Biełarus atrymaŭ prapanovu ad polskaj Google, ale staŭ biespracoŭnym. Praź vizavy skandał biełarusam usio čaściej admaŭlajuć u vizach

Zaprašeńnie ad Google

Raspracoŭščyk Fiodar u svaje 23 paśpieŭ skončyć BDU, try hady prapracavać u «Jandeksie» i atrymać ofier ad polskaha ofisa Google. Ale da pracoŭnaha miesca jon tak i nie dabraŭsia. Svaju historyju jon raskazaŭ dev.by i vykłaŭ na LinkedIn, kab «padśviatlić prablemu» i pieraścierahčy kaleh, jakija čakajuć ofier z-za miažy. 

— U žniŭni mnie pryjšła zachaplalnaja prapanova dałučycca da kamandy Google Poland u Varšavie, — kaža Fiodar.

— Praca — ahoń, moj dośvied vydatna pasuje, da taho ž u Polščy žyvie maja dziaŭčyna i niekalki siabroŭ. Tamu ja z hatoŭnaściu pryniaŭ ofier, admoviŭšysia ad inšych prapanoŭ i pierapyniŭšy astatnija sumoŭi. Zastavałasia atrymać vizu.

Z ofieram na rukach i zareziervavanaj dataj padačy na vizu raspracoŭščyk u vieraśni zvolniŭsia z «Jandeksa». Vizavuju zajavu jon padaŭ pry kancy kastryčnika ŭ VC Bresta i praz dva dni atrymaŭ admovu pa tak zvanym p. 10. To-bok u konsuła paŭstali «abhruntavanyja sumnievy» nakont dakładnaści zajaŭlenaj mety znachodžańnia.

— Heta było dziŭna, — kaža Fiodar. — Ja nikoli nie vykarystoŭvaŭ viz nie pa pryznačeńni i nie naviedvaŭ Polščy. Jašče bolš dziŭnym było toje, što konsulstva nie źviazvałasia ni z pracadaŭcam, ni sa mnoj i nie prasiła nijakich dadatkovych dakumientaŭ abo tłumačeńniaŭ.

U listapadzie raspracoŭščyk padaŭ apielacyju na admovu, prykłaŭšy dadatkovyja dakumienty, u tym liku list ad Google ab tym, što kampanija ŭsio jašče jaho čakaje, i list konsułu z vykładańniem asabistych pryčyn (+ dakumienty), jakija lišni raz dakazvali, što jon maje namier pracavać u Polščy.

Paźniej Fiodar daviedaŭsia, što heta typovaja dla biełarusaŭ prablema. Ciapier jon miarkuje, što konsulstvy dajuć admovy biełarusam randomna prosta dla statystyki, kab vykanać niejki spuščany źvierchu płan.

— Atrymlivajučy admovy z mutnaj arhumientacyjaj, zajaŭniki vymušanyja padavać adnolkavyja pakiety dakumientaŭ u VC roznych haradoŭ znoŭ i znoŭ, pakul nie atrymajuć vizy, — apisvaje jon situacyju, nie chavajučy prykraści. — Za kožnuju padaču treba zapłacić 100-200 jeŭra pasiaredniku i nieakreślena doŭha čakać zapisu.

Čym ža skončyłasia historyja

Jana jašče nie skončyłasia. Google prajaŭlaje dzivosy ciarpieńnia: na try tydni adterminavali dla pačatkoŭca pačatak pracy (ale ŭ novy dedłajn Fiodar taksama nie ŭpisvajecca) i ciapier čakaje płanu dziejańniaŭ ad vizavaha kansultanta kampanii Deloitte, jakaja supravadžaje mihracyju supracoŭnikaŭ. 

— Bieź jasnaha tajmłajnu i pry vialikaj kankurencyi, mahčyma, pracadaŭcu daviadziecca adklikać ofier, — kaža Fiodar. — Ale spadziajusia, što Google usio ž zmoža atrymać ad polskaha MZS aficyjnaje tłumačeńnie ich vizavaj palityki. Abo, mahčyma, mnie dazvolać pracavać addalena ź inšaj krainy ES, pakul situacyja nie vyrašycca.

Pracadaŭcy nie ŭ zachapleńni ad taho, što treba nieakreślena doŭha čakać zapisu na padaču, da taho ž z tumannaj pierśpiektyvaj — ci daduć, ci nie daduć. Heta adsiejvaje ludziej, jakija realna chočuć pracavać, pakidajučy tych, chto hatovy da pieramohi atrymlivać fejkavyja zaprašeńni.

Čamu jašče heta prablema

— Bo Polšča ciapier chab dla kampanij FAANG (piaciorka najbujniejšych bihtech-kampanij: Meta — były Facebook, Amazon, Apple, Netflix i Google — Red.) u Jeŭropie, za vyklučeńniem chiba što Meta, — kaža Fiodar. — U inšych krainach ES vakansij toj ža Google mała, i tam vysokaja kankurencyja. Pry hetym kampanii zachoŭvajuć statystyku admoŭ pa vizach i terminie ich vydačy, i cimlidy ŭličvajuć jaje pry vykacie ofieru. Viadoma, supierśpiecyjalista hatovyja čakać i hod, ale pry inšych roŭnych biełarusam ciažka kankuravać praź vizy.

To-bok biełarusam zakryvajuć hałoŭnuju darohu ŭ FAANG. 

Raspracoŭščyk śćviardžaje, što asabista sutyknuŭsia z admovaj na pačatkovym etapie sumoŭja ad kampanii Snowflake praz termin vydačy vizy.

— Mnie pryznačyli sustreču ź cimlidam, my pahutaryli pra dośvied i zadačy, nam usio spadabałasia, — raskazaŭ Fiodar. — Potym jon spytaŭ pra vizu i kali ja zmahu prystupić da pracy. Ja ščyra adkazaŭ, što ciapier vizu treba rabić minimum 1-2 miesiacy praz čas na zapis. Cimlid skazaŭ: «Zrazumieła», — i nieŭzabavie skončyŭ hutarku. Na poštu pryjšła admova biez tłumačeńnia pryčyn.

Jakuju navuku zdabyŭ raspracoŭščyk

— Ja nie vyvučyŭ situacyi ź vizami pierad tym, jak pryniać ofier. Darečy, usie inšyja maje ofiery taksama byli z Polščy. Ciapier ja b aryjentavaŭsia chutčej na inšuju krainu abo mieŭ by zapasny varyjant.

I jašče parada: prymajučy ofier u Polščy, budźcie aściarožnyja — nie zvalniajciesia ź ciapierašniaj pracy, pakul nie atrymajecie vizy.

• 2
• 0
• 1
• 3
• 0
• 4
• 3
• 0