Francyja znajšła rasijski śled u hrafici z zorkami Davida ŭ rajonach Paryža. Što viadoma

Ministerstva zamiežnych spraŭ Francyi abvinavaciła Rasiju ŭ raździmańni skandału vakoł hrafici z zorkami Davida ŭ niekalkich rajonach Paryža. Niekatoryja ličać heta antysiemickaj akcyjaj, i francuzskija ŭłady śćviardžajuć, što źviazanaja z Rasijaj sietka pačała aktyŭna raspaŭsiudžvać fatahrafii hetych hrafici ŭ internecie.

Pa śćviardžeńni MZS Francyi, rasijskaja sietka pad nazvaj RRN (abo Doppelgänger) pieršaj pačała publikavać fatahrafii z zorkami Davida na damach i aktyŭna spryjała źjaŭleńniu źviazanaha z hetym hramadskaha rezanansu.

«Hetaja novaja rasijskaja apieracyja pa ličbavym umiašańni ŭ spravy Francyi kaža pra vybar apartunistyčnaj i biezadkaznaj stratehii. Jaje sutnaść — u vykarystańni mižnarodnych kryzisaŭ dla stvareńnia napružanaści ŭ hramadskich debatach u Francyi i Jeŭropie i raspaŭsiudzie sumiatni», — skazana ŭ zajavie francuzskaha zamiežnapalityčnaha viedamstva.

Pasolstva Rasii ŭ Francyi nazvała abvinavačvańni nieabhruntavanymi.

«Kateharyčna asprečvajem abvinavačvańni MZS Francyi ŭ «rasijskim ličbavym umiašańni», a mienavita ŭ masavym raspaŭsiudzie nibyta źviazanaj z Rasijaj sietkaj dezinfarmacyi fatahrafij budynkaŭ u Paryžy z naniesienymi na ich farbaj zorkami Davida», — skazana ŭ zajavie, raźmieščanaj u telehram-kanale pasolstva.

Źjaŭleńnie zorak Davida ŭ Paryžy vyklikała asabliva hučny skandał na fonie vajny Izraila suprać CHAMAS i ŭsplosku antysiemityzmu ŭ Jeŭropie, jaki rušyŭ za joj, u tym liku ŭ Francyi.

Kali i dzie źjavilisia hrafici?

Pieršyja hrafici z naniesienymi siniaj farbaj zorkami Davida — simvałam habrejskaha naroda i dziaržavy Izrail — źjavilisia ŭ adnym z rajonaŭ Paryža ŭ noč na paniadziełak 30 kastryčnika.

Z tych časoŭ u francuzskaj stalicy i jaje pryharadach byli vyjaŭlenyja kala 250 takich hrafici.

Francuzskija palityki zrabili vysnovu, što heta antysiemickaja akcyja, pakolki jana nahadvała naniasieńnie zorak Davida na habrejskija damy i ŭstanovy ŭ hady, kali pieraśledam habrejaŭ zajmalisia nacysty.

Adnak supracoŭniki pravaachoŭnych orhanaŭ, jakija rasśledujuć toje, što adbyłosia, nie robiać hetkich adnaznačnych vysnoŭ.

Jany adznačajuć, što hrafici źjavilisia na vybranych vypadkovym čynam damach, jakija nie mieli vidavočnych suviaziaŭ z habrejami.

Akramia taho, jany ŭjaŭlajuć saboj sinija zorki Davida, jakija taksama možna ŭbačyć na izrailskim ściahu, — i heta vyklikaje novyja pytańni adnosna matyvaŭ aŭtaraŭ akcyi.

Chtości navat moža nazvać hetuju akcyju praizrailskaj, pakolki antysiemity vidavočna mahli b znajści niejki inšy sposab vykazać svaju nianaviść da habrejaŭ, adznačaje karespandent Bi-bi-si Chju Skofiłd.

Sa słoŭ Skofiłda, metaj akcyi z hrafici ŭ Paryžy mahło być raspaŭsiudžvańnie ŭ hramadstvie napružańnia i ahulnaj sumiatni.

A toj fakt, što naniasieńnie zorak Davida možna adnačasova rascanić jak praizrailskuju i antysiemickuju akcyju, robić heta jašče bolš cikavym: takim čynam padazreńni ŭźniknuć u abodvuch bakoŭ.

Pry čym tut moža być Rasija

U sieradu francuzskaja prakuratura zajaviła, što da arhanizacyi akcyi moža być datyčnaja rasijskaja raźviedka. Pravaachoŭnyja orhany pry hetym paviedamili, što ŭ naniasieńni hrafici padazrajuć čatyroch čałaviek (dźvie siamiejnyja pary) z Małdovy.

Na asnovie pierachoplenych telefonnych razmoŭ francuzskija śledčyja ličać, što hetyja ludzi dziejničali na asnovie rasparadžeńniaŭ, atrymanych ad adnaho čałavieka. «Na hetym etapie my nie vyklučajem, što [hrafici] nanosilisia pa pramych rasparadžeńniach čałavieka, jaki žyvie za miažoj», — skazana ŭ zajavie prakuratury.

Jak paviedamlaje hazieta Le Monde, za abiedźviuma parami, jakija malavali hrafici, išoŭ fatohraf. Jon nie tolki fatahrafavaŭ ich «pracu», ale adrazu raźmiaščaŭ hetyja zdymki ŭ internecie. Pavodle źviestak vydańnia, fatahrafii zatym raspaŭsiudžvali akaŭnty, źviazanyja ź sietkaj Doppelgänger.

Palicyja paviedamlaje, što adna z par była aryštavanaja. Hetyja ludzi paviedamili palicejskim, što znachodzilisia ŭ Paryžy ŭ adpačynku, a nanosić hrafici ich paprasiŭ nieviadomy, jaki pa-rusku źviarnuŭsia da ich na vulicy i prapanavaŭ za pasłuhi nievialikuju sumu hrošaj.

Ciapier pieršaja siamiejnaja para čakaje departacyi, a druhaja pakinuła Francyju jašče da taho, jak ich mahli zatrymać. Asoba fatohrafa (abo fatohrafaŭ), jaki rabiŭ zdymki, zastajecca nieviadomaj.

Le Monde śćviardžaje, što da arhanizacyi akcyi moža być datyčny prarasijski palityk i biznesoviec z Małdovy Anatol Pryzienka. Apošni prymaŭ udzieł u dziejnaści Partyi sacyjalistaŭ Małdovy, jakaja vystupaje za bolš ciesnaje supracoŭnictva z Rasijaj.

U intervju haziecie Libération čałaviek, jaki pradstaviŭsia jak Pryzienka, paćvierdziŭ, što jon sapraŭdy stajaŭ za naniasieńniem hrafici, i metaj takich dziejańniaŭ było «vykazvańnie padtrymki habrejam Jeŭropy».

Sietka sajtaŭ-dvajnikoŭ: što viadoma pra sietku Doppelgänger i jak jana źviazanaja z HRU

Jak paćvierdzili francuzskija pravaachoŭnyja orhany, raspaŭsiudžvańniem fatahrafij z zorkami Davida ŭ Paryžy aktyŭna zajmałasia prapahandysckaja sietka vydańniaŭ i akaŭntaŭ u sacsietkach, viadomaja jak RRN abo Doppelgänger.

U lipieni 2023 hoda Jeŭrapiejski Sajuz paviedamiŭ ab uviadzieńni sankcyj suprać siami rasiejskich hramadzian i piaci kampanij, jakija stajać za strukturaj, jakuju čynoŭniki JEZ apisvajuć jak «infarmacyjnuju kampaniju RRN».

Adno ź jaje vydańniaŭ pad nazvaj «Infaros» u paviedamleńni Jeŭrapiejskaj kamisii nazyvajuć «ciesna źviazanym z rasijskim HRU».

Pa dadzienych prajekta EU Disinfo, jaki adsočvaje dezynfarmacyju ŭ internecie, sietka Doppelgänger pačała pracavać u jeŭrapiejskich krainach u mai 2022 hoda. Jana stvaraje kłony aŭtarytetnych vydańniaŭ, u tym liku niamieckaj haziety Bild, brytanskaj Guardian i ŭkrainskaha «RBK-Ukraina» i raźmiaščaje ŭ ich fejkavyja naviny, videaroliki i apytańni.

Materyjały, jakija publikujucca ŭ sietcy, adpaviadajuć kramloŭskim naratyvam pra vajnu va Ukrainie, naprykład, admaŭlajuć masavaje zabojstva ludziej rasiejskimi vajskoŭcami ŭ Bučy, adznačajuć aŭtary dakładu EU Disinfo.

U červieni hetaha hoda Le Monde apublikavała cełuju sieryju artykułaŭ pra dziejnaść sietki Doppelgänger, jakaja vykarystoŭvaje dla raspaŭsiudžvańnia dezynfarmacyi ŭ sacsietkach kampjutarnyja boty.

Le Monde śćviardžaje sa spasyłkaj na krynicy siarod śledčych u spravie ab zorkach Davida, što počyrk arhanizataraŭ i vykanaŭcaŭ akcyi vielmi nahadvaje dziejańni rasijskaj raźviedki.

Paśla pačatku poŭnamaštabnaj vajny va Ukrainie jana pazbaviłasia mnohich kaštoŭnych supracoŭnikaŭ, vysłanych z zachodnich krain, i ciapier vymušana spadziavacca na pasłuhi nizkaapłatnych «fryłansieraŭ».

• 3
• 0
• 1
• 3
• 3
• 0
• 15
• 0