Advakat Cichanoŭskaha: Siarhiej skazaŭ, što hatovy žyć z žonkaj-prezidentam. A Śviatłana stała jašče pryhažejšaj
Pra heta advakat Siarhieja Cichanoŭskaha Natalla Mackievič raspaviała ŭ intervju Tut.by.
Siarhiej Cichanoŭski znachodzicca za kratami ad 29 maja, užo bolš za piać miesiacaŭ. Advakat padzialiłasia apošnimi navinami pra Cichanoŭskaha.
«17 žniŭnia, napiaredadni dnia naradžeńnia, Siarhieja pieraviali ŭ Žodzina. Umovy ŭtrymańnia ŭ jaho tut lepšyja, čym u SIZA №1 na Vaładarskaha. Nie chaču mocna chvalić, bo, na dumku abarony, jon naohuł ni dnia nie pavinien byŭ znachodzicca pad vartaj, ale ŭ Žodzinie jamu sapraŭdy lepš.
Jon znachodzicca adzin u kamiery, heta damoŭlenaść z administracyjaj, kab nie było nijakich pravakacyj», — raspaviała advakat.
«Kaho jon bačyć? Supracoŭnikaŭ, jakija ranicaj i ŭviečary zachodziać z pravierkaj, advakataŭ, jakija pryjazdžajuć dva razy na tydzień. Na prahułku jaho vyvodziać, ale tam jon taksama adzin. Jamu pieradali televizar, pa padpiscy prychodzić adna hazieta. Niahledziačy na abmiežavanyja kantakty z vonkavym śvietam, jon vielmi adekvatna ŭsprymaje ŭsio, što adbyvajecca za ścienami turmy, u kursie ŭsich navin, u tym liku pra toje, što robić jaho žonka. Treba skazać, jamu prychodziać listy, u tym liku ad nieznajomych ludziej, jaho vielmi natchniaje, što pra jaho nie zabyvajuć», — raskazała Natalla Mackievič.
Advakat kaža, što Siarhiej i Śviatłana nie pierapisvajucca i spatkańniaŭ joj, pakul jana była ŭ Biełarusi, nie davali.
«U asnoŭnym praz advakataŭ my starajemsia pieradavać važnyja naviny. Kali ja pierakazała jamu frahmient intervju, dzie ŭ Śviatłany pytajucca, ci zmoh by Cichanoŭski žyć z žonkaj-prezidentam, jon adrazu ž adkazaŭ: «Viadoma, zmahu. Ja baču, što jana moža być całkam narmalnym prezidentam». Ale jon robić ahavorku, što ŭ prezidenta ŭ Biełarusi pavinny być pradstaŭničyja paŭnamoctvy, a ŭłada pavinna być raźmierkavanaja pamiž niekalkimi halinami, jak u cyvilizavanych dziaržavach».
«Napeŭna, jon užo taksama hladzić inšymi vačyma na jaje. Kaža, śmiełaść joj da tvaru, što jana stała jašče pryhažejšaj.
Razam z tym, jon hladzić i televizar, dzie tranślujucca dziaržaŭnyja telekanały, tak što viedaje situacyju ź niekalkich bakoŭ. Časam praz advakataŭ jon pieradaje Śviatłanie prafiesijnyja parady, jon ža zajmaŭsia videa: jak joj lepš sieści ŭ adnosinach da śviatła, jakuju adlehłaść pavinna być ad ściany, jakija frazy lepš nie vykarystoŭvać, tamu što ich vyryvajuć z kantekstu i ekspłuatujuć u niehatyŭnym śviatle», — dadała advakat.
Bajpoł nazvaŭ imiony mahčymych zabojcaŭ Andreja Zielcera. I zajaviŭ, što siłavika «Nirvanu» zastreliŭ svoj ža6
Kamientary