Jakija mašyny stali samymi pradavanymi ŭ Biełarusi i što jašče źmianiłasia na aŭtarynku za hod
Na pačatku 2022 hoda aŭtamabilny śviet Biełarusi žyŭ svaim davoli stabilnym žyćciom. Dylery čakali vychadu na rynak novych madelaŭ, nie było deficytu zapčastak. Vajna hłabalna źmianiła płany hulcoŭ aŭtabiznesu, ale, jak pakazvaje čas, stracili na hetym nie ŭsie.
Što adbyvałasia na rynku novych aŭto?
Badaj, u najhoršaj situacyi akazalisia pradaŭcy novych aŭto. Praz toje, što bolš za 80% novych mašyn, jakija pradavalisia ŭ biełaruskich dyleraŭ, vyrablalisia na zavodach u Rasii, im u pramym sensie stała niama čaho pradavać. Paśla poŭnamaštabnaha ŭvarvańnia Rasii va Ukrainu suśvietnyja aŭtavytvorcy spačatku zajaŭlali pra prypynieńnie dziejnaści, a paźniej całkam sychodzili z rynku.
Usio heta vyklikała deficyt novych aŭto ŭ Biełarusi. Prablemy z vytvorčaściu ŭźnikli ŭ tym liku i ŭ rasijskaj Lada, pry vyrabie jakoj vykarystoŭvałasia značnaja kolkaść zamiežnych kampanientaŭ.
Na rasijskich zavodach, dzie raniej vypuskali aŭtamabili jeŭrapiejskich i karejskich brendaŭ, pačynajuć naładžvać vypusk kitajskich aŭto.
Amal poŭnaje spynieńnie śviežych pastavak novych mašyn ŭ Biełaruś vyklikała istotny rost cen, što jašče bolš niehatyŭna adbiłasia na prodažy. Kali ŭ 2021 hodzie dylery realizavali 46 837 adzinak techniki, 41 217 ź jakich pryjšlisia na dolu lehkavych aŭto, to pa vynikach pieršaha paŭhodździa 2022 hoda dylery pradali 11 905 aŭtamabilaŭ. Z vyčarpańniem składskich zapasaŭ situacyja praciahvała paharšacca. Ciaham nastupnych piaci miesiacaŭ aficyjnyja dylery pradali ŭsiaho kala 3 000 adzinak techniki. U paraŭnańni z vosieńniu minułaha hoda prodaž novych aŭto ŭ Biełarusi ŭpaŭ u 10 razoŭ.
Pa vynikach 11 miesiacaŭ 2022 hoda lidaram na rynku zastajecca marka LADA — z vynikam 3 698 aŭtamabilaŭ. Adnak Geely, prodaž jakoj raście, sa 3 197 pradadzienymi aŭtamabilami, praktyčna dahnała jaje. Cikava, što 81% usiaho aŭtamabilnaha rynku lehkavych aŭtamabilaŭ Biełarusi ŭ listapadzie 2022 hoda skłaŭ brend Geely.
Letaś top-2 vyhladaŭ hetak sama, ale ličby istotna roźniacca. Tady za hod pradali 11 669 novych Lada i 7 442 Geely.
Tym nie mienš, zusim biez aŭto biełarusy nie zastalisia. Nišu, jakaja vyzvaliłasia, stali aktyŭna zajmać «šeryja imparciory», jakija pačali ŭvozić u Biełaruś novyja aŭtamabili ź Jeŭropy. Adbyvajecca heta ŭ tym liku z vykarystańniem 140-ha ŭkaza, jaki dazvalaje peŭnaj katehoryi hramadzian uvozić aŭtamabili, vypłačvajučy 50 % mytu.
Jak siabie adčuvaje «beuška»?
Pryhon patrymanych aŭto ź Jeŭropy i ZŠA, jaki davoli dobra pačuvaje sabie ź viasny 2019 hoda, kali ŭ Biełarusi źjaviłasia lhotnaja razmytnioŭka, vyjšaŭ na novy ŭzrovień. Navat niahledziačy na takija ciažkaści, jak błakiroŭka biełaruskich akaŭntaŭ na amierykanskich aŭkcyjonach i prablemy z łahistykaj.
Amal poŭnaje spynieńnie vytvorčaści novych aŭto ŭ RF zhulała na ruku biełaruskim pierahonščykam, popyt na «śviežyja» aŭto ź ES i ZŠA značna pavialičyŭsia. Adbyłosia heta jak za košt miascovych pakupnikoŭ, tak i za košt rasijskich. Apošnija vyvoziać śviežapryviezienyja aŭtamabili cełymi aŭtavozami.
Źjaviŭsia deficyt aŭtazapčastak
Aŭtaamatary sutyknuisia z deficytam novych zapčastak i raschodnikaŭ. Vybar detalej pamienšaŭ, a ceny, naadvarot, vyraśli. Deficyt i rost cenaŭ paspryjali źjaŭleńniu šerych imparcioraŭ aŭtazapčastak i matornych alejaŭ z Polščy i Litvy.
Trochi pazityvu
Ciaham hoda ŭ aŭtamabilnym śviecie adbyvalisia i peŭnyja pazityŭnyja źmieny. Naprykład, sioleta ŭ biełarusaŭ znoŭ źjaviłasia mahčymaść uvozić elektramabili biez spłaty mytu.
Praz abureńnie Łukašenki cenami na Geely aŭtamabili biełaruska-kitajskaj vytvorčaści ŭ adzin momant patańnieli na 15%. Praŭda, «źnižka ad Łukašenki» pratrymałasia niadoŭha. Praz try miesiacy ceny na dźvie z troch madelaŭ pavialičylisia.
Što jašče adbyłosia
Saviet Ministraŭ čarhovy raz praciahnuŭ zabaronu na ŭvoz i prodaž u Biełarusi tavaraŭ zachodnich kampanij Škoda, Liqui Moly.
A jašče z 27 kastryčnika ŭ Biełarusi pačali dziejničać novyja PDR.
«Naša Niva» — bastyjon biełaruščyny
PADTRYMAĆČytajcie taksama: Biełaruski rynak novych aŭto čakaje tatalnaja kitaizacyja. Voś jakija brendy pryjduć na źmienu suśvietnym
«Hruzić siabie i inšych»: były pamočnik Łukašenki Ihar Bryło biare na siabie vinu ŭ pramysłovych abjomach5
Kamientary