Łukašenka siońnia ŭpieršyniu naviedaje adzin z samych pratesnych univiersitetaŭ 2020 hoda. Niahledziačy na ŭpeŭnienaść palityka ŭ svajoj nibyta narodnaj padtrymcy, univiersitet pad sustreču byŭ śpiecyjalna rasčyščany ad bolšaści studentaŭ, a samo vystupleńnie budzie adbyvacca pad nahladam vialikaj kolkaści supracoŭnikaŭ KDB.
U hetu ranicu Alaksandr Łukašenka naviedaje Minski dziaržaŭny linhvistyčny ŭniviersitet, daviedałasia «Naša Niva» sa svaich krynic. Anonsaŭ vizitu Łukašenki nidzie nie było.
Łukašenka pačnie vystupać pierad studentami i supracoŭnikami VNU ŭ aktavaj zali a 10-11-j ranicy ŭ farmacie «adkrytaha mikrafona», paralelna źbirajučy podpisy za svajo vyłučeńnie na čarhovyja prezidenckija vybary (jon zajaviŭ, što nibyta ŭžo sabraŭ paŭtara miljona podpisaŭ).
Pry hetym, pa našaj infarmacyi, bolšaść studentaŭ univiersiteta pieršaj źmieny ŭ hety dzień była pieraviedziena na dystancyjnaje navučańnie, a sam univiersitet jašče ŭčora byŭ poŭny supracoŭnikaŭ KDB i televizijonščykaŭ, jakija rychtavali aparaturu pad siońniašni vystup.
Studenty roznych fakultetaŭ u svaich łakalnych hrupach i čatach taksama abmiarkoŭvali padrychtoŭku da mierapryjemstva. Ich ahitavali apranacca aficyjna i brać z saboj pašparty dla pakidańnia podpisaŭ za Łukašenku.
Pavodle našych raniejšych źviestak, vizit Łukašenki ŭ MDŁU pavinien byŭ adbycca jašče 1 listapada, adnak paśla vychadu adpaviednaha artykuła «Našaj Nivy» vizit biez tłumačeńnia pryčyn pieranieśli na inšyja daty.
U kancy minułaha miesiaca Linhvistyčny ŭniviersitet stali terminova rychtavać pad vizit Łukašenki.
«Univiersitet rychtujuć, myjuć, ramantujuć, mianiajuć dźviery, źjaviłasia šmat žyvych kvietak na vulicy», — dzialilisia surazmoŭcy.
Dadavali, što «navat tualety ekstranna pryvodziać da ładu». A hrukat ad ramontu zaminaŭ vučebnym zaniatkam.
Adznačym, što dla Łukašenki siońnia budzie pieršaje naviedvańnie Minskaha linhvistyčnaha ŭniviersiteta. Niadaŭna «Naša Niva» atrymała źviestki, što ad pačatku 2022 hoda da vosieni 2023-ha z MDŁU pa ŭłasnym žadańni adličylisia bolš za 1000 studentaŭ (dzionnaj i zavočnaj formy razam z metavikami).
Heta antyrekord za sučasnuju historyju VNU, adznačyli krynicy «Našaj Nivy» ź sistemy adukacyi.
Pa ich słovach, siarod dobraachvotna adličanych bolš za ŭsio studentaŭ dzionnaj formy navučańnia (kala 900 čałaviek). Taksama zabrali dakumienty bolš za 100 čałaviek z zavočnaj formy navučańnia i dziasiatak tych, chto vučycca pa metavym nakiravańni.
Nahadajem, što ŭ 2020 hodzie padčas pratestaŭ suprać hvałtu siłavikoŭ i sfalsifikavanych vynikaŭ prezidenckich vybaraŭ u mnohich biełaruskich VNU adbyvalisia masavyja mirnyja studenckija demanstracyi i strajki. U ich taksama prymali ŭdzieł vykładčyki i inšyja supracoŭniki ŭniviersitetaŭ.
Na ŭsio heta režym Łukašenki adkazaŭ štrafami, zapałochvańniami, źbićciom, zvalnieńniami, adličeńniami i aryštami ŭniviersiteckich pratestoŭcaŭ.
Na pačatak 2021 hoda było viadoma pra 131 vypadak represiŭnych adličeńniaŭ i 23 kryminalnyja spravy ŭ dačynieńni da studentaŭ roznych VNU. Dziasiatki vykładčykaŭ byli zvolnienyja.
Łukašenka na sustrečy sa studentami pakazaŭ svoj mabilnik
«Studentaŭ-płatnikaŭ u dziaržaŭnych VNU stanie bolš». Čamu ŭ Biełarusi zakryli adrazu dva pryvatnyja ŭniviersitety?
«Pražyć miesiac na stypiendyju atrymałasia, ale heta było vielmi sumna». Biełaruskija studenty raskazali, jak jany žyvuć i kolki traciać
Kubrakoŭ davodziŭ, što milicyjant Zhirski nie datyčny da bandy nalotčykaŭ. Ciapier taho sudziać — pahražaje da 20 hadoŭ3
Kamientary
Mietit, mietit i mietit....