«Da 11 sakavika byŭ abvinavačanym pa inšym artykule». Pra što kazała advakat Łatypava ŭ sudzie
16 žniŭnia ŭ sudzie Savieckaha rajona Minska budzie vyniesieny prysud 41-hadovamu palitźniavolenamu žycharu «Płoščy Pieramien» i arbarystu Ściapanu Łatypavu. Prakuror Uładzimir Rabaŭ paprasiŭ sud pryznać Ściapana vinavatym pa troch artykułach KK i pakarać jaho pazbaŭleńniem voli terminam na vosiem hadoŭ i šeść miesiacaŭ va ŭmovach uzmocnienaha režymu i štrafam u pamiery 300 bazavych vieličyniaŭ. U sudovych sprečkach advakatka paprasiła sud apraŭdać Ściapana Łatypava, i voś jaje arhumienty i dovady.
Usie śviedki paćvierdzili, što Łatypavym byli akazanyja jakasnyja i svoječasovyja pasłuhi
Pa viersii abvinavačvańnia, Łatypaŭ nibyta braŭ z klijentaŭ hrošy na chimičnuju apracoŭku barščeŭnika, ale zamiest darahoha i vysakajakasnaha srodku kuplaŭ tanny, niesiertyfikavany i z sumniŭnaj jakaściu.
«Hetaja akaličnaść nie paćviardžajecca ni materyjałami spravy, ni rečavymi dokazami, ni pakazańniami śviedak», — adznačaje advakatka.
Usie śviedki, jakija apytvalisia na sudzie, paćvierdzili, što Łatypavym byli akazanyja jakasnyja i svoječasovyja pasłuhi. Taksama advakatka źviarnuła ŭvahu, što nie pravodziłasia nijakich daśledavańniaŭ, nijakich ekśpiertyz, nie apytvaŭsia nichto sa śpiecyjalistaŭ.
Preparat, jaki kanfiskavali ŭ Łatypava, nie adpravili ni na jakuju ekśpiertyzu. Pa słovach advakatki, jaho adpraŭlali tolki na daśledavańnie, kab vyklučyć, što dadzienaje rečyva źjaŭlajecca narkatyčnym abo ŭvachodzić u pieralik prekursoraŭ.
Taksama advakatka źviarnuła ŭvahu, što ŭ abvinavačvańni nazvany preparat, jakoha nie isnuje, tamu jon nie moh być vykarystany Łatypavym. Nijakaja siertyfikacyja nie patrabavałasia.
Da 11 sakavika nie było abvinavačvańnia pa č. 1 i 2 art. 342 Kryminalnaha kodeksa
Zhodna z materyjałami kryminalnaj spravy, u žniŭni 2020 hoda Ściapan Łatypaŭ stvaryŭ u miesiendžary Telegram-čat, u jakim zaklikaŭ jaho ŭdzielnikaŭ da «stvareńnia dvarovaj supolnaści z metaj publičnaha vykazvańnia svaich hramadska-palityčnych pohladaŭ i pratestu, viadzieńnia destruktyŭnaj dziejnaści, nakiravanaj u tym liku, na abvastreńnie napružanaści ŭ hramadstvie».
Pavodle viersii abvinavačvańnia, Ściapan Łatypaŭ naŭmysna zajmaŭsia finansavańniem i materyjalnym zabieśpiačeńniem pratestaŭ.
«Sama pa sabie farmuloŭka ŭ abvinavačvańni ŭžo supiarečlivaja. Kali čałaviek maje karyślivyja namiery, to jakim čynam tady jon zajmajecca finansavańniem i inšym materyjalnym zabieśpiačeńniem? Kali čałaviek układvaje svaje hrašovyja srodki ŭ niešta, jakuju karyść jon moh atrymać z hetaj situacyi? Toje, što jon ukłaŭ svaje asabistyja hrošy — heta nie karyść», — razvažaje advakatka.
Abaronca Ściapana adznačyła, što abvinavačvańnie niekarektna sfarmulavanaje i treba vyklučyć ź jaho farmuloŭku pra karyślivyja namiery.
Jana adznačaje, što prasłuchoŭka telefonnych razmovaŭ u dačynieńni da Łatypava pravodzilisia niezakonna i nieabhruntavana jašče z červienia 2020 hoda.
Taksama abaronca Ściapana źviarnuła ŭvahu, što pa stanie na lipień 2020 hoda ŭ dačynieńni da Łatypava nie było padstavaŭ dla praviadzieńnia prasłuchoŭvańnia. Zatrymany jon byŭ tolki 15 vieraśnia 2020 hoda pa padazreńni ŭ supracivie supracoŭnikam milicyi, kali jon prasiŭ pradstavicca siłavikoŭ. Pieršapačatkova Ściapan Łatypaŭ źjaŭlaŭsia padazravanym i abvinavačanym pa artykule 293 Kryminalnaha kodeksa. Tolki 11 sakavika 2021 hoda Ściapanu Łatypavu vystavili abvinavačvańni pa č. 4 art. 209, č. 1 i 2 art. 342 KK.
Paciarpiełyja nie ličać siabie paciarpiełymi. Abvinavačvańnie pa č. 2 art. 363 Kryminalnaha kodeksa
Jak adznačyła advakatka Ściapana, najbolš krasamoŭnymi źjaŭlajucca adkazy padčas dopytu i pazicyja samich paciarpiełych. Supracoŭniki milicyi sami nie ličać siabie paciarpiełymi. Adkazvajučy na pytańni ŭ sudzie, jany vyrazna davali adkazy, što nijakich paškodžańniaŭ im naniesiena nie było, nichto nie sprabavaŭ ich udaryć abo abrazić. U sudzie jany nie paćvierdzili tyja abstaviny, jakija vykładzienyja ŭ abvinavačvańni. Nichto ź ich nie zajaviŭ pazoŭ, bo im nie była naniesienaja ni fizičnaja, ni maralnaja škoda.
Advakatka prosić sud apraŭdać Ściapana Łatypava ŭ suviazi z adsutnaściu ŭ jaho dziejańniach składaŭ złačynstvaŭ.
Prysud palitviaźniu budzie abvieščany ŭ paniadziełak, 16 žniŭnia, u 14:30.
Pamior dzied Koli Łukašenki — były viazień HUŁAHa, asudžany za dapamohu «banderaŭcam»9
Kamientary