Jak pracuje mikrachvalevaja pieč i čamu ŭsie dumajuć, što ŭ SSSR jany byli zabaronienyja
U internecie davoli časta možna sustreć mif pra toje, što mikrachvalevyja piečy nibyta byli zabaronienyja ŭ SSSR u 70-ch hadach. Kažuć navat, što sprava nie ŭ bojazi ŭsiaho zachodniaha, a ŭ tym, što savieckija navukoŭcy vałodali ŭnikalnymi danymi, pavodle jakich mikrachvalevyja piečy škodziać zdaroŭju, vyklikajučy roznyja vidy raku. Ciažka vyjavić pryčyny ŭźniknieńnia takoha mifa, adnak čarhovy taki artykuł, u jakim biaźlitasna demanizujecca mikrachvalevaja pieč, padšturchnuŭ nas zrabić artykuł pra historyju vytvorčaści mikrachvalovak u SSSR i ŭvohule historyju ich vynachodnictva.
Usio pačałosia ŭ ZŠA u dalokim 1945 hodzie. Inžynier kampanii Raytheon, jakaja śpiecyjalizavałasia na vytvorčaści vajennaj techniki, Piersi Śpiensier daśledavaŭ skanstrujavany im vypramieńvalnik zvyščastotnych mikrachvalaŭ, jakija pryznačalisia dla radara supraćpavietranaj abarony. Paśla niekatoraha pieryjadu pracy Śpiensier vyrašyŭ padsiłkavacca šakaładnaj cukierkaj, što była ŭ jahonaj kišeni. Niečakana navukoviec zaŭvažyŭ, što cukierka nahrełasia i pieraŭtvaryłasia ŭ šakaładnuju pastu. Tak pačałasia historyja raźvićcia SVČ-piečaŭ.
Uzrušany Piersi Śpiensier pačaŭ demanstravać unikalnyja ŭłaścivaści mikrachvalaŭ svaim kaleham: jon nahravaŭ kukuruznyja ziarniatki i pieratvaraŭ ich u papkorn, a ekśpierymient z kurynym jajkam nie atrymaŭsia — jano vybuchnuła.
8 kastryčnika 1945 hoda Piersi Śpiensier zarehistravaŭ patent na aparat dla pryhatavańnia ježy pry dapamozie elektramahnitnych chvalaŭ. Pieršyja piečy važyli bolš za 300 kh, byli vyšynioj z čałavieka i pryznačalisia dla vykarystańnia vajennymi ŭstanovami.
A praz dva hady, kali kanstrukcyja była ŭdaskanalenaja, kampanija Raytheon pačała pradavać svaje mikrachvalevyja piečy ŭsim achvočym pa košcie 3000 dalaraŭ.
Nastupnyja paŭtara dziesiacihodździa nad udaskanaleńniem mikrachvaloŭki pracavali śpiecyjalisty japonskaj firmy «Šarp». Ich pieršaja sieryja SVČ-piečaŭ źjaviłasia ŭ prodažy ŭ 1962 hodzie. Hetaja ž firma u 1966 hodzie raspracavała śpiecyjalnuju talerku, jakaja kruciłasia, kab strava mahła razahrecca raŭnamierna z usich bakoŭ. U 1979-m «Šarp» uviała mikrapracesarnuju sistemu kiravańnia, a ŭ 1999-m vynajšła pieršuju ŭ śviecie pieč z vychadam u internet.
Spravy ŭ SSSR
Tym časam raspracoŭkaj mikrachvalevych piečaŭ zajmalisia i ŭ Savieckim Sajuzie. Užo ŭ dalokim 1978 hodzie maskoŭski zavod «Płuton» raspačaŭ ich sieryjnuju vytvorčaść.
Savieckija mikrachvalevyja piečy «Elektronika» i «Dniapranka» nabyli šyrokuju papularnaść siarod pradstaŭnikoŭ namienkłatury. Vykarystoŭvalisia taksama i ŭ restaranach.
Adkul ža źjavilisia čutki pra toje, što SVČ-piečy byli zabaronienyja ŭ SSSR? Napeŭna, sprava ŭ tym, što vyrablałasia ich nastolki mała, što ŭ ludziej składałasia ŭražańnie, što ich naohuł niama. Dy i kaštavali jany duža doraha — naŭrad ci šarahovy saviecki hramadzianin moh dazvolić sabie takuju reč.
Što ŭnutry?
Praca SVČ-piečy zasnavanaja na troch asnoŭnych kampanientach: mahnietronie, chvalavodzie i transfarmatary.
Mahnietron — heta vakuumny prybor, što hienieruje vysokačastotnyja chvali, jakija i źjaŭlajucca asnovaj luboj mikrachvaloŭki.
Ale dla vypracoŭki mikrachvalaŭ zvyčajnaha napružańnia 220V niedastatkova, tamu siłkavańnie mahnietrona ažyćciaŭlajecca praz transfarmatar.
Dla astudžeńnia mahnietrona kanstruktary dadali vientylatar, jaki bieśpierapynna abdzimaje mahnietron pavietram.
Paśla mahnietrona chvali nakiroŭvajucca ŭ chvalavod — kanał ź mietaličnymi ścienkami, jakija adbivajuć vypramieńvańnie. Potym jany prachodziać praź filtr z łuščaku i traplajuć va ŭnutranuju kamieru piečy, dzie i ŭździejničajuć na ježu, nahravajučy jaje.
Andrej Dźmitryjeŭ źjeździŭ u Bundestah, kab davieści nieabchodnaść udziełu Łukašenki ŭ mirnych pieramovach10
Kamientary