Self-made man: historyja pośpiechu Paŭła Kałaŭra, repartaž ź jaho małoj radzimy
«Siarod dziejnych bankiraŭ Pavieł Kałaŭr — najlepšy varyjant», — kaža były staršynia Nacbanka Stanisłaŭ Bahdankievič, daviedaŭšysia pra pryznačeńnie svajho kolišniaha namieśnika. U subotu 27 śniežnia 2014 hoda Alaksandr Łukašenka nazvaŭ Paŭła Kałaŭra novym staršynioj Nacbanka.
Za dzień da taho padčas narady pa ekanamičnych pytańniach Nadzieja Jermakova, jašče ŭ statusie kiraŭnicy Nacbanka, raskazvała pra dalejšyja płany: «Z ulikam situacyi nie vyklučana, što [valutny] zbor budzie admienieny raniej [za 1 lutaha]. Moža być, jon budzie admianiacca pastupova».
U hety čas 52-hadovy staršynia praŭleńnia banka «BiełVEB» Pavieł Kałaŭr užo viedaŭ, što zmahacca z valutnym kryzisam daviadziecca jamu, a nie Jermakovaj.
Bankir akurat viarnuŭsia sa Stolinščyny, z rodnaj vioski Biełavuša, dzie paśpieŭ paviedamić svajakam pra novaje pryznačeńnie.
Tatarskaja šlachta
Kałaŭr razhladaŭsia ŭ jakaści kandydata na pasadu staršyni Nacbanka jašče ŭ 2011-m, kali terminova šukałasia zamiena zachvarełamu Piatru Prakapoviču. Ale tady vybar byŭ zrobleny na karyść «škłoŭskaj» Nadziei Jermakovaj, tahačasnaj kiraŭnicy «Biełarusbanka».
Čamu ŭsio ž nie Kałaŭr? Rodnaja siastra Paŭła Uładzimiraviča ličyć, što ŭ vysokich čynoŭnikaŭ uźnikli pytańni da dziŭnaha proźvišča bankira: ci nie jaŭrejskaje jano? U vyniku Kałaŭra pakinuli ŭ kadravym reziervie.
Isnuje niekalki varyjantaŭ pachodžańnia proźvišča, ale nivodnaje ź ich nie maje suviazi z habrejami. Niekatoryja daśledčyki ličać, što Kałaŭry viaduć svoj rod ad manhołaŭ. U tamtejšaj movie hetaje słova možna pierakłaści jak «voin, jaki niasie śmierć». Inšaja viersija źviazvaje proźvišča sa słovam «karavuł», a dakładniej, jahonym ciurskim adpaviednikam «kara avył» («achoŭvaj pasialeńnie»).
Tak ci inakš, proźvišča «Kałaŭr» było ŭklučana ŭ daśledavańnie «Hierboŭnik rodaŭ tatarskich u Polščy».
Na Pinščynie jość vioska Kałaŭravičy, radavy majontak šlachcičaŭ Kałaŭraŭ. Ichni staražytny hierb «Astoja» ŭpieršyniu źjaviŭsia ŭ XI stahodździ. Na im namalavanyja dva załatyja paŭmiesiacy, pamiž jakimi znachodzicca mieč.
U rodnaj vioscy žyvie try tysiačy čałaviek
Vioska Biełavuša pad Stolinam, dzie naradziŭsia Kałaŭr, — nietypovaja dla Biełarusi. Pa-pieršaje, jana ŭražvaje svaimi pamierami. Ad adnaho kanca vioski da druhoha — kala 7 kiłamietraŭ, heta jak ad płoščy Niezaležnaści da Nacyjanalnaj biblijateki ŭ Minsku. Numaracyja damoŭ na centralnaj vulicy «Lenina» pieravalvaje za 300!
Pa-druhoje, pahladzieŭšy na Biełavušu, nikoli nie skažaš, što biełaruskija vioski vymirajuć. Tut žyvie kala 3 tysiač čałaviek. U niekatorych siemjach hadujuć pa dziesiać dziaciej i navat bolš. Tłumačeńnie pryrostu nasielnictva prostaje — tut šmat jevanhielistaŭ.
Niedaloka ad Biełavušy znachodzicca viadomaja vioska Alšany, ahurkovaja stalica Biełarusi. Ziamla ŭ Biełavušy takaja ž uradlivaja, tamu fiermiery zaŭsiody šukajuć achvotnych papracavać. Apłata fiksavanaja — 200 tysiač rubloŭ za dzień. Rabotniki atrymlivajuć hrošy na ruki, ale pić nie iduć.
Pra Kałaŭra ŭ Biełavušy viedajuć usio. Babuli nazyvajuć 52-hadovaha bankira łaskava: «naš Paŭlik». U vioscy dahetul žyvuć jahonyja stareńkaja maci i siastra. Baćku pachavali niekalki miesiacaŭ tamu.
…Za dva dziasiatki hadoŭ pracy na najvyšejšym uzroŭni Pavieł Kałaŭr napisaŭ ź dziasiatak artykułaŭ dla «Bankaŭskaha vieśnika» i daŭ niekalki intervju. Ale adzinaja fraza «pra asabistaje» ŭ ich — zhadka, jak jon chadziŭ na balet «Ščaŭkunok» u vykanańni estonskich tancoraŭ.
Nina, siastra staršyni Nacbanka, aharošvaje z paroha: «Nijakich žurnalistaŭ. Brat zabaraniŭ raskazvać pra siabie choć štoniebudź. Jon zaŭsiody kaža: «Maje pytańni vyrašaju ja sam». U nas tak zaviedziena ź dziacinstva».
Ale paźniej jana ŭsio ž puskajecca va ŭspaminy. Baćki, Uładzimir i Hanna Kałaŭry, byli adnahodkami. Aboje miascovyja, ź Biełavušy. Jany ažanilisia dvaccacihadovymi. U siamji było troje dziaciej, Pavieł — samy małodšy.
«Jon byŭ schilny da matematyki. Jamu doma nikoli nie treba było čytać. Kali nastaŭnik skazaŭ, jon zapomniŭ. Vydatnaja pamiać była», — uzhadvaje siastra.
U 15 hadoŭ Pavieł vyrašyŭ pastupać u Pinski ŭlikova-kredytny technikum (ciapier Paleski ŭniviersitet). Baćki tady mocna chvareli. «Mama z tatam stali na kaleni: «Hospadzi, tolki b nie pastupiŭ i viarnuŭsia damoŭ». A jon pryjazdžaje ź Pinska i pakazvaje: voś, mama, majo imia ŭ haziecie! Dźvie «piaciorki» atrymaŭ… Hetaksama było, jak u Minsk pastupaŭ. Srodkaŭ małavata było… I taksama prasili Boha, kab jon nie prajšoŭ, kab viarnuŭsia dadomu dapamahać pa haspadarcy. Voś taki los byŭ», — raskazvaje Nina Uładzimiraŭna.
U 1980-m, skončyŭšy technikum, Kałaŭr staŭ studentam dzionnaha adździaleńnia narhasa, vučyŭsia pa śpiecyjalnaści «finansy i kredyt».
Žyćcio ŭ stalicy było składanym. «Dniom vučyŭsia, a ŭ načnyja źmieny razhružaŭ vahony. Stypiendyja ŭ tyja časy była słabieńkaja, a ŭ baćkoŭ asablivych resursaŭ nie było… Heta nie toje, jak pa błacie niechta praskočyŭ. Jon zza svajoj hałavy daloka pajšoŭ», — pierakananaja siastra.
Niahledziačy na vyprabavańni, Pavieł skončyŭ univiersitet z čyrvonym dypłomam. Na Zachadzie pra takich, jak jon, kažuć self-made man — usiaho dasiahnuŭ sam.
Praca ŭ pravincyi i viartańnie ŭ Minsk
Paśla narhasa Kałaŭr pačaŭ karjerny ŭzdym u rajonnych adździaleńniach Dziaržbanka SSSR. U Stoŭbcach jon byŭ ekanamistam, u Biarezinie — namieśnikam kiraŭnika, a Vałožynie ŭznačaliŭ adździaleńnie. Hety šlach zaniaŭ dva z pałovaj hoda.
U 1987-m u SSSR adbyłasia reforma, padčas jakoj byli stvoranyja śpiecyjalizavanyja halinovyja banki — «Aščadbank», «Źniešekanombank», «Prambudbank» i inšyja. Rajonnyja adździaleńni Dziaržbanka, jakija pieradusim absłuhoŭvali sielskuju haspadarku, pierajšli ŭ padparadkavańnie «Ahraprambanka».
Tak Kałaŭr staŭ kiraŭnikom Vałožynskaha adździaleńnia «Ahraprambanka». Paśla raspadu SSSR i akcyjanavańnia nazva źmianiłasia na «Biełahraprambank». Pieršym staršynioj praŭleńnia banka byŭ abrany Michaił Čyhir, budučy pieršy premjerministr Biełarusi.
«U 1993-m pa ŭzhadnieńni z Čyhirom ja zabraŭ Kałaŭra da siabie ŭ Minsk», — uzhadvaje Stanisłaŭ Bahdankievič, tahačasny kiraŭnik Nacbanka.
Uźlot Kałaŭra byŭ ašamlalnym — adrazu na pasadu namieśnika Nacbanka. «Jon nie tolki słužyŭ, ale i adstojvaŭ svaju pazicyju», — kaža Bahdankievič.
U Nacbanku Pavieł Kałaŭr zatrymaŭsia na doŭhija 17 hadoŭ. Jon pracavaŭ pad kiraŭnictvam i Stanisłava Bahdankieviča, i Tamary Vińnikavaj, i Piatra Prakapoviča. Ź ciaham času staŭ pieršym namieśnikam staršyni Nacbanka.
«Za» i «suprać» manietarnaha sajuza
Pačynajučy ź siaredziny 1990-ch, Rasija nastojvała na pierachodzie Biełarusi na ahulnuju valutu — status cajuznaj dziaržavy abaviazvaŭ. Biełaruskija elity mlava ihnaravali patrabavańni ŭschodniaha susieda.
Ekanamičnyja pieradumovy i nastupstvy manietarnaha sajuza stali temaj dysiertacyi Paŭła Kałaŭra, jakuju jon abaraniŭ u 2001-m u BDEU. «Na moj pohlad, jon zajmaŭ słušnuju pazicyju: maŭlaŭ, nie treba pierachodzić na rasiejski rubiel, pakul nie budzie poŭnaj ekanamičnaj intehracyi», — kaža Stanisłaŭ Bahdankievič. Prysutnyja na abaronie dysiertacyi ŭzhadvali, što Kałaŭru daviałosia niaprosta, kali jon adstojvaŭ svaju navukovuju pracu.
«U dysiertacyi jon zachavaŭ niezaležnuju pazicyju. A narhas zaŭsiody byŭ kansiervatyŭnym, na ŭzroŭni dacentaŭ i prafiesaraŭ zastavałasia šmat «saŭkovych» ludziej», — tłumačyć Bahdankievič.
U artykule (sumiesnym ź Iharam Rusakievičam) u «Bankaŭskim vieśniku» za luty 2000 Kałaŭr analizavaŭ plusy i minusy admovy ad nacyjanalnaj valuty. Siarod patencyjnych pieravahaŭ dla biełaruskaj ekanomiki daśledčyki nazyvali źniknieńnie kamisijnych vydatkaŭ, źviazanych z abmienam hrošaj na rasijskija rubli, a taksama stymulavańnie handlu miž dźviuma krainami. «Ale admova ad valutnaha kursa — heta admova ad samastojnaj hrašovakredytnaj palityki», — papiaredžvaŭ Kałaŭr. Jon zaklikaŭ bolš hłyboka daśledavać nastupstvy valutnaha sajuza.
Za 10 hod — try devalvacyi
Dziakujučy tannaj rasijskaj nafcie, 2000-yja byli hadami imklivaha rostu biełaruskaj ekanomiki.
«Ja ŭsio pytałasia ŭ jaho: «Brat, kali viernieš hrošy z aščadnych knižak?» — uzhadvaje siastra bankira. — A jon mnie: «Kolki naradaŭ było, stolki ja padymaŭ hetaje pytańnie, ale mianie nichto nie padtrymlivaje…»
Suśvietny kryzis padkasiŭ dabrabyt nasielnictva. 20%-naja adnamomantavaja devalvacyja, jakuju ŭłady zrabili ŭ 2009-m naŭprost na Novy hod, šakavała mnohich. Ale biełarusy abyšlisia małoj kryvioju, kali paraŭnać tuju situacyju z nastupnymi abvałami rubla.
U 2011-m, kali z kryzisam marna zmahalisia Prakapovič, a paśla i Jermakova, kurs vyras amal utraja.
Kałaŭra ŭ ich šerahach užo nie było. Za paŭhoda da abvału jon syšoŭ z Nacbanka. Zrešty, nie jon adzin.
Namieśniki Prakapoviča pierajšli ŭ pryvatnyja banki
U pačatku 2010-ch kiraŭnictva Nacbanka istotna źmianiłasia. Namieśnikaŭ Piatra Prakapoviča adpuścili ŭ svabodnaje płavańnie. Bankaŭskuju elitu zavabili da siabie biełaruskija dočki rasijskich bankaŭ. Rasiejcy byli hatovyja płacić vialikija hrošy za vopytnych śpiecyjalistaŭ, jakija mieli suviazi ź dziaržaŭnym aparatam.
Pavieł Kałaŭr uznačaliŭ bank «BiełVEB», ź ciaham času na pasadu jahonaha namieśnika pieraciahnuli Mikałaja Łuzhina. Vasil Maciušeŭski staŭ kiravać «BPS-Śbierbankam». A Juryj Ałymaŭ ciapier — niezaležny dyrektar VTB. Usie jany byłyja namieśniki staršyni Nacbanka.
Bankiry sychodzili pracavać na rasiejcaŭ sa zhody Alaksandra Łukašenki. Miarkujučy pa jahonych słovach, pry hetym jany davali niejkija abiacańni. «Ja pakul ad ich abiacanaj u svoj čas pracy i addačy nie baču. Heta asobnaja razmova», — abmoviŭsia ŭ 2013-m Łukašenka. A za hod da taho jon uvohule nazyvaŭ banki z zamiežnym kapitałam «zamiežnymi ahientami».
Vyhadnaja praca na Rasiju
Što takoje «BiełVEB», jaki u 2011-m uznačaliŭ Kałaŭr? Heta biełaruskaja dačka rasijskaj dziaržaŭnaj karparacyi «Vniešekonombank». U saviecki čas bank zabiaśpiečvaŭ ekspartnaimpartnyja apieracyi, a ŭ ciapierašniaj Rasii vykonvaje rolu «banka raźvićcia». Naprykład, kredytavaŭ budaŭnictva infrastruktury ŭ alimpijskim Sočy, rekanstrukcyju naftapierapracoŭčych zavodaŭ i aeraportaŭ. Staršynioj naziralnaj rady «Vniešekonombanka» źjaŭlajecca premjer-ministr Rasii Dźmitryj Miadźviedzieŭ. Nie dziva, što letaś bank trapiŭ pad sankcyi Zachadu.
Pracavać u takoj struktury zvyšvyhadna dla biełaruskich bankiraŭ. Znachodžańnie na dziaržaŭnaj słužbie, u tym liku ŭ Nacbanku, daje status, ale nie daje hrošaj. Pa słovach Nadziei Jermakovaj, apošnim časam jana zarablała kala $2000 na miesiac.
Na jakija sumy moh raźličvać Kałaŭr u «BiełVEBie»? Pa internecie hulaje ananimnaja spravazdača ab jahonych premijach za 2011 hod — nibyta kiraŭniku banka naličvali pa $30—40 tysiač u ekvivalencie.
Paćvierdzić ci abvierhnuć hetyja ličby niemahčyma, bo biełaruskija kampanii i banki nie abviaščajuć pamier uznaharody svaim topmieniedžaram.
Adnak možna pravieści anałohii z Rasijaj. U 2013 hodzie staršynia praŭleńnia «Vniešekonombanka» Uładzimir Dźmitryjeŭ atrymlivaŭ siaredni štomiesiačny dachod $250 tysiač, za hod da taho — pa $210 tysiač. Dźmitryjeŭ byŭ faktyčnym kiraŭnikom Kałaŭra.
A Kałaŭr byŭ dla rasiejcaŭ karysnym rabotnikam. Pad jahonym kiravańniem čysty prybytak «BiełVEBa» značna vyras, ahułam za čas staršynstva ŭdałosia zarabić amal $200 miljonaŭ.
Čysty prybytak «BiełVEBa»
2014* — $36,4 miljona
2013 — $46,7 miljona
2012 — $46,4 miljona
2011 — $61,3 miljona
2010 — $20,7 miljona
2009 — $11,6 miljona
2008 — $7,2 miljona
*za try kvartały hoda
Padtrymlivaŭ nacyjanalnyja prajekty
Banki pa ŭsim śviecie zajmajucca padtrymkaj sacyjalnych prajektaŭ. Nie vyklučeńnie i naša kraina.
«Biełahraprambank» źjaŭlajecca hienieralnym sponsaram Nacyjanalnaha alimpijskaha kamiteta, a «Biełarusbank» — hałoŭny partnior futbolnaha čempijanatu krainy. «BiełVEB» taksama arhanizoŭvaŭ spartyŭnyja mierapryjemstvy, naprykład, suśvietnaje pieršynstvo pa viełasporcie na treku ŭ Minsku.
«Pryncypova važna vybirać kirunki sponsarskaj padtrymki, supracoŭnictva, — tłumačyŭ Kałaŭr u intervju tut.by. — Pieradusim heta toje, što źviazana z našaj nacyjanalnaj kulturaj, uzajemadziejańnie z Nacyjanalnym histaryčnym muziejem, z teatrami».
Nabyvać histaryčnyja artefakty «BiełVEB» pačaŭ daŭno, adnak pry Kałaŭry byŭ nabrany jašče bolšy razmach.
Letaś u Nacyjanalnym histaryčnym muziei prezientavałasia vystava «Novaje žyćcio nacyjanalnych skarbaŭ» — čatyry zali kalekcyj «BiełVEBa». Siarod samych kaštoŭnych ekspanataŭ — karta VKŁ 1616–1630 hadoŭ, inicyjataram vydańnia jakoj byŭ Mikałaj Radzivił Sirotka, unikalnyja maniety kanca XIX stahodździa, a taksama «pojas Vitaŭta».
Inšy vialiki prajekt — faksimilnaje pieravydańnie poŭnaha zboru knih Francyska Skaryny. Miarkujecca, što da 2017-ha na hrošy «BiełVEBa» pabačyć śviet 20 tamoŭ.
Siamja bankiraŭ
Baćki Kałaŭra pražyli razam 63 hady. «Ź dziacinstva nas pryvučyŭ baćka: nikomu nie daviaraj. Praviaraj, ale nie daviaraj», — uzhadvaje siastra Nina. Pa jaje słovach, Pavieł, niahledziačy na zaniataść na pracy, rehularna pryjazdžaje ŭ rodnuju viosku, dapamahaje rodnym. «Stoł — heta zaŭsiody na im. Moža i sam niešta pryhatavać. Lubimuju stravu nie pryhadaju, bo daŭno ž razam nie žyviom. Ale ja zaŭsiody častuju jaho syrnikami», — kaža jana.
Jašče padčas vučoby va ŭniviersitecie Pavieł Kałaŭr paznajomiŭsia z budučaj žonkaj Łarysaj. Dziaŭčyna pachodziła z-pad Lidy. Ciapier jana — hałoŭny buchhałtar banka «Maskva-Minsk», novym ułaśnikam jakoha staŭ Nacbank.
U siamji Kałaŭraŭ vyraśli dvoje synoŭ. Siastra bankira kaža, što dzieci ź dziacinstva chacieli stać «jak baćka» i pajści jahonym šlacham. Tak jano i atrymałasia.
Alaksiej mieŭ dośvied pracy ŭ Maskvie, jahonaje imia fihuravała siarod hulcoŭ valejbolnaj amatarskaj kamandy «Śviaź-Banka» (99,5% akcyj naležyć «Vniešekonombanku»). Staršynioj rady dyrektaraŭ «Śviaź-Banka» pracuje Siarhiej Vasiljeŭ, jaki jašče niadaŭna pa sumiaščalnictvie źjaŭlaŭsia staršynioj naziralnaj rady «BiełVEBa». Ale niadaŭna na jahonaje miesca Alaksandr Łukašenka vyrašyŭ pasadzić adstaŭlenuju Nadzieju Jermakovu. Taksama imia Alaksieja Kałaŭra fihuravała ŭ jakaści hałoŭnaha mieniedžara «BPS-Śbierbanka».
U jahonaha brata Uładzimira ŭ sacyjalnaj sietcy taksama paznačana miesca pracy: «bank». Razam z žonkaj Irynaj jon haduje dvuch dziaciej.
Majontak na vulicy bankiraŭ
Jak i mnohija inšyja ŭpłyvovyja biełaruskija čynoŭniki, Pavieł Kałaŭr atrymaŭ ad dziaržavy mahčymaść pabudavacca ŭ elitnym rajonie stalicy. U 2007-m rašeńniem Minharvykankama byŭ stvorany «pasiołak bankiraŭ» na vulicy Vilejskaj. Tahačasny staršynia Nacbanka Piatro Prakapovič atrymaŭ 0,15 ha, a ŭsie jahonyja namieśniki — Pavieł Kałaŭr, Juryj Ałymaŭ, Mikałaj Łuzhin, Uładzimir Siańko, Mikałaj Kaduška i Vasil Maciušeŭski — pa 0,11 ha.
Siamja Kałaŭraŭ pabudavała dvuchpaviarchovy dom ź dźviuma terasami ahulnaj płoščaj 407 m2.
Kadastravaja cana takoha ŭčastka, jak u Kałaŭra, składaje kala $175 tysiač. Na rynku za takuju ziamlu z katedžam prosiać da miljona dalaraŭ.
Jašče niekalki hadoŭ tamu vulica Vilejskaja była častkaj katedžnaha pasiołka, ciapier vakoł jaje pačali budavać šmatpaviarchoviki novaha mikrarajona «Ržaviec» («Lebiadziny»), jakija buduć navisać nad damami bankaŭskaj elity.
Płan Kałaŭra
Na Paŭła Kałaŭra ŭskładzienyja vialikija čakańni. «Nacbanku dajucca samyja surjoznyja paŭnamoctvy dla naładžvańnia narmalna funkcyjanujučaj sistemy bankaŭskaj spravy ŭ krainie», — zajaviŭ Alaksandr Łukašenka, pradstaŭlajučy novaha staršyniu.
Što dla hetaha treba? Jak minimum unifikavać valutny kurs. Pakul ža ŭvieś śviet śmiajecca, ubačyŭšy ličby na tabło biełaruskich abmieńnikaŭ — nibyta kurs kupli vyšejšy za kurs prodažu.
Kałaŭr viedaje, što rabić. U 2000-m jon uznačalvaŭ hrupu pa vychadzie na adziny kurs. Zaklikaŭ da najchutčejšaj unifikacyi i ŭ 2011-m.
Toje, što «narabiła» Jermakova, Kałaŭr staŭ razhrabać ź pieršaha dnia pracy.
Usiaho za pracoŭny tydzień aficyjny kurs dalara vyras užo da 12 800 rubloŭ. Abnulili i valutny zbor na biržy. Siońnia vyrašycca, na jakim uzroŭni Nacbank zafiksuje «adziny» kurs dalara.
«Na moj pohlad, niepryncypova, jaki pryrost ekanomiki budzie ŭ nastupnym hodzie. … Pryncypova, kab my vyjšli na ŭzrovień inflacyi, jaki dazvoliŭ by kazać pra adnaznačny ŭzrovień inflacyi — mienš za 10%», — tłumačyŭ Kałaŭr svajo razumieńnie situacyi niekalki hadoŭ tamu.
Ale ci zdoleje jon adstajać svaju pazicyju ciapier? Takoha ž, jak jon, mierkavańnia prytrymlivajecca daradca Łukašenki Kirył Rudy, ale jamu apošnim časam supraćstajaŭ urad na čale ź Michaiłam Miaśnikovičam pry maŭklivaj zhodzie Administracyi prezidenta ŭ asobie Andreja Kabiakova.
«Urad nivodnaha kroku nie moh rabić biez zhody Kabiakova. Jon, pa sutnaści, hałoŭny vinavaty ŭ kryzisnym abvale. I jaho pierasoŭvajuć na pasadu premjera!» — aburajecca Stanisłaŭ Bahdankievič.
Były staršynia Nacbanka choć i kaža, što Pavieł Kałaŭr — najlepšaja kandydatura na rolu hałoŭnaha bankira, ale zaŭvažaje, što ad jaho ŭ ciapierašniaj situacyi mała što budzie zaležać: «Patrebnaja sumiesnaja prahrama pa pierachodzie na novuju madel rehulavańnia ekanomiki i novaja ekanamičnaja palityka».
* * *
Pavieł Kałaŭr
Naradziŭsia ŭ 1962 hodzie u vioscy Biełavuša na Stolinščynie. Skončyŭ Pinski ŭlikovakredytny technikum (1980), Biełaruski dziaržaŭny instytut narodnaj haspadarki imia Kujbyšava (1985). Kandydat ekanamičnych navuk (2001).
Pracavaŭ u Staŭbcoŭskim, Biarezinskim, Vałožynskim adździaleńniach Dziaržbanka SSSR (1985-1987), uznačalvaŭ Vałožynskaje adździaleńnie Ahraprambanka SSSR (paśla — «Biełahraprambanka») (1988-1993).
U 1993-2010 pracavaŭ u sistemie Nacbanka, spačatku namieśnikam staršyni praŭleńnia, z 1999 — pieršym namieśnikam. U 2010-2014 — staršynia praŭleńnia banka «BiełVEB». U kancy 2014 zaniaŭ pasadu staršyni praŭleńnia Nacbanka.
-
«Jak možna raźvivacca ŭ takoj sistemie?» Ekanamist krytykuje madeli, jakija ličylisia ŭzoram paśpiachovaści
-
Jakija vybary, takija i scenary. Čamu adrazu dva sparynh-partniory Łukašenki źniali svaju kandydaturu
-
Opcyi admaŭčacca ŭ spartsmienaŭ bolš niama. Ciapier nie tolki «nada», ale i pa pieršym ščaŭčku
Kali Kanapackaja stała całkam padkantrolnaja Łukašenku?16
Kamientary