Pra što moža sihnalizavać častaja piakotka — niekalki važnych parad doktara
Mała tych, chto nikoli nie mučyŭsia žudasnym stanam, kali paśla abiedu ci viačery ŭ hrudziach mocna piače, a ŭ rocie źjaŭlajecca adčuvańnie horyčy. Čamu ŭźnikaje takaja niepryjemnaja źjava jak piakotka i ŭ čym jaje niebiaśpieka dla arhanizma — tłumačyć doktar-hastraenterołah Volha Panies.
«Piakotka ŭźnikaje, kali kisłata sa straŭnika traplaje ŭ stravavod. Salanaja kisłata, jakaja znachodzicca ŭ straŭniku, vielmi ahresiŭnaja. Ślizistaja abałonka straŭnika ad hetaj kisłaty abaronienaja, a voś ślizistaja stravavoda — zusim nie», — raskazvaje Volha Panies.
Ježa moža padymacca ŭvierch, u stravavod pa niekalkich pryčynach.
«Naprykład, kali vy pierajeli, pierapoŭnieny straŭnik nie dazvalaje całkam začynicca nižniamu stravavodnamu śfinktaru. Salanaja kisłata traplaje ŭ stravavod, razdražniaje ślizistuju, i čałaviek adčuvaje niepryjemnaje paleńnie ŭ horle», — udakładniaje doktar.
Čaściej za ŭsio piakotku vyklikaje mienavita niapravilnaje charčavańnie: ježa ŭsuchamiatku, pierakusy na chadu, tłustaja ježa, šakaład, złoŭžyvańnie kavaj, zachapleńnie fast-fudam, čypsami, sucharykami.
«Kali vy zaŭvažyli, što peŭny pradukt vyklikaje ŭ vas pačućcio paleńnia, to, viadoma, samaje lepšaje vyjście — nazaŭsiody ad jaho admovicca. Kab chutka źniać niepryjemnaje adčuvańnie, možna vypić sody, hašanaj vocatam. Jana niejtralizuje kisłatu ŭ stravavodzie. Ale złoŭžyvać takim mietadam nie varta — možna naškodzić arhanizmu kudy bolej. Lepš usio ž abrać admysłovyja leki ad piakotki, papiarednie prakansultavaŭšysia z doktaram», — źviartaje ŭvahu Volha Panies.
U aptekach vam mohuć prapanavać hieli ad piakotki, jakija zdymajuć niepryjemnyja adčuvańni. Heta palepšyć ahulny stan, ale, viadoma, nie harantuje, što nie spatrebicca iści da doktara.
Kansultacyja sa śpiecyjalistam — zaŭsiody samaje pravilnaje rašeńnie, bo piakotku moža vyklikać nie tolki ježa, jakaja vam nie padychodzić.
«Treba źviartać uvahu, ci źjaŭlajecca piakotka tolki tady, kali vy źjaście niešta nie toje. Kali pačućcio paleńnia źjaŭlajecca bieź vidavočnych na toje pryčyn — heta pramaja daroha da terapieŭta», — akcentuje Volha Panies.
Siarod samych raspaŭsiudžanych pryčyn, jakija mohuć vyzyvać piakotku, doktar-hastraenterołah nazyvaje nastupnyja.
«Pa-pieršaje, piakotka moža być vynikam taho, što vy pieraniervavalisia. Arhanizm reahuje na stres źjaŭleńniem cełaha šerahu chvarob: zapaleńnia ślizistaj stravavoda, erozii straŭnika, hastrytu, jazvy straŭnika i dvanaccacipiersnaj kiški. Piakotka — heta ahulny simptom dla ŭsich vyšejpieraličanych zachvorvańniaŭ, — kaža Volha Panies. — Tryvožnym zvanočkam moža być piakotka, jakaja raptoŭna ŭźnikaje pasiarod nočy. Jana moža śviedčyć pra raźvićcio złajakasnych puchlin u vobłaści stravavoda i straŭnika. Častaje ŭźniknieńnie piakotki moža sihnalizavać i pra chvaroby sardečna-sasudzistaj sistemy. Tamu marudzić ź vizitam da śpiecyjalista nie varta, bo luboje zachvorvańnie zaŭsiody lepš vyjavić na rańnich stadyjach. Učastkovy terapieŭt vam pryznačyć peŭnyja analizy, i, kali heta budzie nieabchodna, nakiruje da hastraenterołaha».
Treba skazać, što piakotka — taja chvaroba, na jakuju pakutujuć va ŭsim śviecie. Biełarusy tut nie vyklučeńnie.
«Časta pryčyna ŭ našaj lanocie i ŭ niežadańni dumać pra toje, što my ŭžyvajem u ježu. Pierachapili niešta na chadu, u čarhovy raz addali pieravahu vuličnaj ježy — adkul ža budzie zdarovy straŭnik? — uzrušajecca doktar-hastraenterołah.
Kab paźbiehnuć piakotki, jakuju vyklikaje niapravilnaje charčavańnie, Volha Panies daje nastupnyja rekamiendacyi.
— Ješcie časta i nievialikimi porcyjami — heta dapamoža paźbiehnuć vialikaj nahruzki na straŭnik.
— Admoŭciesia ad vostrych, smažanych, tłustych straŭ, kisłych napojaŭ, časnaku, syroj cybuli, kisłaj sadaviny, abmiažujcie siabie ŭ šakaładzie, ałkaholi, kavie, nie picie mocny čaj. A voś kavałačak sała raz na tydzień možna sabie dazvolić. Tłušč patrebny arhanizmu, i lepš chaj arhanizm atrymaje jaho tak, čym vy štodzionna budziecie zabivać straŭnik tłustaj ježaj.
— Nie kładziciesia paśla abiedu adpačyvać. U haryzantalnym stanoviščy ježa sa straŭnika vielmi prosta traplaje ŭ stravavod. I nie nachilajciesia paśla ježy, dajcie vašamu abiedu zasvoicca.
— Nie najadajciesia na noč. Viačerać možna jak minimum za 2 hadziny da snu.
— Nie nasicie ščylnaje adzieńnie, nie zaciahvajciesia tuha ramianiom, dazvolcie sabie dychać narmalna.
Volha Panies kaža, što lekaŭ dla prafiłaktyki piakotki daktary nie pryznačajuć.
«Nielha zahadzia vypić jakuju-niebudź tabletku ci miksturu i być upeŭnienym, što vam udasca paźbiehnuć niepryjemnaściaŭ sa stravavańniem. Lepš za ŭsio prytrymlivacca miery va ŭsim. I ŭ luboj niezrazumiełaj situacyi — adrazu da doktara», — padsumoŭvaje Volha Panies.
Kamientary