Znoŭ sudziać Mikitu Załatarova, jaki sustreŭ za kratami paŭnalećcie, prajšoŭ try sudy, dźvie kałonii i turmu
Mikita viadomy tym, što ŭ 2020 hodzie staŭ adnym z samych junych biełaruskich palitviaźniaŭ: jamu było 16 hadoŭ.
U Žodzinie pačynajecca sud nad palitviaźniem z Homiela Mikitam Załatarovym, jaki adbyvaje pakarańnie za ŭdzieł u pratestach 2020 hodu (jamu prysudzili ahułam 4,5 hoda), piša Radyjo Svaboda.
Ciapier Mikitu Załatarovu pahražaje jašče adzin hod kałonii pavodle 411 artykuła Kryminalnaha kodeksu («Złosnaje niepadparadkavańnie zakonnym patrabavańniam administracyi papraŭčaj ustanovy»).
Za što pakarali Mikitu Załatarova
Mikitu zatrymali ŭ Homieli 11 žniŭnia 2020 hodu, kali jamu było tolki 16 hadoŭ i 2 miesiacy. Jaho abvinavacili pavodle troch artykułaŭ KK — u arhanizacyi masavych pratestaŭ (art. 293), niezakonnych dziejańniach u dačynieńni da pradmietaŭ z vykarystańniem haručych rečyvaŭ (art. 295-3) i hvałcie albo pahrozie hvałtu adnosna supracoŭnikaŭ orhanaŭ unutranych spraŭ (art. 364). Pavodle śledstva, jakoje išło niadoŭha, Mikita Załataroŭ kinuŭ u bok milicyjantaŭ «kaktejl Mołatava», ad jakoha nichto nie paciarpieŭ. U lutym 2021 hoda adbyŭsia sud, pa vynikach jakoha chłopiec atrymaŭ pakarańnie ŭ 5 hadoŭ źniavoleńnia va ŭmovach vychavaŭčaj kałonii.
Viadoma, što paśla abviaščeńnia prysudu ź Mikitam zdaryłasia isteryka, u sudzie z žaleznaj kletki jon kryčaŭ: «Vypuścicie mianie adsiul!»
Adbyvać pakarańnie Mikitu Załatarova adpravili ŭ vychavaŭčuju kałoniju №2 dla niepaŭnaletnich, jakaja znachodzicca ŭ Babrujsku.
U lipieni 2021 hoda Mikitu čakaŭ novy sud — hetym razam palitviaźnia abvinavacili ŭ tym, što jon nibyta napaŭ na supracoŭnika SIZA i pahražaŭ druhoj supracoŭnicy i jaje rodnym. Na sudzie chłopiec pryznaŭ vinu, ale tłumačyŭ, što jon abaraniaŭsia ad bićcia. «Heta byŭ nie hvałt, a supraciŭ. Abraźlivyja słovy ja vymaviŭ na emocyjach», — kazaŭ Mikita. Vynik suda — paŭtara hoda kałonii ahulnaha režymu. Praz składańnie dvuch terminaŭ pakarańnia małady viazień atrymaŭ ahułam 4,5 hoda źniavoleńnia.
Pavodle zakonu, u vychavaŭčaj kałonii niepaŭnaletniaha asudžanaha mohuć trymać da dasiahnieńnia im uzrostu ŭ 21 hod, ale adrazu paśla taho, jak Mikitu Załatarovu spoŭniłasia 18, jaho z vychavaŭčaj kałonii №2 pieraviali ŭ papraŭčuju kałoniju №15 pad Mahilovam. Čamu ŭ červieni 2022 hoda hetak vyrašyŭ sud Babrujskaha rajona, u pravaabaroncaŭ źviestak niama. Ale i ŭ PK-15 Mikita Załataroŭ nadoŭha nie zatrymaŭsia. Užo ŭ žniŭni jaho pieraviali ŭ žodzinskuju turmu № 8 va ŭmovy strohaha režymu.
Jak abychodzilisia ź niepaŭnaletnim viaźniem
Ad svajakoŭ Mikity Załatarova i ź jahonych skarhaŭ u sudzie viadoma, što padčas śledstva jaho šmat razoŭ bili, u tym liku ŭžyvali elektrašokier. «Adviaduć dalej ad kamiery — i bjuć dubinkami», — kazaŭ pra śledstva Mikita Załataroŭ. Pavodle baćki palitviaźnia Michaiła Załatarova, u sudzie syn u jaho pytaŭsia: «Kali mianie ŭžo bić pierastanuć?»
Padčas śledstva ŭ Homielskim SIZA junaka trymali ŭ adzinočnaj kamiery.
Taksama viadoma, što Mikitu Załatarova padčas jahonaha znachodžańnia ŭ vychavaŭčaj kałonii №2 niekalki razoŭ karali štrafnym izalataram.
Pravaabaroncam dakładna viadoma, što z papraŭčaj kałonii pieravod na strohi režym u zakrytuju turmu nie adbyvajecca bieź niekalkich pakarańniaŭ viaźnia ŠIZA i PKT. Pravaabaroncy nie vyklučajuć, što ŭ PK-15 Mikita Załataroŭ taksama siadzieŭ u ŠIZA.
Zdaroŭje Mikity Załatarova
12 traŭnia 2024-ha Mikitu Załatarovu spoŭniłasia 20 hadoŭ. U jaho jość prablemy sa zdaroŭjem. Chłopiec ź dziacinstva chvareje na epilepsiju, što značna ŭskładniła jamu žyćcio va ŭmovach źniavoleńnia. Pavodle pravaabaroncaŭ «Viasny», padčas pieršaha sudovaha pracesu Mikita raskazaŭ, što jamu ŭ SIZA nie dajuć tabletak. «Kanvair skazaŭ: «Ty palityčny, zdochnieš»», — kazaŭ tady jašče niepaŭnaletni Mikita Załataroŭ.
Pavodle baćki palitviaźnia Michaiła, jahony syn drenna pieranosić doŭhaje znachodžańnie ŭ adzinočnaj kamiery. «Mikita tolki paśpieŭ skazać, što bolš nie moža tryvać: kali zastaniecca ŭ kamiery adzin, jon nie vytrymaje», — raskazvaŭ tata palitviaźnia ŭ lutym 2021 hoda.
Źviestak pra toje, za što mienavita ciapier sudziać Mikitu Załatarova pavodle 411-ha artykuła, u pravaabaroncaŭ niama.
Stała viadoma aficyjnaja pryčyna śmierci Makieja, Ašurka i Tarajkoŭskaha3
Kamientary