Videabłohier Cichanoŭski pieranios pratesty z anłajna na vulicy. I akazałasia, što «kraina dla žyćcia» zakipaje
Na hetych sustrečach nie kryčać patryjatyčnaje «Žyvie Biełaruś!» Tut papularny inšy łozunh, poŭny rospačy i nianaviści, «spynić tarakana».
Apošnija razy ludzi stychijna vychodzili na vulicy ŭ 2017-m, kab pratestavać suprać dekreta ab darmajedach.
U vyniku dekret zamarozili, a Dzień Voli ŭ Minsku razahnali.
Ale pakrysie ŭ rehijonach prajaŭlajucca abrysy novaj palityčnaj aktyŭnaści, jakuju ŭžo niemahčyma nie zaŭvažać.
Imavierna, niejkuju rolu hraje niepapularnaja karanavirusnaja palityka, ale asnoŭnym katalizataram novych pratestaŭ stała dziejnaść homielskaha błohiera Siarhieja Cichanoŭskaha, jaki prydumaŭ youtube-kanał «Strana dla žiźni», ciapier tam 142 tysiačy padpisantaŭ.
Kali raniej tezisy pra nielehitymnaść ułady, žabrackija piensii i zaniadbanuju pravincyju ahučvali pieravažna «aficyjnyja» apazicyjaniery, to ŭ farmacie adkrytaha mikrafona Cichanoŭskaha ciapier toje ž samaje pramaŭlajuć biełaruskija rabočyja i piensijaniery, tolki ŭžo ŭ nieintelihientnaj formie.
Cichanoŭski jeździć pa krainie, aśviatlaje niezaŭvažnyja prablemy maleńkich ludziej i hetym stvaraje svoj palityčny kapitał, pavialičvajučy maštab zaklikami sabracca razam pry nastupnym pryjeździe ŭ niejki horad.
Udzielnikaŭ nie nadta šmat, zvyčajna da jaho prychodziać niekalki dziasiatkaŭ čałaviek. U małych haradach — jašče mienš.
Ale hetyja sustrečy całkam možna nazvać palityčnymi, choć tam i niama, naprykład, zvykłaj apazicyjnyj atrybutyki, kštałtu zabaronienaha nacyjanalnaha ściaha: aŭdytoryju Cichanoŭskaha pieradusim chvalujuć ekanamičnyja i sacyjalnyja pravały ŭładaŭ.
Na hetych sustrečach nie kryčać patryjatyčnaje «Žyvie Biełaruś!», tut papularny inšy łozunh, poŭny rospačy i nianaviści, «spynić tarakana» — aluzija na viadomuju kazku Čukoŭskaha «Tarakanišča».
Cichanoŭski robić pa dva dziasiatki videa ŭ miesiac, ich prahlady na YouTube, jak i kolkaść kamientaŭ, salidnyja, jany znachodziać vodhuk u aŭdytoryi. Tak, manałoh žycharki Hłybokaha pahladzieła 700 tysiač čałaviek. Heta rekordnaje pa kolkaści prahladaŭ videa.
Videa z sustreč u haradach hladziać ad dziasiatkaŭ da socień tysiač čałaviek.
«My viarnulisia ŭ 90-ja, lepš nie stanovicca: u kramie babulka biare dźvie sasisački, a takaja ž jeŭrapiejskaja babula jedzie hladzieć śviet!» — kazali Cichanoŭskamu ŭ Hrodnie.
«Za 26 hod ni razu nie pryznaŭ svaich pamyłak, usie navokał vinavaty. A čynoŭniki — vy što, idyjoty, što kivajecie hałavoj na ŭsio, što jon kaža? Jon kaža čynoŭnicy, što traktar vylečyć, jana kivaje — słuchaj, što ty kivaješ, ty dziaciej svaich tak lačyć budzieš?» — kazali ŭ Navapołacku.
U Viciebsku zaklikali iści naziralnikami na vybary i ŭ vybarčyja kamisii, pravodzić hramadzianskija zatrymańni falsifikataraŭ.
«U mianie zarobak 370 rubloŭ, zarobki žabrackija, jak pabudavać kvateru? Nas u mamy 9 čałaviek, usim nie dapamohuć baćki. Siabra siadzić na karancinie ŭ Ispanii, siamja tut — nie ad dobraha žyćcia jon tudy pajechaŭ? Ja sama svajho muža ledź baču», — kazali jašče dzieści.
Padčas čarhovaj sustrečy padpisantaŭ jutub-kanała «Kraina dla žyćcia» 5 maja ŭ Mahilovie zdaryŭsia admietny kanflikt.
Siarhiej Cichanoŭski pradbačyŭ sprobu zatrymańnia, i, kali mašyna błohiera pryjechała na miesca sustrečy, ź jaje vyjšaŭ padobny kamplekcyjaj čałaviek u miedycynskaj mascy, jaki akazaŭsia nie Cichanoŭskim.
Milicyja pasprabavała zatrymać i jaho, ale sutyknułasia z adporam padpisantaŭ kanała.
«Vy tut nikoha nie zabieracie, tavaryš major, jedźcie dadomu», — skazaŭ aficeru mužčyna praletarskaha vyhladu, jaki stajaŭ u žyvym ščycie vakoł kopii błohiera.
U vyniku nievialikaj šturchaniny i moŭnych pikirovak milicyja adstupiła, jaje praviali krykami «Hańba» i apładysmientami.
Hetyja prychilniki Cichanoŭskaha tolki adkryvajuć dla siabie toje, z čym užo da taho sutyknułasia palityzavanaja staličnaja publika, — siłavy cisk milicyi.
Cichanoŭskaha ŭsio ž zatrymali z dapamohaj AMAPa na nastupny dzień, pasadziŭšy pad vartu ci to ŭ Mahilovie, ci to ŭ Homieli.
Ale admietna, što paśla zakliku ŭ internecie niekalki dziasiatkaŭ padpisantaŭ «Krainy dla žyćcia» sabralisia la izalatara, kab pad daždžom patrabavać vyzvaleńnia Cichanoŭskaha.
U pres-słužbie MUS «Našaj Nivie» skazali, što pakul nie viedajuć pryčyny jaho zatrymańnia.
Vyjšli ŭ padtrymku Cichanoŭskaha i ŭ Minsku, dzie jon mieŭsia vieści strym — i na Niamizie, i, na mašynach, na MKAD.
Strym ź Niamihi siłavyja struktury zahłušyli za 15 chvilin, jon paśpieŭ sabrać paŭtary tysiačy łajkaŭ.
Vialikim pytańniem było i zastajecca, na jakija srodki dziejničaje błohier. Jaho padazravali ŭ supracy ci to z rasijskimi, ci to z zachodnimi fondami, niechta ŭkazvaŭ na nienazvanych biełaruskich biznesmienaŭ.
Čytajcie taksama: Raniej fotkaŭsia z Sabčak, ciapier — ź Sieviaryncam. Chto taki palityčny błohier Siarhiej Cichanoŭski?
Ale siońnia fakty takija: ad manietyzacyi Youtube-kanała z takimi ličbami prahladaŭ Cichanoŭski atrymlivaje kala $700 štomiesiac, jamu taksama aktyŭna pieravodziać achviaravańni ŭ adkaz na zaklik padtrymać dziejnaść.
Kolkaść pieravodaŭ, naturalna, nieviadomaja, ale niekatoryja ź ich adbyvalisia na kraŭdfandynhavych placoŭkach — tam lohka źbirałasia ŭ razy bolej, čym prasiłasia.
Videa Cichanoŭskaha pakazvajuć, što ŭ mnohich biełaruskich haradach situacyja dasiahnuła punktu kipieńnia. Ułady Biełarusi sprabujuć adkazać na heta tymi ž mietadami, jakimi dziejničali apošnija hady — kropkavymi represijami.
Bajpoł nazvaŭ imiony mahčymych zabojcaŭ Andreja Zielcara. I zajaviŭ, što siłavika «Nirvanu» zastreliŭ svoj ža6
Kamientary