Łukašenkaŭski «biznesmien udačy» Vierabiej trapiŭ u pryceł siłavych struktur

Pra toje, što ŭ Biełarusi aryštoŭvajuć nabližanych da Mikałaja Vierabja ludziej, «Našaj Nivie» paviedamili try nie źviazanyja miž saboj krynicy. 

«Sam Vierabiej pakul na svabodzie, ale ŭ jaho tavaryšaŭ usio nie vielmi dobra», — skazaŭ nam adzin z surazmoŭcaŭ. 

«Što peŭnyja prablemy jość, paćviardžaju», — dadaŭ inšy čałaviek sa śfiery, blizkaj da rodu dziejnaści Vierabja. 

Anałahičnuju infarmacyju my atrymali i jašče ad adnaho surazmoŭcy, jaki padkreśliŭ, što «z Ukrainaj u jaho pierśpiektyŭ užo niama i jahonyja suviazi bolš niepatrebnyja, a niedatykalnych u nas niama».

Detali pytańniaŭ orhanaŭ da ludziej z atačeńnia Mikałaja Vierabja nam nieviadomyja, ale sens pretenzij da mnohich inšych raniej nabližanych «da dvara» biznesmienaŭ palahaŭ u tym, što na fonie skaračeńnia prybytkaŭ tyja nie mahli vykonvać uziatyja na siabie abaviazki ŭ častcy adličeńniaŭ na infrastrukturu, sport, fondy i na bolš dalikatnyja zabaviazańni.

Naradziŭsia Mikałaj Vierabiej va Ukrainie, časam jamu prypisvajuć svajackija suviazi z kumam Pucina Viktaram Miedźviedčukom.

Asnoŭny biznes Vierabja — aptovy handal rasijskimi naftapraduktami na biełaruskim rynku i ich ekspart za miažu.

Vierabiej zarabiŭ bahaćcie na pieraprodažy naftapraduktaŭ — a časam i prosta rasijskaj nafty pad vyhladam biełaruskaj, — va Ukrainu. 

Vialikija hrošy, jakija prachodzili praź Mikałaja Vierabja, byli zaroblenyja ŭ tym liku na apieracyjach z pradukcyjaj navapołackaha naftapierapracoŭčaha zavoda «Naftan» u čas, kali Navapołackam kiravała Natalla Kačanava. 

Łukašenkaŭskija čynoŭniki, siabry i spartoŭcy biaspłatna adpačyvali na bazie adpačynku pad Navapołackam, jakaja naležała Mikałaju Vierabju, a raźvivałasia pry spryjańni Natalli Piatkievič. 

Vierabiej staŭ blizkim da niekatorych zaŭvažnych asob u łukašenkaŭskim atačeńni — da Uładzimira Kanaplova, Juryja Čyža. 

Potym Vierabiej na paru z Alaksandram Šakucinym i Alaksiejem Aleksinym dzialiŭ impieryju byłoha siabra. 

Vierabja, jak i Aleksina, źviazvajuć sa skandałam z «prysadkami» i «rastvaralnikami» ŭ 2012 hodzie.

Hetyja ludzi vielmi blizkija i majuć supolnyja aktyvy. Naprykład, jany razam pad ściaham «Bremina Hrup» vałodajuć ilhotnaj ekanamičnaj zonaj pad Oršaj, jakuju ŭ narodzie nazyvajuć «Aršoram».

Vierabiej da niadaŭniaha času mieŭ šyrokija biznes-suviazi siarod aryjentavanych na Maskvu ŭkrainskich biznesmienaŭ. Surazmoŭcy «Našaj Nivy» taksama vykazvajuć mierkavańnie, što Vierabiej byŭ finansava spryčynieny da dziejnaści ŭkrainskich prarasijskich telekanałaŭ 112Ukraina, NewsOne i ZIK, jakija taksama źviazvajuć ź Miedźviedčukom. 

Nielha vyklučać, što Vierabiej byŭ u apošniaha zic-staršynioj Funtam, tamu što sam Miedźviadčuk paśla Majdanu 2014 hoda akazaŭsia sa źviazanymi rukami.

Tak, u 2018-m kampanija Vierabja «Naftabitumny zavod» sprabavała pryvatyzavać ukrainski «Centrenierha». Ale ŭkrainski Fond dziaržmajomaści adchiliŭ zajaŭku z pryčyny taho, što «kančatkovym bienieficyjaram źjaŭlajecca asoba z RF». 

Vykazvałasia mierkavańnie, što trubapravod «Prykarpatzachadtrans» Miedźviadčuk pradaŭ Vierabju dla advodu vačej, a ŭ jakaści padziaki za pasłuhu Vierabiej atrymaŭ kantakty ź ludźmi ŭ Rasii, jakija vyznačajuć kvoty na ekspart nafty. 

Napačatku vajny hety naftapravod taksama paciarpieŭ ad bambardzirovak. 

Čytajcie taksama: Krynicy: Trubu nabližanaha da Łukašenki Vierabja razbambili va Ukrainie. Tam było dyzielu na $10 miljonaŭ

Kaniec ukrainskaj historyi Vierabja zakłała prezidenctva Uładzimira Zialenskaha i rašeńnie novych palityčnych elit spynić dziejnaść pramaskoŭskich działkoŭ va Ukrainie, a kančatkova padvioŭ rysu saŭdzieł Biełarusi ŭ vajnie suprać Ukrainy.

• 32
• 0
• 12
• 0
• 2
• 4
• 8
• 0