Alaksandr Łukašenka 18 žniŭnia pryznačyŭ Siarhieja Rumasa kiraŭnikom urada. Rumas užo vośmy premjer za časy kiravańnia ciapierašniaha prezidenta.
Chto ž taki spadar Rumas? «Naša Niva» prapanuje najbolš cikavyja fakty ź bijahrafii čynoŭnika.
Baćka pracavaŭ va ŭradzie Kiebiča
Admietna, što Siarhiej — heta nie pieršy Rumas, jaki pracavaŭ u biełaruskim uradzie. Sprava ŭ tym, što Siarhiej Rumas — patomny finansist. Baćka vice-premjera Mikałaj Pilipavič Rumas naradziŭsia ŭ 1947 hodzie ŭ Turavie. Jon skončyŭ narhas. I pa raźmierkavańni nakiravaŭsia ŭ Homiel, dzie pracavaŭ u finansavych i kantrolna-revizijnych orhanach. Mienavita ŭ hety čas, u 1969 hodzie, u Mikałaja Pilipaviča i Volhi Lavoncieŭny Rumasaŭ naradziŭsia syn Siarhiej. Potym baćku nakiravali na pavyšeńnie ŭ Minsk. Ad 1976 hoda jon uvieś čas pracavaŭ u centralnym aparacie Ministerstva finansaŭ BSSR pry Balasłavu Šaciłu.
U 1990 Rumas-starejšy byŭ pryznačany pieršym namieśnikam ministra finansaŭ. U niejki pieryjad, kali z pasady byŭ źniaty Pavieł Dziki, a Mikałaj Korbut jašče na jaje nie zastupiŭ, jon vykonvaŭ abaviazki ministra. Ale na vidnyja roli Rumas nikoli nie imknuŭsia. Darečy, maci vice-premjera — taksama ekanamistka pa adukacyi. Jana bolš za 30 hadoŭ adpracavała vykładčycaj u Minskim finansava-ekanamičnym kaledžy. Jaje kolišnija studenty i siońnia dobrym słovam zhadvajuć Volhu Lavoncieŭnu.
Sychodziŭ z Nacbanka ŭ kamiercyju
Što datyčyć Rumasa-małodšaha, to jon, što nie dziŭna, pa śladach svaich baćkoŭ taksama pastupaje na finansy. Vučycca ŭ Jarasłaŭli ŭ vajskova-finansavym vučyliščy pa śpiecyjalnaści «Finansavaje zabiaśpiečeńnie vojskaŭ». Praŭda, paśla razvału SSSR prafiesii jon mieŭ spres cyvilnyja.
Adrazu pa dembieli Rumasa prymajuć na pracu načalnikam ulikova-apieracyjnaha, kredytnaha i ekanamičnaha adździełaŭ śpiecyjalizavanaha ŭpraŭleńnia Nacbanka. Ale pieryjad pracy ŭ Nacbanku akazaŭsia niadoŭhim. U siaredzinie 1990-ych Rumas, jak i mnohija inšyja ŭ toj čas, mianiaje dziaržaŭnuju pracu na kamiercyjnuju dziejnaść. Ciaham dvuch hadoŭ jon zajmaje vysokija pasady ŭ dvuch pryvatnych bankach: «Paŭnočny Zachad» i «Sadružnaść».
Zrabiŭ «Biełahraprambank» adnym z najlepšych
U 1995 Siarhiej Rumas prychodzić na pracu ŭ «Biełarusbank». Tam jon spačatku ciaham siami hadoŭ uznačalvaje filijał, a potym padymajecca pa karjernaj leśvicy da namieśnika staršyni praŭleńnia banka. U vieraśni 2005 hoda Łukašenka pryznačaje Rumasa staršynioj «Biełahraprambanka», dzie jon znachodziŭsia da pryznačeńnia na pasadu vice-premjera.
Za čas kiravańnia Rumasa ŭ «Biełahraprambanku» kolkaść układčykaŭ pavialičyłasia ŭ paŭtara razy. Bolš čym u try razy vyras abjom depazitaŭ fizičnych asob. A abjom kredytavańnia nasielnictva — u 25 razoŭ. Aŭtarytetnyja jeŭrapiejskija finansavyja vydańni nazyvali «Biełahraprambank» najbolš stabilnym u Biełarusi.
«Mahu dazvolić sabie być demakratyčnym kiraŭnikom. Ale, na žal, jość takija pytańni, jakija patrabujuć ad mianie pryniaćcia žorstkich i nie zaŭsiody papularnych rašeńniaŭ», — pryznavaŭsia Rumas u adnym ź intervju.
Krytykavaŭ Nacbank, kali byŭ vice-premjeram
Ad śniežnia 2010 da lipienia 2012 Siarhiej Rumas papracavaŭ vice-premjeram. Zaprasiŭ jaho na hetuju pracu tahačasny premjer Michaił Miaśnikovič. Sprava ŭ tym, što Miaśnikovič i baćka Rumasa byli dobra znajomyja jašče za časami supolnaj pracy ŭ Kiebiča. Mahčyma, heta nakłała svoj adbitak.
Heta pryjšłosia na čas žorstkaha valutnaha kryzisu. Cikava, što Rumas nie padtrymlivaŭ tuju palityku, jakuju viali tahačasny staršynia Nacbanka Piatro Prakapovič i pamočnik prezidenta pa ekanomicy Siarhiej Tkačoŭ. Heta nieadnarazova vylivałasia ŭ publičnuju krytyku.
Kamientujučy lehalizacyju Nacbankam pavyšanaha kursu dalara dla pradpryjemstvaŭ, u pryvatnaści, jon zaznačyŭ: «Adchileńnie ŭ 10% možna aceńvać i nazyvać pa-roznamu, ale, pa sutnaści, my viartajemsia da množnaści valutnych kursaŭ. I było b dobra, kali b heta 10%-je adchileńnie aficyjnaha kursu vyrašyła prablemu, ale tyja sihnały, jakija pasyłaje rynak, kažuć pra toje, što hetaha vidavočna niedastatkova». Rumas faktyčna vystupiŭ suprać palityčna matyvavanaha zanižeńnia kursu rubla. Pry hetym u efiry dziaržaŭnych telekanałaŭ jon admaŭlaŭsia krytykavać prahramy apazicyi.
Cikava, što potym u adnym ź intervju jon nazavie Piatra Prakapoviča bolšym libierałam, čym jon sam. Vice-premjeram Rumas adpracavaŭ niadoŭha, jaho adpravili ŭ Bank raźvićcia, dzie jon i byŭ apošnija šeść hadoŭ.
Dabiŭsia, kab na trybunach dazvalali «Pahoniu» i BČB-ściahi
Ad krasavika 2011 hoda Siarhiej Rumas taksama źjaŭlajecca kiraŭnikom Biełaruskaj fiederacyi futboła. Varta adznačyć, što vysokija pasady nikoli nie zaminali jamu naviedvać futbolnyja matčy. Zachapleńnie hetym sportam jon zajmieŭ jašče ad časoŭ minskaha «Dynama» ŭ čempijanacie SSSR, chadziŭ na hulni małafiejeŭskaj kamandy ŭ Minsku.
Vializnych pośpiechaŭ zbornaja Biełarusi za čas kiravańnia BFF Rumasam nie dasiahnuła. Naadvarot, prajhravała navat u takich matčach, jakija prajhravać nielha. A voś BATE i minskaje «Dynama» vychodzili stabilna ŭ hrupavyja stadyi Lihi čempijonaŭ i Lihi Jeŭropy. Zrešty, ciažka skazać, ci jość tut zasłuha Rumasa.
Cikavy fakt pra budučaha premjera. Padčas aficyjnaj hulni ŭ Barysavie Biełaruś — Makiedonija byli zatrymanyja i adpraŭlenyja ŭ izalatar zaŭziatary ź bieł-čyrvona-biełymi ściahami na šalikach i «Pahoniami». Siarod ich, naprykład, byŭ Źmicier Chviedaruk. BFF adrazu stała na abaronu zaŭziataraŭ.
Rumas asabista chadziŭ na razmovy ź ministram unutranych spraŭ Iharam Šunievičam i tłumačyŭ, što zatrymlivać za takoje — niedapuščalna. Na dadzieny momant nacyjanalnaja simvolika dazvolenaja na biełaruskich stadyjonach. Užo daŭno niama vypadkaŭ, kali ludziej zatrymlivali za jaje. Jość tut i zasłuha Rumasa.
Pryznavaŭsia funkcyjanier i ŭ tym, što jamu padabajecca «bieła-čyrvonaja» koleravaja hama, kali pradstaŭlaŭ novuju formu zbornaj pad nazvaj «Biełyja kryły».
Zapuściŭ u Turavie vypusk vydatnych syroŭ
Bankam raźvićcia byŭ pabudavany i zapuščany z nula Turaŭski małočny kambinat. Darečy, zroblena heta było na radzimie baćki Rumasa.
Ideja ŭvohule naradziłasia z taho, što ŭ čas pracy ŭ «Biełahraprambanku» Rumas časta byvaŭ u kamandziroŭkach u Italii, dzie i zachapiŭsia ich syrami. Uźnikła ideja pieranieści vytvorčaść niekatorych hatunkaŭ u Biełaruś. Tak i źjaviŭsia brend Bonfesto. Vializnaja kolkaść syroŭ hetaha pradpryjemstva idzie na ekspart. Sam Rumas kazaŭ, što turaŭski prajekt — heta vydatny simbijoz pryvatna-dziaržaŭnaha partniorstva.
Bonfesto vypuskaje takija hatunki syroŭ, jak rykota, kremole, maskarpone, pravoła, macareła. Hetyja pradukty zaŭsiody karystajucca vialikaj papularnaściu.
Šmatdzietny baćka i fanat palavańnia
Žonka Siarhieja Rumasa pracuje stamatołaham u miedycynskim centry «Karona». U pary až čaćviora synoŭ. Starejšy Valeryj skončyŭ ekanamičny fakultet BDU, paśla vučyŭsia ŭ Łondanie, ale viarnuŭsia ŭ Biełaruś. Mienšych synoŭ zavuć Maksim, Siarhiej i Filip.
Rumas u Kałodziščach maje baćkoŭski dom, plus da ŭsiaho dabudoŭvajecca ŭ Drazdach-2 na pieršaj bierahavoj linii.
A voś chobi ŭ Rumasa dastatkova kryvažernaje. Jon fanat palavańnia. Pryčym navat lotaje dziela takoha zadavalnieńnia ŭ Afryku. «U mianie taksama jość niadrennyja trafiei, u asnoŭnym palaŭničyja. Samy bujny — iłand vahoj u tonu. Zdabyŭ u Afrycy. Časam udała stralaju husiej. Niadaŭna abnaviŭ asabisty rekord. Nie ŭśmichajciesia, ja nasamreč lublu palavańnie na husiej», — skazaŭ były vice-premjer Rumas u intervju «Trybunie». Iłand — heta vintarohaja antyłopa.
Kamientary