«I tut linoleum zaiskryŭ». Kasiak pry mantažy aciapleńnia źniščyŭ dziciačy pakoj
Andrej nabyŭ kvateru ŭ «Minsk-Miry» ŭ 2021 hodzie. Zajechać u novaje žyllo razam ź siamjoj płanavaŭ jak maha chutčej, tamu z ramontam nie zaciahvaŭ. Jon zaniaŭ u mužčyny kala čatyroch miesiacaŭ. Raboty zakranuli ŭ tym liku sistemu aciapleńnia: ułaśnik chacieŭ pastavić novyja radyjatary zamiest tych, što abraŭ zabudoŭščyk, piša Onliner.by.
— Jany raźmiaščalisia prosta pierad voknami i vyhladali nie tak, jak mnie chaciełasia b. Ja vyrašyŭ zamianić ich, a taksama dadać jašče adzin radyjatar u kamorcy. Naturalna, atrymaŭ na ŭsio dazvoł u rajonnaj administracyi, pravioŭ nieabchodnyja vyprabavańni. Da mianie pryjazdžali siertyfikavanyja śpiecyjalisty, zamiarali cisk u trubach — usio było ŭ normie i da, i paśla pieraabstalavańnia, — zapeŭnivaje surazmoŭca. Jaho słovy paćviardžajuć i akty hidrastatyčnych vyprabavańniaŭ.
Siamja spakojna pieražyła pieršuju zimu ŭ novaj kvatery, paśla druhuju… Praŭda, užo tady ŭ Andreja paŭstali pieršyja sumnievy: a ci ŭsio ŭ paradku?
— Va ŭsich pakojach ja sam mantavaŭ sistemu «razumnaja padłoha». Letaś jana pierastała narmalna pracavać u dziciačym pakoi. Paśla ŭklučeńnia jana praktyčna adrazu adklučałasia, jak byccam užo nahrełasia (choć heta było nie tak). Ja padumaŭ, što niapravilna jaje pakłaŭ i treba ŭsio pierarablać. Vyrašyŭ, što raźbiarusia z hetym kali-niebudź potym.
Tak prajšoŭ jašče adzin hod. U pačatku śniežnia zdaryłasia niečakanaje.
— Majo dzicia znoŭ vyrašyła ŭklučyć padahreŭ padłohi. Linoleum zaiskryŭ — dobra, što heta było pry mnie. Ja razrezaŭ pakryćcio i z žacham vyjaviŭ pad im vadu. Jana sapsavała ciopłuju padłohu (jana zaržavieła, tamu, napeŭna, tołkam nie funkcyjanavała), nabrałasia ŭ vors linoleumu, namačyła ściažku… A kali my pryniali ŭsiu meblu, zrazumieli, što paciarpieli navat špalery — jany paćvili, — pieraličvaje Andrej. — Ja spałochaŭsia, što zatapiŭ susiedziaŭ: jany try hady rabili ramont i zusim niadaŭna jaho skončyli. Na ščaście, u ich ničoha nie ciakło.
Mužčyna źviarnuŭsia ŭ kiraŭničuju kampaniju žyłoha kompleksu — kampaniju «Chepi Płaniet». Niekalki dzion inžynier i inšyja śpiecyjalisty abśledavali kvateru.
— Akazałasia, praciakaje adna z trub jakraz u tym miescy, dzie staić fitynh. U čym kankretna była prablema — u samoj detali abo ŭ niapravilnaj jaje ŭstaloŭcy, — da kanca nie było zrazumieła. Paŭstała pytańnie, chto budzie heta ramantavać.
U arhanizacyi heta rabić admovilisia, spasłaŭšysia na toje, što pieraabstalavanaja sistema aciapleńnia — heta zona adkaznaści ŭładalnika kvatery. Choć kankretna hetaje miesca mantažniki navat nie čapali: jany ledź-ledź praciahnuli truby ad zabudoŭščyka ŭ zusim inšym miescy, a jašče pastavili ŭ kalidory trajnik, kab zmantavać dadatkovy radyjatar. Ale da pracioku heta ŭsio nie maje nijakaha dačynieńnia.
Minčuku nie daje spakoju i inšy niuans: čamu jašče na etapie ŭzhadnieńnia ramontu jaho nichto nie papiaredziŭ, što absłuhoŭvać sistemu aciapleńnia pavinien jon sam? Dy i jakim čynam možna heta zrabić? — ździŭlajecca Andrej. Pramoha dostupu da trub niama — treba raźbivać ściažku…
— Navat u Praviłach karystańnia žyłymi pamiaškańniami, utrymańnia žyłych i dapamožnych pamiaškańniaŭ (havorka ab pastanovie Saŭmina pad numaram 399) vyrazna napisana, što ramont sistemy centralnaha aciapleńnia nie ŭvachodzić u abaviazki ŭłaśnika. Ni pra jakija vyklučeńni tam nie skazana.
Tady Andrej uspomniŭ ab piacihadovaj harantyi ad zabudoŭnika i nakiravaŭsia naŭprost u ofis Dana Holdings. Adnak tam jaho čakaŭ jašče adzin siurpryz.
— Vyśvietliłasia, što harantyja raspaŭsiudžvajecca tolki na budaŭniča-mantažnyja raboty, a nie na abstalavańnie. Termin harantyi ŭ fitynha — usiaho adzin hod — i jon užo skončyŭsia. Vychodzić, ja pavinien samastojna jaho kuplać, vyklikać ramontnikaŭ, jakija jaho zamieniać… Jak ja pavinien byŭ pra heta zdahadacca, niezrazumieła: u damovie kupli-prodažu ab takich tonkaściach ničoha nie skazana.
Adziny varyjant, jaki zastavaŭsia našamu hieroju, — dakazać, što abstalavańnie niekarektna pastavili jašče na etapie budoŭli.
— Usio ž taki mnie ŭdałosia paćvierdzić toj fakt, što fitynh drenna zacisnuli, tamu truba i paciakła. Abiacali ŭsio vypravić.
Pakul materyjał rychtavaŭsia da publikacyi, u kvatery Andreja sapraŭdy praviali ramontnyja raboty. Praŭda, paŭtorna aciaplalnuju sistemu ŭsio jašče nie vyprabavali. Tamu siamja vymušanaja žyć biez aciapleńnia — jaho adklučyli niekalki tydniaŭ tamu, kali vyjavili praciok.
— Dobra, što ŭ nas stajać kandycyjaniery, jakija možna vykarystoŭvać i dla abahravańnia. Ale heta ŭsio roŭna nie vielmi dapamahaje: na dniach majo dzicia znoŭ zachvareła.
Pa słovach Andreja, u jaho domie byŭ jašče jak minimum adzin čałaviek z takoj prablemaj.
— U susieda źvierchu paciakła truba ŭ dakładna takim ža miescy. Dobra, što jon zaŭvažyŭ heta jašče na etapie ramontu. Sam i papraviŭ. Ale kolki jašče kvater u žyłym kompleksie mohuć mieć takuju niaspraŭnaść?
Jaŭhien Bury z ABBA raskazaŭ, kolki jaho biznes-asacyjacyja atrymała ad Jeŭrasajuza i na što patraciła18
Kamientary