyja z Respublikanskaj partyi Mardžary Tejłar Hryn paviedamiła ŭ svaich sacsietkach, što ŭvojdzie ŭ navastvorany Departamient dziaržaŭnaj efiektyŭnaści (DOGE), kiraŭnikami jakoha stanuć biznesoŭcy Iłan Mask i Viviek Ramasvami.
«Ź nieciarlivaściu čakaju, jak stanu staršynioj novaha padkamiteta, jaki, pavodle zadumy, budzie pracavać u ciesnym supracoŭnictvie z prezidentam Trampam, Iłanam Maskam, Viviekam Ramasvami i ŭsioj kamandaj Departamienta dziaržaŭnaj efiektyŭnaści. My budziem vyjaŭlać i rasśledavać marnatraŭstva, karupcyju i całkam bieskarysnuju dziejnaść fiederalnych orhanaŭ ułady», — zajaviła Hryn amierykanskamu telekanału Fox News.
Telekanał sa spasyłkaj na ŭłasnyja krynicy adznačaje, što Mardžary Tejłar Hryn uznačalić u DOGE «Padkamitet pa pavyšeńni dziaržaŭnaj efiektyŭnaści».
Čakajecca, što padkamitet budzie zajmacca «vykaranieńniem marnatraŭstva, machlarstva i złoŭžyvańniaŭ u fiederalnym uradzie, a taksama «rasśledavać nieracyjanalnyja vydatki, rearhanizoŭvać fiederalnyja viedamstvy dla pavyšeńnia ich efiektyŭnaści i šukać rašeńni dla likvidacyi biurakratyčnaj ciahaniny».
Mardžary Tejłar Hryn viadomaja svaimi skandalnymi zajavami nakont unutranaj i mižnarodnaj palityki ZŠA, a taksama padtrymkaj kanśpirałahičnych teoryj, datyčnych supiernikaŭ Donalda Trampa.
Tak, palityk śćviardžała, što maštabnyja lasnyja pažary ŭ Kalifornii ŭ 2021 hodzie byli spravakavanyja «jaŭrejskimi kaśmičnymi łazierami», jakija nibyta kantralujucca siamjoj Rotšyldaŭ. Jašče Hryn nazyvała eks-prezidenta ZŠA Baraka Abamu i byłuju kandydatku ŭ prezidenty Chiłary Klintan «sataninskimi piedafiłami-kanibałami, jakija kirujuć tajemnym uradam, suprać jakoha zmahajecca Donald Tramp».
Datyčna mižnarodnaj palityki, Hryn vystupaje rezka suprać finansavaj dapamohi zamiežnym krainam, zajaŭlajučy, što «ciažka zaroblenyja» padatki amierykancaŭ pavinny vykarystoŭvacca vyklučna ŭnutry ZŠA.
Kanhresvumien rehularna hałasavała suprać hrašovaj dapamohi Ukrainie, abhruntoŭvajučy heta tym, što kraina nie źjaŭlajecca sajuźnikam ZŠA i členam NATA (pry hetym palityk vystupaje suprać pryjomu Ukrainy ŭ aljans, a da hetaha hałasavała suprać pašyreńnia błoka za košt Finlandyi i Šviecyi).
U sakaviku 2022 hoda Mardžary Tejłar Hryn kazała, što Ukraina sama «padšturchnuła miadźviedzia» da ahresii, zdymajučy tym samym adkaznaść z Rasii za pačatak vajny.
Kramloŭskaja prapahanda ŭžo niekalki hadoŭ aktyŭna vykarystoŭvaje zajavy Hryn dla padtrymańnia i raspaŭsiudžvańnia ŭłasnych naratyvaŭ. Naprykład, u krasaviku 2024 hoda telekanał CNN zaŭvažyŭ, što rasijskija miedyja horača vitali sproby Hryn sarvać zakonaprajekty ab vajskovaj i ekanamičnaj dapamozie Ukrainie.
Takija pavodziny Hryn daŭno vyklikajuć haračyja sprečki ŭ ZŠA: krytyki abvinavačvajuć žančynu ŭ retranślacyi idej rasijskaj prapahandy, u toj čas jak jaje prychilniki śćviardžajuć, što jana «ŭsiaho tolki abaraniaje intaresy Amieryki».
U kožnym razie, pryznačeńnie Mardžary Tejłar Hryn u DOGE daść joj mahčymaść rehulavać amierykanskija hrašovyja vydatki na Ukrainu, u tym liku tarmazić ci spyniać ich.
Kamientary