Bai za Vuhladar ź pierapynkami praciahvalisia sa žniŭnia 2022 hoda. Siońnia stała viadoma, što horad akupavany rasijskimi vojskami. Ale takuju canu za 15-tysiačny horad, napeŭna, nie pahadziŭsia b zapłacić kiraŭnik nivodnaj inšaj dziaržavy.
Pra pieršyja miasnyja šturmy pad Vuhladaram stała viadoma ŭ listapadzie 2022 hoda. Spačatku horad bambiła rasijskaja avijacyja, a zatym napierad pajšli padraździaleńni piachoty.
Vajskoŭcy 155-j bryhady paviedamlali, što kamandzir 20-j ahulnavajskovaj armii hienierał Suchrab Achmiedaŭ pasyłaje sałdat u drenna arhanizavanyja šturmy Paŭłaŭki pad Vuhladaram, u vyniku čaho bryhada straciła kala 300 čałaviek i 50% techniki za 4 dni.
24—25 studzienia 2023 hoda rasijskija vojski pačali druhi šturm horada. Paviedamlałasia, što padčas atak jany stracili jak minimum 71 adzinku techniki, u tym liku dziasiatki tankaŭ, i, imavierna, sotni marskich piechacincaŭ Cichaakijanskaha fłotu razam z marpiechami 40-j bryhady i śpiecnazam 14-j asobnaj bryhady zabitymi i paranienymi.
Rasijski vajenkar Ihar Hirkin tady pisaŭ, što stračana było bolš za 30 adzinak braniatechniki, strataŭ «dvuchsotymi» tolki ŭ tankistaŭ byli «mnohija dziasiatki», «marpiechaŭ, śpiecnazaŭcaŭ i motastrałkoŭ zahinuła jašče bolš». I, samaje hałoŭnaje, pa jaho słovach, usie hetyja straty akazalisia «adnabakovymi»: ukraincy «rasstralali atakujučych, «jak u ciry».
U noč na 13 lutaha 2023 hoda nočču ŭkrainskija rakiety HIMARS dakładna źniščyli štab bataljona «Uschod» pad Vuhladaram.
15 lutaha rasijskija vojski byli vycisnutyja z pazicyj na poŭdzień ad Vuhladara. Za čas bajoŭ, jak adznačali ŭkrainskija vajskoŭcy, pad horadam adbyłasia samaja bujnaja tankavaja bitva vajny, u chodzie jakoj Rasija straciła, prynamsi, 130 tankaŭ i bronietransparcioraŭ.
Pavodle słoŭ ministra abarony Vialikabrytanii Bena Uolesa, za tyja 2 dni Rasija straciła kala 1000 sałdat, była źniščanaja cełaja bryhada. Uoles adznačaŭ, što mabilizavanych «šturchali ŭ miasarubku».
Jak piša Forbes, ataki marskoj piachoty na Vuhladar u pieryjad ź listapada 2022-ha pa luty 2023 hoda stali adnymi z samych kryvavych u vajnie. 155-ja bryhada marskoj piachoty, jakaja na papiery naličvała kala 3000 vajskoŭcaŭ, hublała da 300 čałaviek u dzień na praciahu niekalkich dzion zapar i była amal źniščanaja da lutaha 2023 hoda.
Da leta 2023-ha horad byŭ razburany. Z davajennaha nasielnictva kala 15 tysiač čałaviek da lutaha 2023 hoda ŭ im zastałosia mienš za 500, a da lipienia — mienš za 100 čałaviek.
Niekalki atak u vakolicach horada było praviedziena ŭ mai-červieni 2024 hoda. Tak, 28 červienia USU źniščyli rasijskuju kałonu ŭ Vuhladary, jakaja atakavała 72-ju miechanizavanuju bryhadu. Bryhada zajaviła, što padbiła 16 tankaŭ T-80, 34 bajavyja mašyny i 19 matacykłaŭ, a taksama zabiła ci ciažka paraniła bolš za 800 rasijskich sałdat padčas šturmu.
Video from Ukraine's 72nd Mechanized Brigade of strikes on a Russian armored assault on the Vuhledar front with tanks, BMP, MT-LB, BTR, and motorcycles. https://t.co/6pFeid4nGp pic.twitter.com/JOu5iCSiIS
U pačatku vieraśnia rasijskija vojski adnavili bai ŭ vakolicach horada, a 24 vieraśnia raspačali jaho šturm. 1 kastryčnika ŭnačy ŭkrainskija abaroncy pakinuli Vuhladar. Rasii dastaŭsia całkam razburany horad, jaki kaštavaŭ joj tysiač sałdackich žyćciaŭ.
«U bajach za horad bryhady marskoj piachoty i dapamožnyja vajskovyja padraździaleńni Rasii stracili kala tysiačy tankaŭ, bajavych mašyn, hruzavikoŭ i artyleryjskich harmat», — pisaŭ 26 vieraśnia Forbes sa spasyłkaj na padliki WarSpotting.
«Heta prykładna dźvie bryhady techniki — amal šeść pracentaŭ usioj techniki, jakuju Rasija straciła za 31 miesiac upartych bajoŭ va Ukrainie», — adznačaje aŭtar artykuła.
Jakija kančatkovyja straty bitvy za Vuhladar, pakul nieviadoma. Horad źniščany, ale i rasijanie stracili svaje najbolš bajazdolnyja čaści.
Kamientary