«Jany absalutna adekvatnyja» — u kamandu homielskaha błohiera MozgOn uvajšli «žyvyja čałavieki», adepty BSSR
Lidar partyi BSDP «Hramada» Ihar Barysaŭ źviarnuŭ uvahu, što na homielskim pikiecie z udziełam błohieraŭ źjavilisia prychilniki BSSR, tak zvanyja «žyvyja čałavieki» sa svaimi samarobnymi paśviedčańniami.
Spačatku navat prajšła infarmacyja, što hetyja paśviedčańni razdavaŭ błohier MozgOn (Uładzimir Cyhanovič, 40 tysiač padpisčykaŭ u Jutubie). «Naša Niva» źviazałasia z błohieram, kab jon rastłumačyŭ, što adbyvajecca.
«U nas sfarmiravałasia koła adnadumcaŭ, jany padtrymlivajuć pytańni, jakija my padnimajem na Jutubie. U kamandzie jość roznyja ludzi. Siarod ich jość i tyja, chto namahajecca zakonnymi sposabami syjści ad jurysdykcyi siońniašniaj ułady. Heta asobny šlach, pa jakim jany iduć», — paviedamiŭ błohier.
Paśla Cyhanovič ścisła pierakazaŭ pazicyju «žyvych čałaviekaŭ»: tyja ličać, što Respublika Biełaruś nie atrymała adpaviednyja akty ad SSSR, tamu ŭsio navokał niezakonnaje (padrabiaźniej pra pazicyju fryk-supołki «žyvych čałaviekaŭ» čytajcie tut). Cyhanovič padkreśliŭ: jon sam nie naležyć da adeptaŭ BSSR, adpaviednych «dakumientaŭ» nie maje i ich nie razdaje.
Paśla jon raspavioŭ, što za historyja z paśviedčańniami «žyvych čałaviekaŭ».
«Heta byŭ pikiet u Homieli z udziełam błohieraŭ. I na pikiecie padyšła milicyja i zapatrabavała dakumienty. Jany [»žyvyja čałavieki»] skazali: a navošta vam našy dakumienty? Ja prosta čałaviek, mianie zavuć prosta Pavieł. Milicyja nastojvała, kab dali dakumient. Tady toj Pavieł daŭ svajo paśviedčańnie «čałavieka SSSR». Milicyja spytała: a što heta takoje? Jon adkazaŭ: heta dakumient taki, vaźmicie, pahladzicie.
Nichto nijakija dakumienty ci «pašparty BSSR» nikomu nie razdavaŭ. Heta nie była razdača ci rekłamnaja kampanija», — zapeŭniŭ błohier.
Praŭda, sam jon nijakich prablem u supracoŭnictvie z «žyvymi čałaviekami» nie bačyć.
«Jany našyja prychilniki, i ja da ich pazicyi staŭlusia spakojna. Heta pazicyja cikavaja, ja naziraju, što ŭ ich atrymajecca. Nakont dakumientaŭ jany vielmi dakładna viaduć stasunki z našymi dziaržorhanami. Jany kažuć: «Jość zakon pra vybary, Vybarčy kodeks… Pakažycie nam padpisanyja dakumienty»! A naša dziaržava hetaha pradstavić nie moža.
Jany absalutna adekvatnyja. I ja čuju ad ich adkazy na maje pytańni. Jany kažuć: «Savieckaje paśviedčańnie ab naradžeńni pryznanaje ŭ Biełarusi? Tak. Što tam napisana: hramadzianin BSSR. Jaho nichto nie mianiaŭ. Heta ž dakumient? Dakumient!»
Ja nie toje kab padzialaju, ale razumieju ich pazicyju. A vaźmicie našu dziaržavu: Vybarčy kodeks — taksama dakumient, ale padpisany Vybarčy kodeks pakazać mnie nie mohuć.
I voś kamu bolš viery: dziaržavie ci hetym chłopcam? Pačynaju raźbiracca, chto adekvatny. I razumieju, što jany [adepty BSSR — «NN»] našmat bolš adekvatnyja za našu dziaržavu, bo jany prynosiać dakumienty i pakazvajuć ich», — patłumačyŭ Cyhanovič.
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8181
Kamientary